Երուսաղէմին անկումը

1Յուդայի Սեդեկիա թագաւորին իններորդ տարին տասներորդ ամիսը, Բաբելոնի Նաբուգոդոնոսոր թագաւորը իր բոլոր զօրքովը Երուսաղէմ եկաւ, ու զանիկա պաշարեցին: 2Սեդեկիայի մետասաներորդ տարին չորրորդ ամիսը, ամսուն իննին քաղաքին պարիսպը ճեղքուեցաւ: 3Եւ Բաբելոնի թագաւորին բոլոր իշխանները, այսինքն Ներգեղսա-րասար, Սամեգարնաբաւ, Սարսեքիմ ներքինապետը, Ներգեղսարասար մոգա-պետը*, ու Բաբելոնի թագաւորին բոլոր մնացած իշխանները եկան միջին դուռը նստան: 4Ու երբ Յուդայի Սեդեկիա թագաւորը ու բոլոր պատերազմական մարդիկը զանոնք տեսան, փախան ու քաղաքէն գիշերով թագաւորի պարտէզին ճամբայովը երկու պարսպին մէջի դռնէն ելան. ու ինք դաշտի ճամբան ելաւ: 5Եւ Քաղդէացւոց զօրքը անոնց ետևէն ինկան, ու Երիքովի դաշտերուն մէջ Սեդեկիայի հասան և զանիկա բռնեցին, ու Եմաթի երկիրը, Ռեբղայի մէջ, Բաբելոնի Նաբուգոդոնոսոր թագաւորին առջև հանեցին, որ անոր դատաստանը տեսաւ: 6Եւ Բաբելոնի թագաւորը Ռեբղայի մէջ Սեդեկիայի տղաքը անոր աչքերուն առջև մորթեց. ու Բաբելոնի թագաւորը Յուդայի բոլոր ազնուականները մորթեց: 7Եւ Սեդեկիայի աչքերը կուրացուց, ու զանիկա շղթաներով կապեց որպէս զի Բաբելոն տանի: 8Եւ Քաղդէացիք կրակով այրեցին թագաւորին տունը ու ժողովուրդին տուները, ու Երուսաղէմի պարիսպները փլցուցին: 9Եւ Նաբուզարդան դահճապետը քաղաքին մէջ մնացած ժողովուրդին մնացորդը, ու իրեն ինկած փախստականները, և ժողովուրդին ուրիշ մնացորդները Բաբելոն գերի տարաւ: 10Ու Նաբուզարդան դահճապետը Յուդայի երկրին մէջ թողուց ժողովուրդին աղքատներէն` որոնք բան մը չունէին, և նոյն օրը անոնց այգիներ ու արտեր տուաւ:

Երեմիա վերստին կ’ազատի

11Ու Բաբելոնի Նաբուգոդոնոսոր թագաւորը Երեմիայի համար Նաբուզարդան դահճապետին պատուիրեց ու ըսաւ, 12Զանիկա առ և աչքդ անոր վրայ ըլլայ, ու անոր ամենևին չարիք մի հասցներ, հապա ինչ որ քեզի ըսէ` անոր այսպէս ըրէ: 13Եւ Նաբուզարդան դահճապետը ու Նաբուսազարան ներքինապետը ու Ներգեղսարասար մոգապետը և Բաբե-լոնի թագաւորին բոլոր նախարարները մարդ ղրկեցին, 14Ու Երեմիան բանտին գաւիթէն առին, ու զանիկա Սափանի որդւոյն Աքիկամի որդւոյն Գոդողիայի տուին, որպէս զի զանիկա տունը տանի. ու անիկա ժողովուրդին մէջ բնակեցաւ:

Աբդեմելէքին համար յոյս

15Եւ Տէրոջը խօսքը եղաւ Երեմիայի, երբ անիկա բանտին գաւիթին մէջ արգիլուած էր, ըսելով, 16Գան Եթէովպացի Աբդեմելէքի խօսէ ու ըսէ, Զօրաց Տէրը, Իսրայէլի Աստուածը, այսպէս կ’ըսէ. Ահա ես այս քաղաքին վրայով ըսած խօսքերս ի գործ պիտի դնեմ` չարիքի և ոչ թէ բարիքի համար. ու այն օրը քու աչքերուդ առջև պիտի կատարուին: 17Եւ այն օրը քեզ պիտի ազատեմ, կ’ըսէ Տէրը, ու պիտի չտրուիս այն մարդոց ձեռքը` որոնց երեսէն դուն կը վախնաս: 18Վասն զի քեզ անշուշտ պիտի ազատեմ, ու սրով պիտի չիյնաս. և քու կեանքդ քեզի աւարի մը պէս պիտի ըլլայ, քանզի ինծի ապաւինեցար, կ’ըսէ Տէրը: