Յիսուս ճշմարիտ որթը

1Ես եմ ճշմարիտ որթը, և իմ Հայրս մշակն է։ 2Ամէն ճիւղ որ իմ վրաս է ու պտուղ չբերեր, կը կտրէ զանիկա, և ամէնը որ պտուղ կը բերէ, կը մաքրէ զանիկա, որպէս զի ալ աւելի պտուղ բերէ։ 3Դուք հիմակուընէ մաքուր էք այն խօսքով զոր ձեզի խօսեր եմ։ 4Իմ մէջս կեցէք, ու ես ձեր մէջ. ինչպէս ճիւղը չկրնար ինքիրմէ պտուղ բերէլ, եթէ որթին վրայ հաստատուած չըլլայ, նոյնպէս դուք չեք կրնար, եթէ իմ վրաս հաստատուած չըլլաք։ 5Ես որթն եմ ու դուք ճիւղերն էք. ան որ իմ վրաս հաստատուած է՝ և ես անոր վրայ, անիկա շատ պտուղ կը բերէ, վասն զի առանց ինծի բան մը չէք կրնար ընել։ 6Եթէ մէկը իմ վրաս հաստատուած չէ, անիկա ճիւղի մը պէս դուրս ձգուած ու չորցած է. և կը ժողվեն զանոնք ու կրակը կը նետեն, ու կ’այրին։ 7Եթէ դուք իմ մէջս կենաք, և իմ խօսքերս ալ ձեր մէջ կենան, ինչ որ ուզէք՝ պիտի խնդրէք, ու պիտի ըլլայ ձեզի։ 8Ասով իմ Հայրս փառաւորուեցաւ, որպէս զի դուք շատ պտուղ բերէք, ու իմ աշակերտներս ըլլաք։ 9Ինչպէս Հայրը զիս սիրեց, ես ալ ձեզ սիրեցի. իմ սիրոյս մէջ հաստատ կեցէք։ 10Եթէ իմ պատուէրներս պահէք, իմ սիրոյս մէջ պիտի կենաք. ինչպէս ես իմ Հօրս պատուէրները պահեցի, և անոր սիրոյն մէջ կեցեր եմ։ 11Այս բաները ձեզի խօսեցայ, որպէս զի իմ ուրախութիւնս ձեր մէջ մնայ, ու ձեր ուրախութիւնը լման ըլլայ։ 12Այս է իմ պատուէրս որ մէկզմէկ սիրէք, ինչպէս ես ձեզ սիրեցի։ 13Ասկէ աւելի մեծ սէր մէ՛կը չկրնար ունենալ, որ մէկը իր կեանքը բարեկամներուն համար դնէ։ 14Դուք իմ բարեկամներս էք, եթէ ընելու ըլլաք ինչ որ ես ձեզի կը պատուիրեմ։ 15Ասկէ ետքը ձեզ ծառայ չեմ անուաներ, վասն զի ծառան չգիտեր իր տէրը ի՛նչ կ’ընէ. հապա ես ձեզ բարեկամ անուանեցի, վասն զի այն ամէն բաները զորոնք իմ Հօրմէս լսեցի, ձեզի իմացուցի։ 16Ոչ թէ դուք զիս ընտրեցիք, հապա ես ձեզ ընտրեցի, ու դրի ձեզ որպէս զի դուք երթաք և պտուղ բերէք, ու ձեր պտուղը մնայ. որպէս զի իմ անունովս ինչ որ Հօրմէն խնդրէք, ձեզի տայ։ 17Զայս կը պատուիրեմ ձեզի որ մէկզմէկ սիրէք։

Աշխարհի ատելութիւնը

18Եթէ աշխարհ ձեզ կ’ատէ, գիտցէք որ ձեզմէ առաջ զիս ատեց։ 19Եթէ աշխարհէ եղած ըլլայիք, աշխարհ իրենները կը սիրէր. բայց որովհետև աշխարհէ չէք, հապա ես ձեզ աշխարհէ ընտրեցի, անոր համար աշխարհ ձեզ կ’ատէ։ 20Միտքերնիդ բերէք այն խօսքը զոր ձեզի ըսի թէ Ծառան իր տէրոջմէն մեծ չէ. եթէ զիս հալածեցին, ձեզ ալ պիտի հալածեն. եթէ իմ խօսքս պահեցին, ձերն ալ պիտի պահեն։ 21Բայց այս ամէն բաները պիտի ընեն ձեզի իմ անուանս համար, վասն զի չճանչցան զանիկա որ զիս ղրկեց։ 22Եթէ ես եկած և անոնց խօսած չըլլայի, անոնք մեղք չէին ունենար. բայց հիմա իրենց մեղքին պատճառանք մը չունին։ 23Ան որ զիս կ’ատէ, իմ Հայրս ալ կ’ատէ։ 24Եթէ այն գործերը իրենց մէջ ըրած չըլլայի, զորոնք ուրիշ մէկը չէ ըրած, անոնք մեղք չէին ունենար. բայց հիմա տեսան, ու ատեցին զիս ալ իմ Հայրս ալ։ 25Սակայն այս եղաւ որպէս զի կատարուի այն խօսքը որ իրենց օրէնքին մէջ գրուած է թէ, Զուր տէղը զիս ատեցին։ 26Բայց երբ Մխիթարիչը գայ, զոր ես Հօրմէն ձեզի պիտի ղրկեմ, ճշմարտութեան Հոգին՝ որ Հօրմէն կելլէ, անիկա ինծի համար պիտի վկայէ. 27Եւ դուք ալ կը վկայէք, վասն զի սկիզբէն ի վեր ինծի հետ էք։