Երուսաղէմի անկումը

1Սեդեկիա քսանըմէկ տարեկան էր երբ թագաւոր եղաւ, ու Երուսաղէմի մէջ տասնըմէկ տարի թագաւորութիւն ըրաւ. և անոր մօրը անունը Ամիտաղ էր ու Լեբնացի Երեմիայի աղջիկն էր, 2Եւ անիկա Յովակիմի բոլոր ըրածին պէս Տէրոջը առջև չարութիւն ըրաւ 3Քանզի Տէրոջը բարկութիւնը Երուսաղէմի ու Յուդայի վրայ էր, մինչև զանոնք իր երեսէն ձգէ անոր համար Սեդեկիա Բաբելոնի թագաւորէն ապստամբեցաւ: 4Ու եղաւ որ անոր թագաւորութեանը իններորդ տարին տասներորդ ամիսը, ամսուն տասներորդ օրը, Բաբելոնի Նաբուգոդոնոսոր թագաւորը իր բոլոր զօրքովը Երուսաղէմի վրայ եկաւ, ու անոր դիմաց բանակեցաւ, և անոր դէմ շուրջանակի պատնէշներ շինեցին. 5Ու մինչև Սեդեկիա թագաւորին մետասաներորդ տարին քաղաքը պաշարման մէջ էր: 6Եւ չորրորդ ամսուն մէջ, ամսուն իննին, քաղաքին մէջ սաստիկ սով կար, ու երկրին ժողովուրդը հաց չունէր. 7Եւ քաղաքին պարիսպը ճեղքուեցաւ, ու բոլոր պատերազմողները փախան, և գիշերով թագաւորի պարտէզին քով եղող երկու պարսպին մէջի դրանը ճամբայով քաղաքէն ելան. ու Քաղդէացիք քաղաքին բոլորտիքը կեցեր էին. ու անոնք դաշտի ճամբայէն գացին. 8Եւ Քաղդէացւոց զօրքը թագաւորին ետևէն ինկան ու Երիքովի դաշտերուն մէջ Սեդեկիայի հասան, և անոր բոլոր զօրքը անոր քովէն ցրուեցաւ. 9Ու թագաւորը բռնեցին, ու զանիկա Բաբելոնի թագաւորին Ռեբղա տարին Եմաթի երկրին մէջ, և անոր դատաստանը տեսաւ: 10Ու Բաբելոնի թագաւորը Սեդեկիայի տղաքները անոր աչքերուն առջև մորթեց. Յուդայի բոլոր իշխաններն ալ Ռեբղայի մէջ մորթեց. 11Եւ Սեդեկիայի աչքերը կուրացուց ու զանիկա շղթաներով կապեց, և Բաբելոնի թագաւորը զանիկա Բաբելոն տարաւ, ու զանիկա մինչև իր մահուան օրը բանտի մէջ պահեց:

Տաճարին կործանումը

12Եւ Բաբելոնի թագաւորին, Նաբուգոդոնոսոր թագաւորին, տասնըիններորդ տարին հինգերորդ ամիսը, ամսուն տասնին, Բաբելոնի թագաւորին առջև կայնող Նաբուզարդան դահճապետը Երուսաղէմի մէջ մտաւ. 13Ու Տէրոջը տունը և թագաւորին տունը այրեց, ու Երուսաղէմի բոլոր տուները ու ամէն մեծ տուները կրակով այրեց: 14Եւ դահճապետին հետ եղող Քաղդէացւոց բոլոր զօրքերը Երուսաղէմի բոլոր շրջակայ պարիսպները փլցուցին. 15Ու ժողովուրդին աղքատներէն, և քաղաքին մէջ մնացած ժողովուրդին մնացորդը, ու Բաբելոնի թագաւորին իյնող փախստականները, ու մնացած բազմութիւնը Նաբուզարդան դահճապետը գերի տարաւ: 16Եւ Նաբուզարդան դահճապետը երկրին աղքատներէն թողուց այգեգործներ ու երկրագործներ ըլլալու համար: 17Եւ Քաղդէացիք Տէրոջը տանը մէջ եղող պղնձէ սիւները ու մեքենովթները, ու Տէրոջը տանը մէջ եղող պղնձէ ծովը կտոր կտոր ըրին, ու անոնց բոլոր պղինձը Բաբելոն տարին: 18Եւ թաղարները ու թիակները և բազմակալները ու կոնքերը և խնկամանները ու պաշտօնի համար գործածուած բոլոր պղնձէ անօթները առին: 19Եւ գաւաթները ու բուրվառները և կոնքերը ու թաղարները և աշտանակները ու խնկամանները և բաժակները առաւ դահճապետը, ինչ որ ոսկիէ էր` իբրև ոսկի, ու ինչ որ արծաթէ էր` իբրև արծաթ. 20Նաև Սողոմոն թագաւորին` Տէրոջը տանը համար շինած երկու սիւները, մէկ ծովը ու մեքենովթներուն տեղ եղած տասուերկու պղնձէ եզները* բոլոր այս գործիքներուն պղինձը կշիռքի չէր գար: 21Եւ սիւներէն մէկուն բարձրութիւնը տասնըութ կանգուն էր, ու անոր շրջապատը տասուերկու կանգուն էր, և անոր թանձրութիւնը չորս մատնաչափ էր ու մէջը պարապ էր. 22Եւ անոր վրայ պղնձէ խոյակ կար. ու մէկ խոյակին բարձրութիւնը հինգ կանգուն էր, և խոյակին վրայ շուրջանակի ցանցակերպ զարդ ու նուռեր կային, ամէնն ալ պղնձէ էին. միւս սիւնն ալ նուռերով այնպէս էր: 23Ու նուռերը ամէն կողմէն իննսունըվեց էին, ու ցանցակերպ զարդին վրայ շուրջանակի բոլոր նուռերը հարիւր էին:

Յուդայի ժողովուրդը Բաբելոն կը տարուի

24Եւ դահճապետը առաջին քահանան Սարայիան ու երկրորդ քահանան Սոփոնիան ու դրան երեք պահապանները առաւ. 25Եւ քաղաքէն ներքինի մը առաւ, որ պատերազմող մարդոց զօրագլուխն էր. ու քաղաքին մէջ գտնուած` թագաւորին առջև կայնողներէն* եօթը մարդ, ու երկրին ժաղովուրդը զինուորութեան գրող զօրքին մեծ գրագիրը, և քաղաքին մէջ գտնուած երկրին ժողովուրդէն վաթսուն մարդ առաւ: 26Ու Նաբուզարդան դահճապետը զանոնք առաւ ու Բաբելոնի թագաւորին` Ռեբզա տարաւ: 27Եւ Բաբելոնի թագաւորը զանոնք զարկաւ, ու Եմաթի երկրին Ռեբզային մէջ զանոնք մեռցուց: Այսպէս Յուդա իր երկրէն գերի տարուեցաւ: 28Նաբուգոդոնոսորի գերի քշած ժողովուրդը ասիկա է. եօթներորդ տարին երեք հազար քսանուիրեք Հրեայ. 29Նաբուգոդոնոսորի տասնըութերորդ տարին` Երուսաղէմէ ութ հարիւր երեսունուերկու հոգի. 30Նաբուգոդոնոսորի քսանուիրեքերորդ տարին Նաբուզարդան դահճապետը Հրեաներէն եօթը հարիւր քառասունըհինգ հոգի գերի քշեց. ամէնը չորս հազար վեց հարիւր հոգի էր: 31Ու եղաւ որ Յուդայի Յովաքին թագաւորին գերութեանը երեսունեօթներորդ տարին երկոտասաներորդ ամիսը, ամսուն քսանըհինգերորդ օրը, Բաբելոնի Եղմարովդաք թագաւորը իր թագաւոր եղած տարին, Յուդայի Յովաքին թագաւորին գլուխը բարձրացուց, ու զանիկա բանտէն հանեց. 32Եւ անոր հետ քաղցրութեամբ խօսեցաւ, ու անոր աթոռը Բաբելոնի մէջ իրեն հետ եղող թագաւորներուն աթոռէն վեր դրաւ. 33Եւ անոր բանտի լաթերը փոխեց. ու անիկա իր կեանքին բոլոր օրերուն մէջ միշտ անոր առջև հաց կ’ուտէր. 34Եւ անոր ռոճիկը մշտատև ռոճիկ ըլլալով, անոր կեանքին բոլոր օրերուն մէջ մինչև անոր մահուան օրը Բաբելոնի թագաւորին կաղմէն օրէ օր անոր կը տրուէր: