Գեդէօն Մադիանացիներուն կը յաղթէ

1Եւ Յերոբաաղ, այսինքն Գեդէօն, ու անոր հետ եղող բոլոր ժողովուրդը կանուխ ելան, Հարօդի աղբիւրին քով բանակեցան. ու Մադիամու բանակը անոր հիւսիսային կողմը, դէպ ի Մօրէի բլուրը, հովիտին մէջ էր: 2Եւ Տէրը ըսաւ Գեդէօնի, Քեզի հետ եղող ժողովուրդը շատ է. չեմ ուզեր Մադիամը անոնց ձեռքը տալ, չըլլայ որ Իսրայէլ ինծի դէմ պարծենայ ու ըսէ թէ իմ ձեռքս զիս ազատեց: 3Ուստի հիմա քարոզ կարդալ տաս որպէս զի ժողովուրդը լսէ, ու ըսես, Ով որ վատասիրտ ու երկչոտ է, թող ետ դառնայ, և շուտով Գաղաադ լեռնէն երթայ. ու ժողովուրդէն քսանուերկու հազար հոգի ետ դարձան, ու տասը հազար մնացին: 4Եւ Տէրը ըսաւ Գեդէօնի, Ժողովուրդը տակաւին շատ է. ջուրին քով իջեցուր զանոնք, ու հոն քեզի համար զանոնք փորձեմ. և որո՛ւ համար քեզի ըսեմ թէ Ատիկա քեզի հետ երթայ, անիկա քեզի հետ թող երթայ. ու որո՛ւ համար քեզի ըսեմ թէ Ատիկա քեզի հետ չերթայ, անիկա թող չերթայ: 5Ուստի ժողովուրդը ջուրին քով իջեցուց. և Տէրը Գեդէօնի ըսաւ, Ով որ շունի լափելուն պէս ջուրը լեզուովը լափէ, զանիկա զատ կայնեցնես. ու ով որ խմելու համար իր ծունկերուն վրայ ծռի, զանիկա ալ զատ կայնեցնես: 6Եւ ձեռքը բերանը տանելով լափողներուն թիւը երեք հարիւր մարդ էր, և բոլոր մնացած ժողովուրդը իրենց ծունկերուն վրայ ծռեցան ջուր խմելու համար: 7Ու Տէրը Գեդէօնի ըսաւ, Այն երեք հարիւր մարդոցմով, որոնք ջուրը լափեցին, ձեզ պիտի ազատեմ, և Մադիամը քու ձեռքդ պիտի մատնեմ. ու բոլոր մնացած ժողովուրդը, ամէն մարդ, իր տեղը երթայ: 8Ուստի ժողովուրդը իրենց ձեռքը պաշար առին և իրենց փողերն ալ: Եւ Գեդէօն Իսրայէլի բոլոր մարդիկը, ամէն մէկը, իր վրանը ղրկեց, բայց այն երեք հարիւր մարդը իր քով պահեց. ու Մադիամու բանակը անոր տակ հովիտին մէջ էր: 9Եւ նոյն գիշերը Տէրը անոր ըսաւ, Ոտք ելիր ու ասկէ բանակը իջիր, քանզի զանիկա քու ձեռքդ մատնեցի: 10Եւ եթէ դուն իջնելու կը վախնաս, նախ դուն քու ծառայիդ Փուրայի հետ բանակը իջիր. 11Եւ պիտի լսես թէ անոնք ի՛նչ կը խօսին. անկէ ետև քու ձեռքերդ պիտի ուժովնան, որպէս զի բանակը իջնես: Ուստի ինք և իր ծառան Փուրա բանակին մէջի գունդերուն ծայրը իջան: 12Ու Մադիամ և Ամաղէկ ու բոլոր արեւելցիները մարախներու պէս բազմութեամբ հովիտին մէջ պառկեր էին, և անոնց ուղտերը անթիւ էին, ու ծովուն եզերքը եղող աւազին չափ շատ էին: 13Եւ Գեդէօն հոն երթալով` լսեց որ մարդ մը իր ընկերին երազ կը պատմէր ու կ’ըսէր, Ես երազ մը տեսայ, և ահա գարեղէն հաց մը դէպ ի Մադիամու բանակը կը գլորուէր, և վրանին հասնելով զանիկա զարկաւ որ ինկաւ, ու գլխիվար դարձուց, և վրանը ինկաւ: 14Ու անոր ընկերը պատասխան տուաւ և ըսաւ, Ատիկա ուրիշ բան չէ, բայց միայն Իսրայելացի Յովասի որդւոյն Գեդէօնի սուրը. Աստուած Մադիամը ու բոլոր բանակը անոր ձեռքը մատներ է: 15Ու երբ Գեդէօն երազին պատմութիւնը ու անոր մեկնութիւնը լսեց, Տէրոջը երկրպագութիւն ըրաւ, և Իսրայէլի բանակը դարձաւ ու ըսաւ. Ոտք ելէք, քանզի Տէրը Մադիամու բանակը ձեր ձեռքը տուեր է: 16Եւ այն երեք հարիւր մարդը երեք գունդի բաժնելով, ամէնուն ձեռքը փողեր ու պարապ սափորներ տուաւ, և սափորներուն մէջ ալ ջահեր դրաւ. 17Ու անոնց ըսաւ, Ինծի նայեցէք և այնպէս ըրէք. ու երբ բանակին եզերքը հասնիմ, ես ի՛նչպէս որ ընեմ, դուք ալ այնպէս ընէք: 18Ու երբ ես ու բոլոր ինծի հետ եղողները փողը հնչեցնենք, այն ատեն դուք ալ բոլոր բանակին չորս կողմը փողերը հնչեցուցէք, և ըսէք, Տէրոջը ու Գեդէօնի սուրը: 19Եւ Գեդէօն ու անոր հետ եղող հարիւր մարդը կէս գիշերուան պահուն սկիզբը, երբ պահապանները նոր դրած էին, բանակին եզերքը հասան, և փողերը հնչեցնելով ձեռքերնուն մէջ եղած սափորները կոտրտեցին: 20Այն ատեն երեք գունդն ալ փողերը հնչեցուցին ու սափորները կոտրտեցին, ու ձախ ձեռքով ջահերը, ու աջ ձեռքով փողերը բռնելով հնչեցնելու համար կը պոռային ու կ’ըսէին, Տէրոջը ու Գեդէօնի սուրը: 21Եւ ամէն մարդ բանակին բոլորտիքը իր տեղը կայներ էր. ու բոլոր բանակը վազելով և աղաղակելով կը փախչէին: 22Ու երբ այն երեք հարիւր մարդը իրենց փողերը հնչեցուցին, Տէրը բոլոր բանակին մէջ ամէն մարդուն սուրը իր ընկերին վրայ դարձուց. և զօրքը մինչև Բեթասետա դէպ ի Սարերա, ու մինչև Աբէլմաուլայի սահմանը և Տաբէթ փախաւ: 23Եւ Իսրայելացիք Նեփթաղիմէ, Ասերէ և բոլոր Մանասէէ ժողվուեցան, ու Մադիանացւոց ետեւէն ինկան: 24Եւ Գեդէօն Եփրեմի բոլոր լեռնակողմը պատգամաւորներ ղրկեց` ըսելով, Մադիանացիները դիմաւորելու իջէք, և անոնց առջեւէն ջուրերը բռնեցէք մինչև Բեթբարա, նաև Յորդանանը: Ուստի Եփրեմի բոլոր մարդիկը ժողվուեցան, ու ջուրերը բռնեցին մինչև Բեթբարա, նաև Յորդանանը: 25Եւ Մադիամու երկու իշխանները, Օրէբը ու Զէբը, բռնեցին. Օրէբը Օրէբի վէմին քով մեռցուցին, ու Զէբը Զէբի հնձանին քով մեռցուցին. և Մադիանացիները հալածեցին, ու Օրէբի և Զէբի գլուխները Գեդէօնի բերին Յորդանանու անդիի կողմէն: