Յեփթայէն և Եփրեմեանները

1Ու Եփրեմի մարդիկը ժողվուեցան, և դէպ ի հիւսիսային կողմը անցան, ու Յեփթայէի ըսին, Ինչո՞ւ համար Ամմոնի որդիներուն հետ պատերազմելու գացած ատենդ մեզ չկանչեցիր, որպէս զի քեզի հետ երթայինք. հիմա մենք ալ քու տունդ քու վրադ կրակով պիտի այրենք: 2Եւ Յեփթայէ անոնց ըսաւ, Ես ու իմ ժողովուրդս Ամմոնի որդիներուն հետ մեծ կռիւներ ունեցանք, և ձեզ կանչեցի, բայց դուք զիս անոնց ձեռքէն չազատեցիք: 3Ես ալ երբ տեսայ որ դուք զիս չէք ազատեր, հոգիս ձեռքիս մէջ դնելով Ամմոնի որդիներուն վրայ գացի, ու Տէրը զանոնք իմ ձեռքս մատնեց. և ինչո՞ւ համար դուք այսօր ինծի դէմ պատերազմ ընելու եկաք: 4Ու Յեփթայէ Գաղաադու բոլոր մարդիկը ժողվելով Եփրեմի հետ պատերազմ ըրաւ, և Գաղաադու մարդիկը Եփրեմեանները զարկին. քանզի ըսեր էին թէ Դուք, Գաղաադացիք, Եփրեմի մէջ ու Մանասէի մէջ Եփրեմի փախստականներն էք: 5Եւ Գաղաադացիք Եփրեմի առջեւէն Յորդանանու անցքերը բռնեցին, ու երբ Եփրեմի փախստական մը Թող տուէք անցնիմ` ըսէր, Գաղաադու մարդիկը անոր կ’ըսէին, Եփրեմեա՞ն ես. ու անիկա Ոչ` կ’ըսէր. 6Եւ անոնք անոր կ’ըսէին, Ուրեմն Շիպպօլէթ ըսէ. ու անիկա Սիպպօլէթ կ’ըսէր, (քանզի չէր կրնար շիտակ արտաբերել.) ուստի զանիկա կը բռնէին, և Յորդանանու անցքերուն մէջ կը սպաննէին. ու այն ատեն Եփրեմէ քառասունուերկու հազար մարդ ինկաւ: 7Եւ Յեփթայէ Իսրայէլի մէջ վեց տարի դատաւորութիւն ըրաւ. ու Գաղաադացի Յեփթայէ մեռաւ, և Գաղաադու քաղաքներէն մեկուն մէջ թաղուեցաւ:

Աբեսսա, Ելօն, Աբդօն

8Ու անկէ ետև Իսրայէլի մէջ Բեթլէհեմացի Աբեսսան դատաւորութիւն ըրաւ: 9Եւ անիկա երեսուն տղայ ունէր, ու երեսուն աղջիկ, զորոնք դուրս տուաւ, ու դուրսէն ալ իր տղոցը երեսուն աղջիկ ներս առաւ. ու ինք Իսրայէլի մէջ եօթը տարի դատաւորութիւն ըրաւ: 10Եւ Աբեսսան մեռաւ, ու Բեթլէհէմի մէջ թաղուեցաւ: 11Եւ անկէ ետև Զաբուղոնացի Ելօն Իսրայէլի դատաւոր եղաւ, ու Իսրայէլի մէջ տասը տարի դատաւորութիւն ըրաւ: 12Եւ Զաբուղոնացի Ելօն մեռաւ, ու Զաբուղոնի երկիրը` Այեղոնի մէջ թաղուեցաւ: 13Եւ անկէ ետև Փարաթոնացի Հելլելի որդին Աբդօն Իսրայէլի դատաւոր եղաւ: 14Ու անիկա քառասուն տղայ ու երեսուն թոռ ունէր, որոնք եօթանասուն աւանակներու վրայ կը հեծնէին. և ինք Իսրայէլի մէջ ութ տարի դատաւորութիւն ըրաւ: 15Ու Փարաթոնացի Հելլելի որդին Աբդօն մեռաւ, և Ամաղեկացւոց լեռանը վրայ, Եփրեմի երկիրը, Փարաթոնի մէջ թաղուեցաւ: