Աւազանին քով բժշկութիւն

1Ասկէ ետև Հրէից տօն էր, և Յիսուս Երուսաղէմ ելաւ: 2Ու Երուսաղէմի մէջ Ոչխարաց դրանը քով աւազան մը կայ, որ Եբրայեցերէն Բեթհեզդա կ’ըսուի, որ հինգ սրահ ունի: 3Ասոնց մէջ խիստ շատ հիւանդներ պառկած էին, կոյրեր, կաղեր, չորցածներ, որոնք կը սպասէին ջուրին խառնուելուն: 4Վասն զի հրեշտակ մը ժամանակ ժամանակ աւազանը կ’իջնէր ու ջուրերը կը խառնէր, և ով որ ջուրին խառնուելէն ետև ամէնէն առաջ անոր մէջ կը մտնէր, կը բժշկուէր ի՛նչ հիւանդութիւն որ ունենար: 5Եւ հոն մարդ մը կար, որ երեսունըութ տարիէ ի վեր հիւանդութիւն մը ունէր: 6Յիսուս երբ տեսաւ զանիկա որ ինկած պառկած էր, ու գիտցաւ որ շատ ժամանակէ ի վեր է, ըսաւ անոր, Կ’ուզե՞ս առողջանալ: 7Հիւանդը պատասխան տուաւ անոր, Տէր, մարդ մը չունիմ որ երբ ջուրերը խառնուին զիս աւազանը ձգէ. հապա քանի որ ես ծանր կը շարժիմ, ինծմէ առաջ ուրիշ մը կ’իջնէ: 8Յիսուս ըաւ անոր, Ելիր, մահիճդ առ ու քալէ: 9Եւ իսկոյն մարդը առողջացաւ, ու իր մահիճը վերցնելով կը քալէր. ու այն օրը շաբաթ էր: 10Այն ատեն Հրեաները ըսին բժշկուած մարդուն, Շաբաթ է, և արժան չէ որ մահիճդ վերցնես: 11Պատասխան տուաւ անոնց ու ըսաւ, Ան որ զիս բժշկեց, ինք ինծի ըսաւ, Մահիճդ առ ու քալէ: 12Ուստի հարցուցին անոր, Ո՞վ է այն մարդը որ քեզի ըսաւ, Մահիճդ առ ու քալէ: 13Եւ բժշկուողը չէր գիտեր թէ ո՛վ է ան, վասն զի Յիսուս մէկդի քաշուեցաւ՝ այն տեղ բազմութիւն ըլլալուն համար: 14Անկէ ետքը Յիսուս զանիկա տաճարին մէջ գտնելով՝ ըսաւ անոր, Ահա բժշկուեցար, ալ մեղք մի գործեր, որ ալ աւելի չար բան մը չպատահի քեզի: 15Գնաց մարդը, ու Հրեաներուն պատմեց թէ Յիսուս էր որ զինք բժշկեց: 16Եւ ասոր համար Հրեաները կը հալածէին Յիսուսը, և կը փնտռէին զանիկա սպաննել, որ այս բաները շաբաթ օրը կ’ընէր: 17Եւ Յիսուս պատասխան տուաւ անոնց, Իմ Հայրս մինչև հիմա կը գործէ, ես ալ կը գործեմ: 18Ասոր համար ա՛լ աւելի կը փնտռէին Հրեաները զանիկա սպաննել, վասն զի ոչ թէ միայն շաբաթ օրը կը լուծէր, հապա նաև զԱստուած իր Հայրը կ’անուանէր, ու այսպէս ինքզինք Աստուծոյ հաւասար կ’ընէր:

Որդիին հեղինակութիւնը

19Իսկ Յիսուս պատասխան տուաւ ու ըսաւ անոնց, Ճշմարիտ ճշմարիտ կ’ըսեմ ձեզի, Որդին ինքիրմէ բան մըն ալ չկրնար ընել, միայն թէ ինչ որ տեսնէ զոր Հայրը կ’ընէ, վասն զի ինչ որ զանիկա կ’ընէ, նմանապէս Որդին ալ նոյնը կ’ընէ: 20Քանզի Հայրը կը սիրէ Որդին, և ամէն բան կը ցուցնէ անոր՝ ինչ որ ինք կ’ընէ. և անոնցմէ ալ աւելի մեծ գործեր պիտի ցուցնէ անոր, որպէս զի դուք զարմանաք: 21Վասն զի ինչպէս Հայրը մեռելները կը յարուցանէ ու կենդանի կ’ընէ, այնպէս ալ Որդին զորոնք կ’ուզէ կը կենդանացնէ: 22Քանզի Հայրը մէ՛կը չդատեր, հապա ամէն դատաստանը Որդւոյն տուաւ. 23Որպէս զի ամէնը պատուեն Որդին, ինչպէս Հայրը կը պատուեն. ան որ Որդին չպատուէր, զանիկա ղրկող Հայրը չպատուեր: 24Ճըշմարիտ ճշմարիտ կ’ըսեմ ձեզի թէ Ան որ իմ խօսքս մտիկ կ’ընէ, և կը հաւատայ անոր որ զիս ղրկեց, յաւիտենական կեանք ունի, ու դատապարտութեան տակ չիյնար, հապա մահուանէ դէպ ի կեանք անցած է: 25Ճշմարիտ ճշմարիտ կ’ըսեմ ձեզի, որ Ժամանակ պիտի գայ և ալ հիմա է, երբ մեռելները պիտի լսեն Աստուծոյ Որդւոյն ձայնը, և անոնք որ կը լսեն, պիտի ապրին: 26Վասն զի ինչպէս Հայրը իր անձին մէջ կեանք ունի, այնպէս ալ Որդւոյն տուաւ որ իր անձին մէջ կեանք ունենայ. 27Եւ դատաստան ընելու ալ իշխանութիւն տուաւ անոր, քանզի անիկա Որդի մարդոյ է: 28Ասոր վրայ մի զարմանաք. վասն զի ժամանակ պիտի գայ՝ երբ բոլոր գերեզմաններու մէջ եղողները անոր ձայնը պիտի լսեն, 29Ու դուրս պիտի գան, անոնք որ բարի գործեր են՝ կենաց յարութեան համար, և անոնք որ չար գործեր են՝ դատապարտութեան յարութեան համար:

Վկայութիւն Յիսուսին համար

30Ես ինքիրմէս բան մը չեմ կրնար ընել. ինչպէս կը լսեմ, այնպէս կը դատեմ, և իմ դատաստանս արդար է, վասն զի ես իմ կամքս չեմ փնտռեր, հապա անոր կամքը որ զիս ղրկեց: 31Եթէ ես ինծի համար վկայեմ, Իմ վկայութիւնս ճշմարիտ չէ: 32Ուրիշ մըն է որ ինծի համար կը վկայէ. և ես գիտեմ որ ճշմարիտ է այն վկայութիւնը՝ զոր ինք ինծի համար վկայեց: 33Դուք Յովհաննէսի ղրկեցիք, և ինք ճշմարտութեանը վկայեց: 34Բայց ես ոչ թէ մարդոցմէ վկայութիւն կ’առնեմ, հապա այս բաները կ’ըսեմ որպէս զի դուք փրկուիք: 35Անիկա ճրագ մըն էր որ կը վառեր ու լոյս կու տար, և դուք քիչ մը ատեն ուզեցիք անոր լուսովը ուրախանալ: 36Բայց ես Յովհաննէսի վկայութենէն ալ մեծ վկայութիւն ունիմ, քանզի այն գործերը զորոնք Հայրը ինծի տուաւ որ զանոնք կատարեմ, այն նոյն գործերը զորոնք ես կը գործեմ, ինծի համար կը վկայեն թէ Հայրը զիս ղրկեց: 37Ու Հայրը որ զիս ղրկեց, ինք վկայեց ինծի համար. դուք բնաւ անոր ձայնը չլսեցիք, ոչ ալ անոր կերպարանքը տեսաք. 38Եւ ոչ անոր խօսքը ձեր մէջ բնակած ունիք, քանզի զայն որ ինք ղրկեց, դուք անոր չէք հաւատար: 39Գիրքերը քննեցէք, վասն զի դուք անոնցմով կը սեպէք յաւիտենական կեանքը ունենալ, և բուն անոնք են որ ինծի համար կը վկայեն: 40Եւ դուք չէք ուզեր ինծի գալ, որ կեանք ունենաք: 41Ես մարդոցմէ փառք չեմ առներ: 42Բայց գիտեմ ձեզ որ Աստուծոյ սէրը ձեր մէջ չունիք: 43Ես իմ Հօրս անունովը եկայ, ու զիս չէք ընդունիր. եթէ ուրիշ մէկը իր անունովը գայ, զանիկա պիտի ընդունիք: 44Դուք ի՞նչպէս կրնաք հաւատալ, որ իրարմէ փառք կ’առնէք, և այն փառքը որ մէկ Աստուծմէն է՝ չէք փնտռեր: 45Մի կարծէք թէ ես ձեզի համար ամբաստանութիւն պիտի ընեմ Հօրը. կայ մէկը որ ձեզի համար ամբաստանութիւն կ’ընէ, Մովսէս՝ որու դուք յուսացած եք: 46Վասն զի եթէ դուք Մովսէսի հաւատայիք, ինծի ալ պիտի հաւատայիք, քանզի անիկա ինծի համար գրեց: 47Բայց եթէ անոր գրածներուն չէք հաւատար, իմ խօսքերուս ի՞նչպէս պիտի հաւատաք: