Երկիրը մնացող ազգերը

1Եւ ասոնք են այն ազգերը զորոնք Տէրը թող տուաւ, որպէս զի անոնցմով Իսրայէլը, այսինքն Քանանացւոց բոլոր պատերազմները ամէն չգիտցողները, փորձէ. 2(Միայն ասոր համար` որ Իսրայէլի որդիներուն սերունդը, մանաւանդ առաջուընէ չգիտցողները, պատերազմ սորվին ու գիտնան.) 3Փղշտացւոց հինգ նախարարութիւնները, և բոլոր Քանանացիները ու Սիդոնացիները, Լիբանան լեռը բնակող Խեւացիները, Բաաղհերմոն լեռնէն մինչև Եմաթի մուտքը: 4Ասոնցմով պիտի փորձէր Իսրայէլը որպէս զի գիտնայ թէ արդեօք պիտի հնազանդի՛ն Տէրոջը պատուիրանքներուն, զորոնք Մովսէսի ձեռքով անոնց հայրերուն հրամայեր էր: 5Եւ Իսրայէլի որդիները Քանանացւոց, Քետացւոց, Ամօրհացւոց, Փերեզացւոց, Խեւացւոց ու Յեբուսացւոց մէջ բնակեցան. 6Եւ անոնց աղջիկները իրենց կին առին, ու իրենց աղջիկներն ալ անոնց տղոցը տուին, և անոնց աստուածները պաշտեցին:

Գոթոնիէլ

7Եւ Իսրայէլի որդիները Տէրոջը առջև չարութիւն ըրին, և իրենց Տէր Աստուածը մոռնալով Բահաղիմը ու Աստարովթը պաշտեցին: 8Եւ Տէրոջը բարկութիւնը Իսրայէլի վրայ բորբոքեցաւ, ու զանոնք Միջագետի Քուսարսաթեմ թագաւորին ձեռքը մատնեց. և Իսրայէլի որդիները ութ տարի ծառայութիւն ըրին Քուսարսաթեմի: 9Ետքը Իսրայէլի որդիները Տէրոջը աղաղակեցին. ու Տէրը Իսրայէլի որդիներուն փրկիչ մը հանեց, Քաղէբի պզտիկ եղբօրը Կենեզի որդին Գոթոնիէլը, որ զանոնք ազատեց: 10Եւ Տէրոջը Հոգին անոր վրայ ըլլալով` Իսրայէլի մէջ դատաւորութիւն կ’ընէր. ու երբ պատերազմի ելաւ, Տէրը Միջագետի Քուսարսաթեմ թագաւորը անոր ձեռքը տուաւ, և անոր ձեռքը Քուսարսաթեմի դէմ զօրացաւ: 11Ու երկիրը քառասուն տարի հանգստացաւ. և Կենեզեան Գոթոնիէլ մեռաւ:

Աւովդ

12Ու Իսրայէլի որդիները նորէն Տէրոջը առջև չարութիւն ըրին. և Տէրոջը առջև չարութիւն ընելնուն համար Տէրը Մովաբի Էգղոն թագաւորը Իսրայէլի դեմ ուժովցուց. 13Եւ անիկա Ամմոնի ու Ամաղէկի որդիները իր քով ժողվեց, և գնաց Իսրայէլը զարկաւ ու Արմաւենեաց քաղաքին տիրեց: 14Եւ Իսրայէլի որդիները Մովաբի Էգղոն թագաւորին տասնութ տարի ծառայութիւն ըրին: 15Ու Իսրայէլի որդիները Տէրոջը աղաղակեցին, և Տէրը անոնց փրկիչ մը հանեց, Բենիամինեան Գերայի որդին Աւովդը որ ահեկագործ էր. ու Իսրայէլի որդիները անոր ձեռքով Մովաբի Էգղոն թագաւորին ընծայ ղրկեցին: 16Եւ Աւովդ մէկ կանգնաչափ երկայնութեամբ երկսայրի սուր մը շինեց իրեն, ու զանիկա լաթերուն տակէն իր աջ ազդրին վրայ կապեց: 17Եւ ընծան Մովաբի Էգղոն թագաւորին տարաւ. (ու Էգղոն խիստ գէր մարդ մըն էր.) 18Ու երբ ընծան տուաւ լմնցուց, ընծան կրող մարդիկը ետ ղրկեց: 19Եւ ինք Գաղգաղայի մօտ եղած քարահանքէն ետ դարձաւ ու ըսաւ, Ով թագաւոր, քեզի ծածուկ խօսք մը ունիմ. և անիկա ըսաւ, Լուռ կեցիր. ու բոլոր անոր քով եղողները դուրս ելան: 20Եւ Աւովդ անոր քով մօտեցաւ, ու անիկա նստեր էր իրեն յատկացեալ ամառնային վերնատանը մէջ. և Աւովդ անոր ըսաւ, Քեզի Աստուծոյ կողմանէ խօսք մը ունիմ. ու անիկա աթոռին վրայէն ելաւ: 21Եւ Աւովդ իր ձախ ձեռքը երկնցնելով սուրը իր աջ ազդրին վրայէն քաշեց ու անոր փորը խոթեց, 22Այնպէս որ երկաթին ետեւէն կոթն ալ ներս մտաւ. ու գիրուցը երկաթը բռնեց, այնպէս որ սուրը անոր փորէն չկրցաւ հանել, ու աղբը դուրս ելաւ: 23Եւ Աւովդ սրահն ելաւ ու վերնատանը դռները անոր վրայէն գոցեց ու կղպեց. 24Եւ ինք ելաւ գնաց: Ու անոր ծառաները գացին նայեցան որ ահա վերնատանը դռները կղպուած էին. ու ըսին, Անիկա անտարակոյս իր ամառնային սենեակին մէջ հարկաւորութեան գացած է: 25Եւ անոնք սպասեցին` մինչև որ ամչցան, բայց ահա վերնատանը դռները չէր բանար. ու բանալին առին բացին, և ահա իրենց տէրը գետնի վրայ ինկած մեռած էր: 26Ու քանի որ անոնք կը տնտնային` Աւովդ փախաւ, և քարահանքէն անցնելով ողջ առողջ Սէիրա հասաւ: 27Ու երբ հասաւ, Եփրեմի լեռանը վրայ փող հնչեցուց, և Իսրայէլի որդիները անոր հետ այն լեռնէն վար իջան, ու ինք անոնց առջեւէն կ’երթար: 28Եւ անոնց ըսաւ, Իմ ետեւէս եկէք, քանզի Տէրը ձեր թշնամիները, Մովաբացիները, ձեր ձեռքը տուաւ. ուստի անոր ետեւէն իջան, և Մովաբի առջեւէն Յորդանանու անցքերը բռնեցին, ու թող չտուին որ մարդ մը անցնի: 29Եւ այն ժամանակ Մովաբէ տասը հազարի չափ մարդ կոտրեցին, որոնց ամէնն ալ յաղթանդամ ու զօրաւոր մարդիկ էին. և մէ՛կը չկրցաւ փախչիլ: 30Ու այն օրը Մովաբ Իսրայէլի ձեռքին տակ նուաճեցաւ. ու երկիրը ութսուն տարի հանգստացաւ:

Սամեգար

31Եւ անկէ ետև Անաթի որդին Սամեգար ելաւ, ու եզներու խթանով մը Փղշտացիներէն վեց հարիւր մարդ կոտրեց. և ասիկա ալ Իսրայէլը ազատեց: