Բաբելոնի պատգամաւորները

1Այն ատեն Բաբելոնի թագաւորը, Բաղադանի որդին Մարովդաք-բաղադան, նամակներ ու ընծաներ ղրկեց Եզեկիայի, քանզի անոր հիւանդանալը և առողջանալը լսեր էր: 2Ու Եզեկիա անոնց վրայ ուրախացաւ, և իր թանկագին բաներուն տունը, արծաթը ու ոսկին, ու խունկերը և պատուական իւղը, ու իր զէնքերուն բոլոր տունը և իր գանձերուն մէջ բոլոր գÁտնուածը ցուցուց. ու իր տանը մէջ և իր բոլոր տէրութեանը մէջ բան մը չմնաց, զոր Եզեկիա անոնց չցուցնէ: 3Ու Եսայի մարգարէն Եզեկիա թագաւորին եկաւ, ու անոր ըսաւ, Այդ մարդիկը ի՞նչ ըսին, և ուրկէ՞ եկան քեզի. ու Եզեկիա ըսաւ, Ինծի հեռու տեղէ, Բաբելոնէ, եկան: 4Եւ անիկա ըսաւ, Քու տանդ մէջ ի՞նչ տեսան. ու Եզեկիա ըսաւ, Տանս մէջ ինչ որ կար` տեսան, ու գանձերուս մէջ անոնց չցուցուցած բանս չմնաց: 5Այն ատեն Եսայի Եզեկիայի ըսաւ, Զօրաց Տէրոջը խօսքը մտիկ ըրէ. 6Ահա օրեր կու գան` որ քու տանդ մէջ ինչ որ կայ, ու քու հայրերդ մինչև այսօր ինչ որ ժողվեցին, Բաբելոն պիտի տարուին, բա՛ն մը պիտի չմնայ, կ’ըսէ Տէրը. 7Ու քեզմէ ելլելու` քու ծնանելու որդիներէդ պիտի առնեն, և անոնք Բաբելոնի թագաւորին պալատին մէջ ներքինիներ պիտի ըլլան: 8Ու Եզեկիա Եսայիի ըսաւ, Տէրոջը խօսքը զոր դուն ըսիր, բարի է. նաև ըսաւ, Որովհետև իմ օրերուս մէջ խաղաղութիւն ու ապահովութիւն պիտի ըլլայ: