Իսրայէլ պատերազմի կը պատրաստուի

1Այն ատեն բոլոր Իսրայէլի որդիները ելան, ու ժողովքը մէկ մարդու պէս Դանէ մինչև Բերսաբէէ և Գաղաադու երկիրը, Մասփայի մէջ, Տէրոջը առջև ժողվուեցան: 2Եւ բոլոր ժողովուրդին, Իսրայէլի բոլոր ցեղերուն, գլխաւոր մարդիկը չորս հարիւր հազար սուր քաշող հետեւակ զօրք ըլլալով, Աստուծոյ ժողովուրդին ժողովքին մէջ ներկայացան: 3Եւ Բենիամինի որդիները լսեցին որ Իսրայէլի որդիները Մասփա ելեր են: Ու Իսրայէլի որդիները ըսին, Մեզի պատմեցէք թէ այս չարութիւնը ի՛նչպէս եղաւ: 4Եւ այն Ղեւտացի մարդը, մեռցուած կնոջ այրը, պատասխան տուաւ ու ըսաւ, Ես ու իմ հարճս Բենիամինի Գաբաան եկանք, որպէս զի գիշերը հոն մնանք. 5Եւ Գաբաայի բնակիչները ինծի դէմ ոտք ելան, ու գիշերով իմ եղած տունս պաշարեցին, և զիս մեռցնել կ’ուզէին, ու իմ հարճս լլկեցին և մեռաւ. 6Ես ալ իմ հարճս առի ու զանիկա կտոր կտոր ըրի, և Իսրայէլի ժառանգութեանը բոլոր երկիրը ղրկեցի. քանզի անոնք Իսրայէլի մէջ մեծ յանցանք ու անզգամութիւն ըրին: 7Ահա դուք ամէնքդ ալ Իսրայէլի որդիներ էք, հոս ձեր մէջ խօսեցէք ու խորհուրդ ըրէք: 8Եւ բոլոր ժողովուրդը մէկ մարդու պէս ոտք ելաւ, ու ըսաւ, Մեզմէ բնաւ մէկը իր վրանը պիտի չերթայ, ու բնաւ մէկը իր տունը չդառնայ: 9Եւ հիմա Գաբաայի ընելու բաներնիս ասիկա է. Անոր վրայ վիճակով երթանք. 10Ու իսրայէլի ամէն ցեղերէն` հարիւրէն տասը, և հազարէն հարիւր, ու տասը հազարէն հազար մարդ առնենք, որպէս զի ժողովուրդին պաշար տանին. անոնք ալ Բենիամինի Գաբաան մտնելով, անոր բնակիչներուն Իսրայէլի մէջ ըրած բոլոր անզգամութեանը փոխարէնը հատուցանեն: 11Եւ այն քաղաքին վրայ երթալու համար` Իսրայէլի բոլոր մարդիկը մէկ մարդու պէս միաբանութեամբ ժողվուեցան: 12Ու Իսրայէլի ցեղերը Բենիամինի բոլոր ցեղին մարդիկ ղրկեցին ու ըսին, Այս ի՜նչ չարութիւն է որ ձեր մէջ եղաւ: 13Եւ հիմա Գաբաայի մէջ եղող այն չար մարդիկը տուէք, որպէս զի զանոնք մեռցնենք, ու չարութիւնը Իսրայէլէ վերցնենք: Բայց Բենիամինեանք իրենց եղբայրներուն, Իսրայէլի որդիներուն, խօսքը մտիկ ընել չուզեցին. 14Ու Բենիամինի որդիները Իսրայէլի որդիներուն դէմ պատերազմ ընելու համար, իրենց քաղաքներէն Գաբաայի մէջ ժողվուեցան: 15Եւ այն օրը իրենց քաղաքներէն եկող Բենիամինի որդիները համրուեցան. ու քսանըվեց հազար սուր քաշող մարդ գտնուեցաւ, բաց ի Գաբաայի բնակիչներէն, որոնք եօթը հարիւր ընտիր մարդիկ համրուեցան: 16Այս բոլոր ժողովուրդին մէջ եօթը հարիւր ընտրուած ահեկագործ մարդիկ կային, որոնց ամէնն ալ պարսատիկով մազի վրայ քար կը նետէին առանց վրիպելու: 17Եւ Իսրայէլի մարդիկն ալ համրուեցան. ու Բենիամինէ զատ չորս հարիւր հազար սուր քաշող մարդ գտնուեցաւ. ասոնք ամէնն ալ պատերազմող մարդիկ էին:

Բենիամինին դէմ պատերազմ

18Ու գացին Բեթէլ ելան. և Իսրայէլի որդիները Աստուծոյ հարցուցին ու ըսին, Բենիամինի հետ պատերազմելու համար ո՞վ մեզի առաջնորդ ըլլայ. և Տէրը ըսաւ, Յուդա առաջնորդ ըլլայ: 19Ու Իսրայէլի որդիները առաւօտուն ելան և Գաբաայի դիմաց բանակեցան: 20Ու Իսրայելացիք Բենիամինի հետ պատերազմ ընելու ելան. և Իսրայելացիք Գաբաայի քով անոնց դէմ շարուեցան պատերազմի համար: 21Ու Բենիամինի որդիները Գաբաայէ ելան, և այն օրը Իսրայէլէ քսանուերկու հազար մարդ գետինը փռեցին: 22Ու ժողովուրդը, այսինքն Իսրայելացիք, ուժովցան, և նորէն գացին պատերազմելու համար շարուեցան նոյն տեղը, ուր առջի օրը շարուեր էին: 23(Ու Իսրայէլի որդիները ելան, և Տէրոջը առջև մինչև իրիկուն լացին, ու Տէրոջը հարցնելով ըսին, Մեր եղբօրը Բենիամինի հետ պատերազմելու համար նորէն ելլե՞նք: Եւ Տէրը ըսաւ, Անոր դէմ ելէք:) 24Ու երկրորդ օրը Իսրայէլի որդիները Բենիամինի որդիներուն մօտեցան: 25Ու երկրորդ օրը Բենիամինեանք Գաբաայէ անոնց դէմ ելան պատերազմելու համար. և Իսրայէլի որդիներէն նորէն տասնըութ հազար մարդ գետինը փռեցին. ասոնց ամէնն ալ սուր քաշող մարդիկ էին: 26Այն ատեն բոլոր Իսրայէլի որդիները, այսինքն բոլոր ժողովուրդը, ելան Բեթէլ գացին, ու հոն Տէրոջը առջև նստան լացին, և այն օրը մինչև իրիկուն ծոմ պահեցին, ու Տէրոջը առջև ողջակէզներ և խաղաղութեան զոհեր մատուցին: 27Ու Իսրայէլի որդիները Տէրոջը հարցուցին. (ու այն օրերը Աստուծոյ ուխտին տապանակը հոն էր. 28Եւ այն օրերը անոր առջև Ահարոնեան Եղիազարի որդին Փենէհէս կը կայնէր.) ու ըսին, Մեր եղբօրը Բենիամինի որդիներուն հետ պատերազմելու համար նորէն մէյմըն ալ ելլե՞նք, թէ ետ քաշուինք: Եւ Տէրը ըսաւ, Ելէք, քանզի վաղը զանոնք ձեր ձեռքը պիտի մատնեմ: 29Ու Իսրայելացիք Գաբաայի բոլորտիքը դարանակալներ դրին: 30Եւ Իսրայէլի որդիները երրորդ օրը Բենիամինի որդիներուն վրայ գացին, ու միւս անգամներուն պէս Գաբաայի դիմաց շարուեցան: 31Այն ատեն Բենիամինի որդիները ժողովուրդին դէմը ելան, և քաղաքէն զատուեցան, ու առաջին անգամներուն պէս սկսան ժողովուրդը զարնել, ու երեսունի չափ Իսրայելացի մեռցուցին այն ճամբաներուն մէջ` որոնց մէկը Բեթէլ կ’ելլէր ու միւսը դաշտի Գաբաան: 32Եւ Բենիամինի որդիները ըսին, Ահա անոնք մեր առջև առաջին անգամներուն պէս կը կոտրուին: Ու Իսրայէլի որդիները ըսին, Փախչինք ու զանոնք քաղաքէն դուրս ճամբաները հանենք: 33Եւ Իսրայէլի բոլոր մարդիկը իրենց տեղէն ելան, ու Բաալթամարի առջև շարուեցան: Եւ Իսրայէլի դարանակալները յանկարծ իրենց տեղէն, Գաբաայի դաշտէն, դուրս ելան: 34Ու Գաբաայի առջև բոլոր Իսրայէլէ տասը հազար ընտրուած մարդ եկան, և պատերազմը սաստկացաւ. ու անոնք չէին գիտեր որ իրենց վրայ չարիք հասեր է: 35Եւ Տէրը Իսրայէլի առջև Բենիամինը զարկաւ. ու այն օրը Իսրայէլի որդիները Բենիամինէ քսանըհինգ հազար հարիւր մարդ կոտրեցին. անոնց ամէնն ալ սուր քաշող մարդիկ էին:

Իսրայէլացիք ինչպէս յաղթեցին

36Եւ Բենիամինի որդիները իրենց յաղթուիլը տեսան. քանզի Իսրայելացիք Գաբաայի բոլորտիքը դրած դարանակալներուն ապաւինելով` Բենիամինեանց տեղ տուին: 37Եւ դարանակալները շուտով Գաբաայի վրայ յարձակեցան, ու դարանակալները չորս կողմը տարածուեցան, և բոլոր քաղաքը սուրի բերնէ անցուցին: 38Եւ Իսրայելացիք դարանակալներուն հետ ժամանակ մը որոշեր էին, որպէս զի քաղաքէն մեծ կրակով ծուխ հանեն: 39Այն ատեն Իսրայէլի մարդիկը պատերազմին մէջ փախուստ ցուցուցին. ու Բենիամինեանք սկսան Իսրայելացիները զարնել, ու երեսուն մարդու չափ մեռցուցին. քանզի ըսին թէ Անտարակոյս անոնք մեր առջև առաջին պատերազմին պէս կը կոտրուին: 40Բայց երբ քաղաքէն կրակին ծուխը սիւնի պէս բարձրանալ սկսաւ, Բենիամինեանք ետեւնին դառնալով` նայեցան որ քաղաքին հրդեհը երկինք կ’ելլէր: 41Ու երբ Իսրայելացիները նորէն ետ դարձան, Բենիամինեանք ապշեցան մնացին, քանզի տեսան որ չարիքը իրենց վրայ հասեր էր: 42Ուստի անոնք Իսրայելացւոց առջեւէն դէպ ի անապատին ճամբան դարձան. բայց պատերազմը անոնց հասաւ, ու քաղաքներէն ելլողները զանոնք իրենց մէջ մեռցուցին: 43i> Այսպէս Բենիամինեանները պաշարեցին, զանոնք հալածեցին, ու զանոնք դիւրութեամբ մինչև Գաբաայի դիմաց արեւելեան կողմէն զարկին: 44Եւ Բենիամինէ տասնըութ հազար մարդ ինկաւ. անոնց ամէնն ալ զօրաւոր մարդիկ էին: 45Ու մնացածները դարձան դէպ ի անապատը Ռեմօնի վէմը փախան. անոնցմէ ճամբաներուն մէջ հինգ հազար մարդ ճռաքաղ ըրին. և զանոնք մինչև Գեդոմ հալածելով` անոնցմէ երկու հազար մարդ զարկին: 46Ու Բենիամինէ այն օրը բոլոր ինկածները քսանըհինգ հազար սուր քաշող մարդ էին. անոնց ամէնն ալ զօրաւոր մարդիկ էին: 47Եւ վեց հարիւր մարդ դարձան ու անապատը, Ռեմօնի վէմը, փախան, ու Ռեմօնի վէմը չորս ամիս կեցան: 48Եւ Իսրայելացիք Բենիամինի որդիներուն դառնալով` զանոնք սուրի բերնէ անցուցին, քաղաքներուն մէջի մարդոցմէ մինչև անասունները, ու ինչ որ գտնուեցաւ. ու բոլոր գտնուած քաղաքներն ալ կրակով այրեցին: