Աշխարհին հետ բարեկամութիւն

1Ուրկէ՞ են պատերազմները, և ուրկէ՞ կռիւները ձեր մէջ. չէ՞ որ ձեր ցանկութիւններէն` որոնք ձեր անդամներուն մէջ կը պատերազմին: 2Կը ցանկաք ու չունիք, կը սպաննէք ու կը նախանձիք, և չէք կրնար ձեր ուզածին հասնիլ. կը պատերազմիք ու կը կռուիք, բայց չունիք, վասն զի չէք խնդրեր. 3Կը խնդրէք ու չէք առներ, վասն զի չարաչար կը խնդրէք` որպէս զի ձեր ցանկութիւններուն բանեցնէք: 4Շնացողներ, չէ՞ք գիտեր որ այս աշխարհին սէրը Աստուծոյ դէմ թշնամութիւն է. ուստի ով որ կուզէ աշխարհի բարեկամ ըլլալ, ինքզինք Աստուծոյ թշնամի կ’ընէ: 5Կամ թէ կը կարծէք որ գիրքը պարա՞պ տեղ կըսէ թէ Նախանձի կը փափաքի մեր մէջ բնակող հոգին*. 6Սակայն աւելի շնորհք կու տայ. անոր համար կ’ըսէ, Աստուած ամբարտաւաններուն հակառակ կը կենայ, բայց խոնարհներուն շնորհք կու տայ: 7Ուստի հնազանդեցէք Աստուծոյ. սատանայի հակառակ կեցէք, և անիկա ձեզմէ պիտի փախչի: 8Աստուծոյ մօտեցէք, ու անիկա ձեզի պիտի մօտենայ. սրբեցէք ձեռքերնիդ, մեղաւորներ, և մաքրեցէք սիրտերնիդ, երկմիտներ: 9Տառապանք քաշեցէք, սուգ ըրէք ու լացէք. ձեր ծիծաղը սուգի դառնայ, ու ձեր ուրախութիւնը` տրտմութեան: 10Տէրոջը առջև խոնարհեցէք, ու ան ձեզ պիտի բարձրացնէ:

Զգուշացում եղբայրը դատելէ

11Մէկզմէկ մի բամբասէք, եղբայրներ. ան ար իր եղբայրը կը բամբասէ կամ իր եղբայրը կը դատէ, օրէնքը կը բամբասէ և օրէնքը կը դատէ. ապա եթէ օրէնքը դատես, ալ դուն օրէնքը կատարող չես, հապա դատաւոր: 12Միայն մէկ Օրէնսդիր [ու Դատաւոր] կայ, որ կարող է փրկելու և կորսնցնելու. դուն ո՞վ ես որ ուրիշը կը դատես:

Զգուշացում պարծենալէ

13Հիմա մտիկ ըրէք դուք որ կ’ըսէք, Այսօր կամ վաղը երթանք այս անուն քաղաքը ու հոն տարի մը կենանք, և առուտուր ընենք ու վաստըկինք. 14(Դուք որ վաղը չէք գիտեր. 15Քանզի ի՞նչ է ձեր կեանքը յիրաւի շոգի մըն է, որ քիչ մը ատեն կ’երևնայ ու ետքը կ’ոչնչանայ.) անոր տեղ ըսելու էիք, Եթէ Տէրը կամենայ ու ապրինք, այս կամ այն բանը ընենք: 16Բայց հիմա ձեր ամբարտաւանութիւնովը կը պարծենաք. բոլոր այսպիսի պարծանքները չարութիւն են: 17Ուստի ով որ բարին ընելը գիտնայ ու չընէ, այն մեղք է անոր: