Երեմիա Եգիպտոս կը տարուի

1Երբ Երեմիա բոլոր ժողովուրդին` անոնց Տէր Աստուծոյն բոլոր խօսքերը խօսիլը լմնցուց, որոնց համար անոնց Տէր Աստուածը զանիկա անոնց ղրկեր էր, այսինքն այս բոլոր խօսքերը, 2Այն ատեն Ովսէիայի որդին Ազարիա ու Կարէի որդին Յօհանան և բոլոր ամբարտաւան մարդիկը Երեմիայի խօսեցան ու ըսին, Դուն սուտ կը խօսիս. մեր Տէր Աստուածը քեզ չղրկեց որ մեզի ըսես թէ Եգիպտոս մի մտնէք հոն պանդխտանալու համար. 3Հապա Ներիայի որդին Բարուք քեզ մեզի դէմ ոտք կը հանէ, որպէս զի մեզ Քաղդէացւոց ձեռքը տայ, որ մեզ մեռցնեն ու մեզ Բաբելոնի գերի տանին: 4Եւ Կարէի որդին Յօհանան ու բոլոր զօրավարները և բոլոր ժողովուրդը Տէրոջը ձայնը մտիկ չըրին, որ Յուդայի երկրին մէջ բնակին. 5Հապա Կարէի որդին Յօհանան ու բոլոր զօրավարները Յուդայի բոլոր մնացորդները առին, որոնք Յուդայի երկրին մէջ բնակելու համար ետ դարձեր էին այն բոլոր ազգերէն` ուր ցրուած էին. 6Այսինքն այր մարդիկ ու կիները, և տղաքները, ու թագաւորին աղջիկները, և Նաբուզարդան դահճապետին` Սափանի որդւոյն Աքիկամի որդւոյն Գոդողիայի քով թողուած բոլոր մարդիկը, ու Երեմիա մարգարէն, և Ներիայի որդին Բարուքը. 7Ու Եգիպտոսի երկիրը գացին. վասն զի Տէրոջը ձայնը մտիկ չըրին, ու մինչև Տափնաս եկան: 8Եւ Տափնասի մէջ Տէրոջը խօսքը եղաւ Երեմիայի` ըսելով, 9Ձեռքդ մեծ քարեր առ, ու զանոնք Յուդայի մարդոցը աչքերուն առջև Տափնաս եղող` Փարաւոնի տանը դրանը առջևի աղիւսատունը կաւին մէջ թաղէ, 10Եւ անոնց ըսէ, Զօրաց Տէրը, Իսրայէլի Աստուածը, այսպէս կ’ըսէ. Ահա ես պիտի ղրկեմ, ու իմ ծառաս Բաբելոնի Նաբուգոդոնոսոր թագաւորը պիտի առնեմ, և անոր աթոռը այս իմ թաղած քարերուս վրայ պիտի դնեմ. ու անիկա իր արքայական խորանը անոնց վրայ պիտի տարածէ. 11Եւ պիտի գայ Եգիպտոսի երկիրը պիտի զարնէ. մահուան համար եղողները մահուան, գերութեան համար եղողները գերութեան, և սուրի համար եղողները սուրի պիտի մատնէ: 12Ու Եգիպտոսի աստուածներուն տուներուն մէջ կրակ պիտի բռնկցնեմ. և անիկա զանոնք պիտի այրէ ու զանոնք գերի պիտի տանի. և անիկա Եգիպտոսի երկիրը պիտի հագնի, ինչպէս հովիւը իր հանդերձը կը հագնի. ու անկէ խաղաղութեամբ պիտի ելլէ: 13Ու Եգիպտոսի երկրին մէջ եղող արևու տանը արձանները պիտի կոտրտէ, ու Եգիպտոսի աստուածներուն տուները կրակով պիտի այրէ: