1Վասն զի ամէն քահանայապետ մարդոց մէջէն առնուած` մարդոց համար կը կենայ Աստուծոյ կողմը, որպէս զի պատարագներ ու զոհեր մատուցանէ մեղքերու համար. 2Եւ կարող է կարեկից ըլլալ անոնց` որ տգէտ ու մոլորեալ են, վասն զի ինք ալ տկարութիւնով պաշարուած է. 3Եւ այս պատճառաւ պարտաւոր է ինչպէս ժողովուրդին համար` նոյնպէս ալ իր անձին համար մեղքի պատարագ մատուցանել: 4Եւ ոչ թէ մէկը ինքիրմէ այս պատիւը կ’առնէ, հապա ան` որ Աստուծմէ կանչուած է, ինչպէս Ահարոն: 5Նոյնպէս ալ Քրիստոս ոչ թէ իր անձը մեծարեց քահանայապետ ըլլալու, հապա անիկա` որ զրուցեց անոր թէ Դուն իմ Որդիս ես, ես այսօր քեզ ծնայ. 6Ինչպէս ուրիշ տեղ մըն ալ կ’ըսէ, Դուն յաւիտեան քահանայ ես Մելքիսեդեկի կարգին պէս: 7Որ իր մարմինին օրերը սաստիկ գոչումով ու արցունքով աղօթք և աղաչանք մատուց անոր որ կարող էր զինք մահուանէ ազատել, ու լսուեցաւ իր բարեպաշտութեանը պատճառաւ*. 8Թէպէտ ինք Որդի է, բայց իր չարչարանքներէն հնազանդութիւն սորվեցաւ. 9Ու երբ կատարուեցաւ, բոլոր իրեն հնազանդողներուն յաւիտենական փրկութեան պատճառ եղաւ. 10Ու Աստուծմէ կոչուեցաւ Քահանայապետ Մելքիսեդեկի կարգին պէս:

Զգուշացում հաւատքը լքելէ

11Որուն վրայով շատ ըսելիք ունինք, որ դժուարին ալ է մեկնել, վասն զի ձեր լսելիքները բթացած են. 12Վասն զի թէպէտ պէտք էր ձեզի ժամանակին նայելով սորվեցնող ըլլալ, բայց նորէն պէտք է ձեզի սորվիլ թէ ի°նչ են Աստուծոյ պատգամներուն առաջին սկզբունքները. ու դուք կաթի կարօտ եղաք` և ոչ թէ հաստատուն կերակուրի: 13Քանզի այն ամէնը որ կաթնկեր է` արդարութեան խօսքին անհմուտ է, որովհետև տղայ է: 14Բայց հաստատուն կերակուրը կատարեալներուն է, որոնց զգայարանքները սովորութեամբ կրթուած են բարին ու չարը զանազանել: