Յիսուս Մովսեսէն մեծ է

1Ուստի, սուրբ եղբայրներ, երկնային կոչումին մասնակիցներ, նայեցէք մեր դաւանութեանը Առաքեալին ու Քահանայապետին, Քրիստոս Յիսուսի. 2Որ հաւատարիմ է անոր` որ զինք դրաւ, ինչպէս Մովսէս ալ` անոր բոլոր տանը մէջ: 3Վասն զի ինք Մովսէսէ այնչափ աւելի փառքի արժանացաւ, որչափ աւելի պատիւ կ’ունենայ տանը շինողը քան թէ տունը: 4Քանզի ամէն տուն մէկէ կը շինուի. բայց ան որ ամէն բաները ըրաւ` Աստուած է: 5Եւ յիրաւի Մովսէս անոր բոլոր տանը մէջ հաւատարիմ էր ծառայի մը պէս` զրուցուելու բաներուն վկայ ըլլալու համար. 6Բայց Քրիստոս որդիի մը պէս իր տանը վրայ, որուն տունը մենք ենք, միայն թէ այն համարձակութիւնը և յոյսին պարծանքը մինչև վերջը հաստատ բռնենք:

Հանգիստ մը Աստուծոյ ժողովուրդին

7Ուստի ինչպէս կ’ըսէ Հոգին Սուրբ, Այսօր եթէ անոր ձայնին պիտի լսէք, 8Ձեր սիրտերը մի խստացնէք բարկացնելու ատենին պէս անապատին մէջ փորձութեան օրը, 9Ուր ձեր հայրերը զիս փորձեցին, քննեցին զիս, թէպէտև քառասուն տարի իմ գործերս տեսան: 10Անոր համար զզուեցայ այն ազգէն ու ըսի, Միշտ մոլորած են սրտովնին, և իմ ճամբաներս չճանչցան անոնք. 11Ուստի երդում ըրի իմ բարկութեանս մէջ թէ Իմ հանգիստս պիտի չմտնեն: 12Նայեցէք, եղբայրներ, չըլլայ որ ձեզմէ մէկուն ներսիդին անհաւատութեան չար սիրտ ըլլայ` ապըստամբ ըլլալու կենդանի Աստուծմէն. 13Հապա ամէն օր մէկզմէկ յորդորեցէք, քանի որ Այսօր կ’ըսուի, որ չըլլայ թէ ձեզմէ մէկը խստանայ մեղքին խաբէութիւնովը: 14Քանզի մենք Քրիստոսի մասնակից եղած ենք, միայն թէ այն հաստատութեան սկիզբը մինչև վերջը պինդ բռնենք. 15Քանի որ կ’ըսուի, Այսօր եթէ անոր ձայնին պիտի լսէք, ձեր սիրտերը մի խստացնէք բարկացնելու ատենին պէս: 16Քանզի ոմանք լսեցին ու բարկացուցին, բայց ոչ թէ* ամէնը որ Եգիպտոսէ ելած էին Մովսէսի ձեռքով: 17Որոնցմէ՞ զզուեցաւ այն քառասուն տարին. չէ՞ որ մեղանչողներէն, որոնց ոսկորները անապատին մէջ ինկան: 18Եւ որո՞նց համար երդում ըրաւ իր հանգիստը չմտնել, եթէ ոչ` անհաւատներուն համար: 19Եւ կը տեսնենք որ չկրցան մտնել իրենց անհաւատութեանը համար: