Յիսուս և Նիկոդեմոս

1Եւ փարիսեցիներէն մարդ մը կար Նիկոդեմոս անունով, որ Հրէից իշխան էր: 2Ասիկա գիշերով Յիսուսի քով եկաւ, և ըսաւ անոր, Ռաբբի, գիտենք որ դուն Աստուծմէ վարդապետ եկած ես, վասն զի մէ՛կը չկրնար ընել այդ հրաշքները զորոնք դուն կ’ընես, եթէ Աստուած իրեն հետ չըլլայ: 3Պատասխան տուաւ Յիսուս և ըսաւ անոր, Ճշմարիտ ճշմարիտ կ’ըսեմ քեզի, Եթէ մարդ մը նորէն չծնանի, չկրնար Աստուծոյ թագաւորութիւնը տեսնել: 4Նիկոդեմոս ըսաւ անոր, Ի՞նչպէս կրնայ մարդ մը ծնանիլ, որ ծերացած է. հնարաւո՞ր բան է որ նորէն իր մօրը որովայնը մտնէ ու ծնանի: 5Յիսուս պատասխան տուաւ, Ճշմարիտ ճշմարիտ կ’ըսեմ քեզի, Եթէ մարդ մը ջուրէն ու Հոգիէն չծնանի, չկրնար Աստուծոյ թագաւորութիւնը մտնել: 6Մարմինէն ծնածը մարմին է, ու Հոգիէն ծնածը հոգի է: 7Դուն մի զարմանար որ քեզի ըսի, Պէտք է ձեզի նորէն ծնանիլ: 8Հովը ուր որ ուզէ՝ կը փչէ, և անոր ձայնը կը լսես, բայց չես գիտեր ուրկէ՛ կու գայ կամ ո՛ւր կերթայ. այսպէս ալ է այն ամէնը որ Հոգիէն կը ծնանի: 9Պատասխան տուաւ Նիկոդեմոս ու ըսաւ անոր, Այդ ի՞նչպէս կրնայ ըլլալ: 10Պատասխան տուաւ Յիսուս ու ըսաւ անոր, Դուն Իսրայէլի մէջ վարդապետ մըն ես, և այս բաները չե՞ս գիտեր: 11Ճշմարիտ ճշմարիտ կ’ըսեմ քեզի, թէ ինչ որ գիտենք՝ կը խօսինք, և ինչ որ տեսանք՝ կը վկայենք, ու մեր վկայութիւնը չէք ընդունիր: 12Եթէ երկրաւոր բաները ձեզի զրուցեցի ու չէք հաւատար, ի՞նչպէս պիտի հաւատաք եթէ երկնաւոր բաները ձեզի զրուցեմ: 13Եւ մէ՛կը երկինք չելաւ. բայց անիկա միայն որ երկինքէն իջաւ, Որդին մարդոյ որ երկինքն է: 14Եւ ինչպէս Մովսէս անապատին մէջ օձը բարձրացուց, այնպէս պէտք է որ Որդին մարդոյ բարձրանայ: 15Որպէս զի ամէն ով որ անոր հաւատայ՝ չկորսուի, հապա յաւիտենական կեանք ունենայ: 16Վասն զի Աստուած այնպէս սիրեց աշխարհը, մինչև իր միածին Որդին տուաւ, որպէս զի ամէն ով որ անոր հաւատայ՝ չկորսուի, հապա յաւիտենական կեանք ունենայ: 17Վասն զի Աստուած իր Որդին չղրկեց աշխարհ, որպէս զի աշխարհը դատէ, հապա՝ որպէս զի աշխարհ անով փրկուի: 18Ան որ կը հաւատայ անոր՝ չդատապարտուիր. և ան որ չհաւատար՝ անիկա արդէն դատապարտուած է, վասն զի Աստուծոյ միածին Որդւոյն անուանը չհաւատաց: 19Եւ այս է դատապարտութիւնը, որ լոյսը աշխարհ եկաւ, ու մարդիկ խաւարը լոյսէն աւելի սիրեցին, քանզի իրենց գործերը չար էին: 20Վասն զի ամէն ով որ չար կը գործէ, անիկա լոյսը կ’ատէ. և լոյսին քով չգար, որպէս զի իր գործերը չյանդիմանուին: 21Բայց ան որ ճշմարտութիւն կը գործէ, լոյսին քով կու գայ, որպէս զի իր գործերը յայտնի ըլլան թէ Աստուծով գործուեցան:

Յիսուս և Յովհաննէս

22Այս բաներէն ետքը եկաւ Յիսուս և իր աշակերտները Հրէաստանի երկիրը, և հոն կը կենար անոնց հետ մէկտեղ, ու մկրտութիւն կ’ընէր: 23Յովհաննէս ալ Այենոնի մէջ Սաղիմի մօտ մկրտութիւն կ’ընէր, որովհետև հոն շատ ջուր կար, ու կու գային և կը մկրտուէին. 24Վասն զի Յովհաննէս դեռ բանտը դրուած չէր: 25Այն ատեն վիճաբանութիւն մը եղաւ Յովհաննէսի աշակերտներէն Հրեաներուն հետ՝ մաքրութեան վրայով: 26Ու եկան Յովհաննէսի և անոր ըսին, Ռաբբի, անիկա որ քեզի հետ Յորդանանու անդիի կողմն էր, որու համար դուն վկայութիւն տուիր, ահա ինք կը մկրտէ և ամէնը անոր կու գան: 27Պատասխան տուաւ Յովհաննէս և ըսաւ, Մարդ մը չկրնար բան մը առնել, եթէ երկինքէն տրուած չըլլայ անոր: 28Դուք ձեզմէ կը վկայէք ինծի համար, որ ըսի թէ Ես Քրիստոսը չեմ, հապա անոր առջևէն ղրկուած եմ: 29Ան որ հարսն ունի, փեսան անիկա է. բայց փեսային բարեկամը որ կը կենայ ու կը լսէ անոր, մեծապէս կ’ուրախանայ փեսային ձայնին համար. ուստի այս իմ ուրախութիւնս լցուած է: 30Անիկա պէտք է որ մեծնայ, բայց ես պզտիկնամ:

Ան որ երկինքէն կու գայ

31Ան որ վերէն կու գայ՝ ամէնէն վեր է. ան որ երկրէ է՝ երկրաւոր է, ու երկրէ կը խօսի. ան որ երկինքէն կու գայ՝ ամէնէն վեր է. 32Եւ ինչ որ տեսաւ ու լսեց, զայն կը վկայէ, ու անոր վկայութիւնը մէ՛կը չընդունիր: 33Ան որ անոր վկայութիւնը կ’ընդունի, կնքեց թէ Աստուած ճշմարիտ է: 34Վասն զի ան զոր Աստուած ղրկեց, Աստուծոյ խօսքերը կը խօսի, վասն զի Աստուած անոր չափով չտար Հոգին: 35Հայրը կը սիրէ Որդին, և ամէն բան անոր ձեռքը տուած է: 36Ան որ Որդւոյն կը հաւատայ, յաւիտենական կեանք ունի. և ան որ Որդւոյն չհնազանդիր, անիկա կեանք պիտի չտեսնէ, հապա Աստուծոյ բարկութիւնը անոր վրայ կը մնայ: