Միքան և Դանին ցեղը

1Այն օրերը Իսրայէլի մէջ թագաւոր չկար. ու այն օրերը Դանի ցեղը իրեն ժառանգութիւն մը կը փնտռէր բնակելու համար. քանզի մինչև այն օրը Իսրայէլի ցեղերուն մէջ անոր բաւական ժառանգութիւն ինկած չէր: 2Եւ Դանի որդիները իրենց ազգատոհմներէն ու իրենց սահմաններէն, Սարաայէ ու Եսթաւուղէ, հինգ զօրաւոր մարդ ղրկեցին, որպէս զի երկիրը լրտեսեն ու քննեն. և անոնք ըսին, Գացէք երկիրը քննեցէք. ու անոնք Եփրեմի լեռը մինչև Միքայի տունը եկան, և գիշերը հոն մնացին: 3Ու երբ անոնք Միքայի տանը քով էին, Ղեւտացի պատանիին ձայնը ճանչցան, և հոն դարձան ու ըսին, Ո՞վ քեզ հոս բերաւ, և դուն հոս ի՞նչ կ’ընես, ու ինչո՞ւ համար հոս կեցեր ես: 4Եւ անիկա ըսաւ անոնց, Միքա ինծի այսպէս այսպէս ըրաւ, ու զիս վարձքով բռնեց, որպէս զի անոր քահանայ ըլլամ: 5Եւ անոր ըսին, Հիմա Աստուծոյ հարցուր, որպէս զի գիտնանք թէ արդեօք մեր գացած ճամբան մեզի պիտի յաջողի՞: 6Ու քահանան անոնց ըսաւ, Խաղաղութեամբ գացէք. ձեր երթալու ճամբան Տէրոջը առջև հաճելի է: 7Այն ատեն այն հինգ մարդիկը գացին Լայիս մտան, և անոր մէջ բնակող ժողովուրդը տեսան, որ Սիդոնացւոց պէս անհոգութեամբ հանգիստ ու ապահով կը բնակէին, և այն երկրին մէջ վնաս տուող մը չկար` որ իշխէր անոնց վրայ. ու Սիդոնացիներէն հեռու ըլլալով` բնաւ մարդու մը հետ գործ չունէին: 8Եւ այն հինգ մարդը Սարաա ու Եսթաւուղ դարձան իրենց եղբայրներուն. և անոնց եղբայրները անոնց ըսին, Դուք ի՞նչ ըրիք: 9Ու անոնք ըսին, Ելէք, անոնց վրայ երթանք, քանզի մենք երկիրը տեսանք, և ահա շատ աղէկ է. ու դուք թո՞յլ կը կենաք. երթալու ու երկիրը ժառանգելու համար հոն մտնելու անհոգութիւն մի ընէք: 10Երբ հոն մտնէք, անհոգ ժողովուրդի մը ու շատ ընդարձակ երկրի մը մէջ պիտի մտնէք, որ Աստուած զանիկա ձեր ձեռքը տուեր է. ու այնպիսի տեղ մըն է` որ հոն երկրի վրայ եղող բաներէն մէ՛կը պակաս չէ: 11Եւ Դանի ազգատոհմէն, անկէ` այսինքն Սարաայէ ու Եսթաւուղէ, վեց հարիւր սպառազինեալ մարդիկ գացին: 12Ու ելան Յուդայի Կարիաթարիմը բանակեցան. անոր համար այն տեղը մինչև այսօր Մահանէ-դան կ’ըսուի. ահա անիկա Կարիաթարիմի ետեւն է: 13Եւ անկէ Եփրեմի լեռը անցան, ու մինչև Միքայի տունը եկան: 14Եւ Լայիսի երկիրը լրտեսելու գացող այն հինգ մարդը պատասխան տալով` իրենց եղբայրներուն ըսին, Գիտէ՞ք որ այս տուներուն մէջ եփուտ, թերափիմ, և քանդակուած ու թափծու կուռք կայ. ու հիմա ձեր ընելու բանը գիտցէք: 15Այն ատեն անոնք դէպ ի հոն դառնալով այն Ղեւտացի պատանիին տունը, Միքայի տունը, մտան, ու անոր ողջութիւնը հարցուցին: 16Եւ Դանի որդիներէն եղող այն վեց հարիւր սպառազինեալ մարդիկը դրանը բերանը կայնեցան: 17Ու երկիրը լրտեսելու գացող այն հինգ մարդիկը հոն մտան, և քանդակուած կուռքը, եփուտը, թերափիմը ու թափծու կուռքը առին. և քահանան այն վեց հարիւր սպառազինեալ մարդոց հետ դրանը բերանը կայներ էր: 18Ու երբ անոնք Միքայի տունը մտան, և քանդակուած կուռքը, եփուտը, թերափիմը ու թափծու կուռքը առին, քահանան անոնց ըսաւ, Դուք ի՞նչ կ’ընէք: 19Ու անոնք ըսին անոր, Լուռ կեցիր, ձեռքդ բերնիդ վրայ դիր ու մեզի հետ եկուր, և մեզի հայր ու քահանայ եղիր. քեզի մէկ մարդու տա՞նը քահանայ ըլլալ աղէկ է, թէ Իսրայէլի մէկ ցեղին ու մէկ ազգատոհմին քահանայ ըլլալ: 20Եւ քահանան սրտին մէջէն ուրախանալով` եփուտը, թերափիմը և քանդակած կուռքը առաւ ու ժողովուրդին մէջ մտաւ: 21Եւ անոնք դարձան գացին, ու ընտանիքները և անասունները ու թանկագին կարասիները իրենց առջև դրին: 22Երբ անոնք Միքայի տունէն հեռացան, Միքայի տանը մօտ եղող տուներուն մարդիկը ժողվուեցան, ու Դանի որդիներուն ետեւէն հասան. 23Եւ դանի որդիներուն ետեւէն կանչուըռտեցին, որոնք երեսնին դարձուցին ու Միքայի ըսին, Քեզի ի՞նչ եղաւ որ այսպէս բազմութիւնով կու գաս: 24Եւ անիկա ըսաւ, Իմ շինած աստուածներս ու քահանան առիք գացիք, և ասկէ ետև ինծի ի՞նչ կը մնայ. ու ինծի ինչո՞ւ համար կ’ըսէք թէ Քեզի ի՞նչ եղաւ: 25Եւ Դանի որդիները անոր ըսին, Մեր մէջ քու ձայնդ չլսուի. չըլլայ որ բարկասիրտ մարդիկ քու վրադ յարձակին, ու քու կեանքդ և քու ընտանիքիդ կեանքը կորսնցնես: 26Եւ Դանի որդիները իրենց ճամբան գացին. և Միքա տեսնելով որ անոնք իրմէ զօրաւոր են, դարձաւ իր տունը գնաց: 27Ու անոնք Միքայի շինածները և անոր քահանան առին, ու Լայիսի վրայ, հանգիստ և անհոգ կեցող ժողովուրդի մը վրայ, գացին, ու զանոնք սուրի բերնէ անցընելով քաղաքը կրակով այրեցին: 28Եւ անոնք Սիդոնէ հեռու ըլլալնուն ու մարդու մը հետ գործ չունենալնուն համար, զանոնք ազատող մը չկար. և այն քաղաքը Բեթրոոբի հովիտին մէջ էր. ու քաղաքը շինեցին և անոր մէջ բնակեցան: 29Ու քաղաքին անունը իրենց հօրը Իսրայելեան Դանի անունովը Դան կոչեցին, բայց քաղաքին անունը առաջ Լայիս էր: 30Եւ Դանի որդիները քանդակուած կուռքը կանգնեցին իրենց. ու Մանասէի որդւոյն Գերսոնի որդին Յովնաթան, ինք ու իր որդիները, մինչև երկրին գերութեան օրը Դանի ցեղին քահանաներն էին: 31Ուստի անոնք Միքայի շինած կուռքը իրենց պահեցին, որչափ ժամանակ որ Աստուծոյ տունը Սելովի մէջ էր: