Երեմիա Գոդողիային քով կը մնայ

1Այն խօսքը որ Տէրոջը կողմանէ Երեմիայի եղաւ, Նաբուզարդան դահճապետին զանիկա Ռամայէ արձակելէն ետքը. (երբ Բաբելոն տարուող Երուսաղէմի ու Յուդայի բոլոր գերիներուն մէջ զանիկա ալ շղթաներով կապած առեր էր:) 2Եւ դահճապետը Երեմիան առնելով` անոր ըսաւ, Քու Տէր Աստուածդ այս տեղին վրայ այս չարիքը խօսած է. 3Ու Տէրը զանիկա բերաւ ու իր ըսածին պէս ըրաւ, քանզի Տէրոջը դէմ մեղք գործեցիք և անոր ձայնին մտիկ չըրիք. ու այս բանը ձեզի եղաւ: 4Եւ հիմա ահա այսօր քու ձեռքերուդ շղթաները քակեցի եթէ ինծի հետ Բաբելոն երթալը քու աչքիդ առջև աղէկ է` եկուր, ու իմ աչքս քու վրադ պիտի ըլլայ. բայց եթէ ինծի հետ Բաբելոն երթալը քու աչքիդ գէշ կ’երևնայ` զանց ըրէ, ահա բոլոր երկիրը քու առջևդ է, ուր որ քեզի աղէկ ու հաճոյ կ’երևնայ երթալու` հոն գնա: 5Ուստի կամ Բաբելոնի թագաւորին Յուդայի քաղաքներուն վրայ դրած Սափանի որդւոյն Աքիկամի որդին Գոդողիա դեռ ետ չդարձած` անոր գնա ու անոր հետ ժողովուրդին մէջ բնակէ, և կամ ուր որ քեզի աղէկ կ’երևնայ երթալ` հոն գնա. ու դահճապետը անոր պաշարներ ու պարգև տուաւ և զանիկա արձակեց: 6Ու Երեմիա Մասփա գնաց Աքիկամի որդւոյն Գոդողիայի, և անոր հետ երկրին մէջ մնացած ժողովուրդին մէջտեղ բնակեցաւ:

Գոդողիա Յուդայի կառավարիչ

7Ու դաշտը եղող բոլոր զօրավարները, իրենք ու իրենց մարդիկը, երբ լսեցին թէ Բաբելոնի թագաւորը Աքիկամի որդին Գոդողիան երկրին վրայ դրաւ, և Բաբելոն չքշուած մարդիկը ու կիները և տղաքները ու երկրին աղքատները անոր յանձնեց, 8Մասփա եկան Գոդողիայի. այսինքն Նաթանիայի որդին Իսմայէլ, ու Կարէի որդիները, Յօհանան ու Յովնաթան, և Թանհումէթի որդին Սարայիա, ու Նետոփաթացի Եփայի որդիները ու Մաքաթիի որդին Յեղոնիա` թէ՛ իրենք և թէ՛ իրենց մարդիկը: 9Եւ Սափանի որդւոյն Աքիկամի որդին Գոդողիա անոնց ու անոնց մարդոցը երդում ըրաւ ու ըսաւ, Քաղդէացւոց ծառայութիւն ընելէն մի վախնաք. այս երկրին մէջ բնակեցէք և Բաբելոնի թագաւորին ծառայութիւն ըրէք, ու ձեզի աղէկ պիտի ըլլայ: 10Եւ ես ահա Մասփայի մէջ կը բնակիմ, որպէս զի մեզի եկող Քաղդէացիներուն առջև կենամ. ու դուք գինի և ամառնային պտուղ ու իւղ ժողվեցէք, ու ձեր ամաններուն մէջ դրէք, և ձեռքերնուդ տակ եղած քաղաքներուն մէջ բնակեցէք: 11Ու Մովաբի մէջ և Ամմոնի որդիներուն մէջ ու Եդովմի մէջ և ամէն երկիրներու մէջ եղող բոլոր Հրեաներն ալ երբ լսեցին, որ Բաբելոնի թագաւորը Հրէաստանի մէջ մնացորդ թողուցեր է, ու անոնց վրայ Սափանի որդւոյն Աքիկամի որդին Գոդողիան դրեր է, 12Բոլոր Հրեաները ամէն իրենց ցրուած տեղերէն դարձան, ու Յուդայի երկիրը Մասփա Գոդողիայի եկան, և խիստ շատ գինի ու ամառնային պտուղներ ժողվեցին:

Գոդողիան կը սպաննուի

13Եւ Կարէի որդին Յօհանան ու դաշտը եղող բոլոր զօրավարները Մասփա եկան Գոդողիայի, 14Ու անոր ըսին, Գիտե՞ս որ Ամմոնի որդիներուն թագաւորը Բաալիս` Նաթանիայի որդին Իսմայէլը ղրկեց քեզ մեռցնելու համար. բայց Աքիկամի որդին Գոդողիա անոնց չհաւատաց: 15Եւ Կարէի որդին Յօհանան Մասփայի մէջ Գոդողիայի հետ գաղտուկ խօսեցաւ ու ըսաւ, Հիմա երթամ ու Նաթանիայի որդին Իսմայէլը զարնեմ, ու մարդ չիմանայ. ինչո՞ւ անիկա քեզ մեռցնէ, ու քովդ ժողվուած բոլոր Հրեաները ցրուին, և Յուդայի մնացորդը կորսուի: 16Ու Աքիկամի որդին Գոդողիա Կարէի որդւոյն Յօհանանի ըսաւ, Այդ բանը մի ըներ, վասն զի դուն Իսմայէլի վրայով սուտ կը խօսիս: