1Այս բաները ձեզի խօսեցայ որպէս զի չգայթակղիք։ 2Իրենց ժողովարաններէն դուրս պիտի ձգեն ձեզ. ու ժամանակ ալ պիտի գայ որ ամէն ով որ ձեզ սպաննէ, այնպէս պիտի սեպէ թէ Աստուծոյ պաշտօն կը մատուցանէ։ 3Եւ այս բաները ձեզի պիտի ընեն՝ անոր համար որ ոչ Հայրը ճանչցան, ոչ ալ զիս։ 4Բայց այս բաները ձեզի խօսեցայ, որպէս զի երբ ժամանակը գայ, միտքերնիդ բերէք թէ ես ըսի ձեզի. և այս բաները սկիզբէն չըսի ձեզի, վասն զի ես ձեզի հետ էի։

Սուրբ Հոգիին գործը

5Սակայն հիմա ես կ’երթամ զիս ղրկողին քով, և ձեզմէ մէ՛կն ալ չհարցներ ինծի թէ Ո՞ւր կ’երթաս։ 6Բայց որովհետև այս բաները ձեզի խօսեցայ, ձեր սիրտերը տրտմութիւնով լեցան։ 7Բայց ես ճշմարիտը կ’ըսեմ ձեզի. Աղէկ է ձեզի եթէ ես երթամ. քանզի եթէ ես չերթամ, Մխիթարիչը ձեզի չգար. հապա եթէ երթամ, զանիկա ձեզի կը ղրկեմ։ 8Եւ ինք երբ գայ, աշխարհը պիտի յանդիմանէ մեղքի համար և արդարութեան համար ու դատաստանի համար։ 9Մեղքի համար՝ որ ինծի չեն հաւատար. 10Արդարութեան համար՝ որ ես իմ Հօրս քով կ’երթամ, և ալ զիս չէք տեսներ. 11Եւ դատաստանի համար՝ որ այս աշխարհին իշխանը դատապարտուած է։ 12Ձեզի տակաւին շատ բաներ ունիմ ըսելու, բայց հիմա չէք կրնար տանիլ։ 13Իսկ երբ ինք ճշմարտութեան Հոգին գայ, ամէն ճշմարտութեան պիտի առաջնորդէ ձեզի. վասն զի ոչ թէ ինքիրմէ պիտի խօսի, հապա ինչ որ լսէ՝ զայն պիտի խօսի ու գալիքները ձեզի պիտի պատմէ։ 14Անիկա զիս պիտի փառաւորէ, վասն զի իմինէս պիտի առնէ ու ձեզի պատմէ։ 15Այն ամէն բաները զորոնք Հայրը ունի՝ իմս են. անոր համար ձեզի ըսի թէ իմինէս պիտի առնէ ու ձեզի պատմէ։ 16Քիչ մը ատենէն ա՛լ զիս պիտի չտեսնէք, և դարձեալ քիչ մը ատենէն զիս պիտի տեսնէք, քանզի ես Հօրը կ’երթամ։

Տխրութիւն և ուրախութիւն

17Ասոր համար աշակերտներէն ոմանք իրարու կ’ըսէին, Ի՞նչ է այս որ մեզի կ’ըսէ թէ Քիչ մը ատենէն ա՛լ զիս պիտի չտեսնէք, և դարձեալ քիչ մը ատենէն զիս պիտի տեսնէք, և, Քանզի ես Հօրը կ’երթամ։ 18Ու կ’ըսէին, Ի՞նչ պիտի ըլլայ այն Քիչ մըն ալը՝ զոր կ’ըսէ. չենք գիտեր ի՛նչ կը զրուցէ։ 19Իսկ Յիսուս գիտնալով որ կ’ուզեն իրեն հարցնել, ըսաւ անոնց, Ատո՞ր համար իրարու կը հարցնէք, որ ըսի թէ Քիչ մը ատենէն ա՛լ զիս պիտի չտեսնէք, և դարձեալ քիչ մը ատենէն զիս պիտի տեսնէք։ 20Ճշմարիտ ճշմարիտ կ’ըսեմ ձեզի, Դուք պիտի լաք ու ողբաք, բայց աշխարհ պիտի ուրախանայ. դուք պիտի տրտմիք, սակայն ձեր տրտմութիւնը ուրախութեան պիտի փոխուի։ 21Կին մը երբ ծնանելու վրայ է՝ տրտմութիւն կ’ունենայ, վասն զի իր ժամը հասած է. բայց երբ տղան ծնանի, ալ նեղութիւնը միտք չբերեր ուրախութենէն՝ որ աշխարհ մարդ մը ծնաւ։ 22Եւ յիրաւի դուք հիմա տրտմութիւն ունիք. բայց ես ձեզ նորէն պիտի տեսնեմ, և ձեր սիրտերը ուրախ պիտի ըլլան, ու ձեր ուրախութիւնը մէ՛կը ձեզմէ պիտի չհանէ։ 23Եւ այն օրը ինծի բան մը պիտի չհարցնէք։ Ճշմարիտ ճշմարիտ կ’ըսեմ ձեզի, որ իմ անունովս ինչ որ խնդրէք Հօրմէն, պիտի տայ ձեզի։ 24Մինչև հիմա իմ անունովս բա՛ն մը չխնդրեցիք. խնդրեցէք ու պիտի առնէք, որպէս զի ձեր ուրախութիւնը լման ըլլայ։

Աշխարհի վրայ յաղթութիւն

25Այս բաները առակներով խօսեցայ ձեզի. բայց ժամանակ պիտի գայ, որ ալ ձեզի առակներով պիտի չխօսիմ, հապա յայտնապէս Հօրը վրայով պիտի պատմեմ ձեզի։ 26Այն օրը իմ անունովս պիտի խնդրէք. և չեմ ըսեր ձեզի թէ ես ձեզի համար պիտի աղաչեմ Հօրը. 27Քանզի ինք Հայրը ձեզ կը սիրէ, վասն զի դուք զիս սիրեցիք և հաւատացիք թէ ես Աստուծմէ ելայ։ 28Հօրմէն ելայ ու աշխարհ եկայ. նորէն կը թողում աշխարհը և Հօրը կ’երթամ։ 29Ըսին անոր իր աշակերտները, Ահա հիմա յայտնապէս կը խօսիս, և առակ մըն ալ չես ըսեր։ 30Հիմա իմացանք որ ամէն բան գիտես, և բա՛ն մըն ալ պէտք չէ որ մէկը քեզի հարցնէ. ասով կը հաւատանք որ Աստուծմէ ելար։ 31Յիսուս պատասխան տուաւ անոնց ու ըսաւ, Հիմա կը հաւատա՞ք. 32Ահա ժամանակ պիտի գայ, ու եկած ալ է, որ ցիրուցան պիտի ըլլաք ամէն մէկը իր տեղը, ու զիս մինակ պիտի թողուք. բայց ես մինակ չեմ, վասն զի Հայրը ինծի հետ է։ 33Այս բաները ձեզի խօսեցայ, որպէս զի ինծմով խաղաղութիւն ունենաք. աշխարհի մէջ նեղութիւն պիտի ունենաք. բայց քաջասիրտ եղէք, ես աշխարհի յաղթեցի։