Թովղա

1Եւ Աբիմելէքէ ետքը Իսաքարեան Դովդայի որդւոյն Փուայի որդին Թովղա ելաւ Իսրայէլը ազատելու համար. ու անիկա Եփրեմի լեռը Սամիրի մէջ կը բնակէր: 2Եւ Իսրայէլի մէջ քսանուիրեք տարի դատաւորութիւն ըրաւ, ու մեռաւ և Սամիրի մէջ թաղուեցաւ:

Յայիր

3Ու անկէ ետև Գաղաադացի Յայիր ելաւ, և Իսրայէլի մէջ քսանուերկու տարի դատաւորութիւն ըրաւ: 4Ու անիկա երեսուն որդի ունէր, որոնք երեսուն աւանակի վրայ կը հեծնէին. և անոնք Գաղաադու երկրին մէջ երեսուն քաղաք ունէին, որոնք մինչև այսօր Յայիրի գիւղաքաղաքները կ’ըսուին: 5Եւ Յայիր մեռաւ ու Կամօնի մէջ թաղուեցաւ: 6Եւ Իսրայէլի որդիները նորէն Տէրոջը առջև չարութիւն ըրին, ու Բահաղիմը և Աստարովթը ու Ասորւոց աստուածները և Սիդոնի աստուածները ու Մովաբի աստուածները և Ամմոնի որդիներուն աստուածները ու Փղշտացւոց աստուածները պաշտեցին. և Տէրը թողուցին ու անոր ծառայութիւն չըրին: 7Եւ Տէրոջը բարկութիւնը Իսրայէլի վրայ բորբոքեցաւ, ու զանոնք Փղշտացւոց ձեռքը ու Ամմոնի որդիներուն ձեռքը մատնեց: 8Եւ անոնք այն տարիէն մինչև տասնըութ տարի Իսրայէլի որդիները նեղեցին ու հարստահարեցին, այսինքն բոլոր Իսրայէլի որդիները, որոնք Յորդանանու անդիի կողմը, Գաղաադու մէջ, Ամօրհացւոց երկրին մէջ կը բնակէին: 9Նաև Ամմոնի որդիները Յորդանանէ անցան, որպէս զի Յուդայի հետ, Բենիամինի հետ ու Եփրեմի տանը հետ ալ պատերազմ ընեն. ու Իսրայէլ խիստ մեծ նեղութեան մէջ էր: 10Եւ Իսրայէլի որդիները Տէրոջը աղաղակեցին ու ըսին, Քեզի դէմ մեղք գործեցինք, քանզի մեր Աստուածը թողուցինք ու Բահաղիմը պաշտեցինք. 11Եւ Տէրը Իսրայէլի որդիներուն ըսաւ, Չէ՞ որ ձեզ ազատեցի Եգիպտացիներէն, Ամօրհացիներէն, Ամմոնի որդիներէն ու Փղշտացիներէն. 12Նաև երբ Սիդոնացիները, Ամաղեկացիները ու Մաոնացիները ձեզ նեղեցին, ու դուք ինծի աղաղակեցիք, ես ձեզ անոնց ձեռքէն ազատեցի: 13Բայց դուք զիս թողուցիք և ուրիշ աստուածներու ծառայութիւն ըրիք. անոր համար ես մէյմըն ալ ձեզ պիտի չազատեմ: 14Գացէք ձեր ընտրած աստուածներուն աղաղակեցէք. ձեր նեղութեան ատենը թող անոնք ձեզ ազատեն: 15Եւ Իսրայէլի որդիները Տէրոջը ըսին, Մեղք գործեցինք. քու աչքիդ առջև ինչ որ հաճելի է, զայն ըրէ մեզի. բայց միայն կ’աղաչենք, ազատէ մեզ այսօր: 16Ուստի իրենց մէջէն օտար աստուածները վերցուցին, ու Տէրոջը ծառայութիւն ըրին. և Անոր սիրտը իջաւ Իսրայէլի նեղութեանը համար: 17Եւ Ամմոնի որդիները ժողվուեցան, ու Գաղաադու մէջ բանակեցան. Իսրայէլի որդիներն ալ ժողվուեցան, ու Մասփայի մէջ բանակեցան: 18Եւ ժողովուրդը ու Գաղաադու իշխանները իրարու ըսին, Ով որ Ամմոնի որդիներուն հետ պատերազմ ընելու սկսի, անիկա Գաղաադու բոլոր բնակիչներուն գլուխ ըլլայ: