1Ուրեմն ա°լ վախնանք, որ չըլլայ թէ անոր հանգիստը մտնելու խոստմունքէն, որ մեզի մնացեր է ձեզմէ մէկը զրկուած գտնուի: 2Վասն զի մենք ալ անոնց պէս աւետիս առած ենք. բայց անոնց շահ մը չըրաւ այն խօսքը լսելը, քանզի հաւատքով խառնուած չէր լսողներուն մէջ: 3Իսկ մենք որ հաւատացինք, հանգիստը կը մտնենք. ինչպէս ըսաւ, Ուստի երդում ըրի իմ բարկութեանս մէջ թէ Իմ հանգիստս պիտի չմտնեն. թէև իր գործերը աշխարհի սկիզբէն եղած էին: 4Վասն զի գիրքը այսպէս կ’ըսէ տեղ մը եօթներորդ օրուան համար, Եւ Աստուած եօթներորդ օրը հանգչեցաւ իր բոլոր գործերէն. 5Ու հոս նորէն կ’ըսէ թէ Իմ հանգիստս պիտի չմտնեն: 6Ուստի որովհետեւ ոմանց կը մնայ հոն մտնել, և անոնք որ առաջուընէ աւետիսը առած էին, անհաւատութեան համար չմտան, 7Նորէն օր մը կը սահմանէ` ու կ’ըսէ Այսօրը Դաւիթի բերնով այնքան ժամանակէ ետեւ, ինչպէս ըսուեցաւ, Այսօր եթէ անոր ձայնին պիտի լսէք, ձեր սիրտերը մի խստացնէք: 8Վասն զի եթէ Յեսու հանգչեցուցած ըլլար զանոնք, ալ անկէ ետքը ուրիշ օրուան համար չէր զրուցեր: 9Ուրեմն Աստուծոյ ժողովուրդին դեռ հանգիստ մը կը մնայ: 10Վասն զի ան որ անոր հանգիստը մտաւ, ալ հանգչեցաւ իր գործերէն, ինչպէս Աստուած ալ իրեններէն: 11Ուրեմն ջանանք այն հանգիստը մտնել, որ չըլլայ թէ մէկը նոյն անհաւատութեան օրինակին պէս իյնայ: 12Վասն զի Աստուծոյ խօսքը կենդանի է ու զօրեղ, և ամէն երկսայրի սուրէ կտրուկ, որ կը թափանցէ մինչև շունչը ու ոգին և յօդուածները ու ծուծը բաժնելու, և կը քննէ սրտին խորհուրդները ու մտածմունքները. 13Եւ չկայ արարած մը անոր դիմաց չերեւցած, հապա ամէն բան բաց ու յայտնի է անոր աչքերուն առջև, որու պիտի տրուի մեր հաշիւը:

Յիսուս մեծ քահանայապետը

14Արդ մենք որ մեծ Քահանայապետ մը ունինք երկինքը անցած, Յիսուսը, Աստուծոյ Որդին, ամուր բռնենք մեր դաւանութիւնը: 15Քանզի ոչ թէ այնպիսի քահանայապետ մը ունինք` որ կարող չըլլայ մեր տկարութիւններուն կարեկից ըլլալ, հապա ինք ամէն կերպով փորձը առած է մեզի նման, բայց առանց մեղքի: 16Ուստի ա°լ համարձակութիւնով մօտենանք շնորհաց աթոռին առջև, որպէս զի ողորմութիւն ընդունինք ու շնորհք գտնենք պէտք եղած ատեն մեզի օգնելու: