Յիսուս մեր մեծ քահանայապետը

1Եւ զրուցած խօսքերուս բովանդակութիւնը այս է. այնպիսի քահանայապետ մը ունինք մենք` որ երկինքը Աստուծոյ մեծութեանը աթոռին աջ կողմը նստաւ. 2Սրբարանին պաշտօնեայ, ու ճշմարիտ խորանին` զոր Տէրը կանգնեց և ոչ թէ մարդ: 3Քանզի ամէն քահանայապետ պատարագներ ու զոհեր մատուցանելու համար որոշուած է. ուստի հարկ է որ ասիկա ալ բան մը ունենայ մատուցանելու: 4Որ եթէ երկրի վրայ ըլլար, քահանայ անգամ պիտի չըլլար, վասն զի կան քահանաներ` որոնք պատարագներ կը մատուցանեն օրէնքին համեմատ. 5(Որոնք երկնային բաներուն նմանութիւնովը ու շուքովը կը ծառայեն, ինչպէս Մովսէսի հրամայուեցաւ, երբ խորանը պիտի շինէր. քանզի ըսաւ, Նայէ որ լեռը քեզի ցուցուած օրինակին պէս շինես ամէնը.) 6Բայց հիմա Յիսուս ա°լ աւելի գերազանց պաշտօնի մը հասաւ, որչափ որ լաւագոյն խոստմունքներով հաստատուած լաւագոյն ուխտի մը միջնորդ է: 7Վասն զի եթէ առաջինը անմեղադրելի ըլլար, ուրեմն երկրորդին տեղ չէր փնտռուեր: 8Քանզի կը յանդիմանէ զանոնք ու կ’ըսէ, Ահա օրեր կու գան, կ’ըսէ Տէրը, որ Իսրայէլի տանը հետ ու Յուդայի տանը հետ նոր ուխտ պիտի ընեմ 9Ոչ թէ այն ուխտին պէս` զոր անոնց հայրերուն հետ ըրի, այն օրը որ անոնց. ձեռքէն բռնեցի` զանոնք Եգիպտոսի երկրէն հանելու համար. վասն զի անոնք իմ ուխտիս մէջ չկեցան, ես ալ անհոգ եղայ անոնց վրայով, կ’ըսէ Տէրը: 10Քանզի այս է այն ուխտը` զոր Իսրայէլի տանը հետ պիտի ընեմ այն օրերէն ետքը, կ’ըսէ Տէրը. իմ օրէնքներս անոնց միտքին մէջ պիտի դնեմ, և անոնց սրտին վրայ պիտի գրեմ զանոնք, ու ես անոնց Աստուած պիտի ըլլամ, և անոնք ինծի ժողովուրդ պիտի ըլլան: 11Ու բնաւ պիտի չսորվեցնեն ամէն մէկը իր ընկերին, և ամէն մէկը իր եղբօրը, ըսելով թէ Տէրը ճանչցիր. քանզի անոնց պզտիկէն մինչև մէծը ամէնը զիս պիտի ճանչնան. 12Վասն զի ես անոնց անիրաւութիւններուն ներող պիտի ըլլամ, և անոնց մեղքերը ու անօրէնութիւնները ա°լ պիտի չյիշեմ: 13Նոր ուխտ ըսելովը առաջինը հինցուց. ու այն որ կը հիննայ և կը ծերանայ, ա°լ կորուստի մօտ է: