Յիսուս ի ծնէ կոյրը կը բժշկէ

1Ու երբ կ’անցնէր, մարդ մը տեսաւ կոյր ծնած. 2Եւ իր աշակերտները հարցուցին իրեն ու ըսին, Ռաբբի, որո՞ւն է մեղքը, ասո՞ր թէ իր ծնողքին, որ անիկա կոյր ծնաւ։ 3Պատասխան տուաւ Յիսուս, Ոչ ատորն է մեղքը, ոչ ալ իր ծնողքին, հապա որպէս զի Աստուծոյ գործերը ատոր վրայ յայտնի ըլլան։ 4Քանի որ ցորեկ է, պէտք է որ զիս ղրկողին գործերը գործեմ. գիշերը կու գայ երբ մէ՛կը չկրնար գործել։ 5Քանի որ ես աշխարհի մէջ եմ, աշխարհի լոյսն եմ: 6Երբ զայս ըսաւ, թքաւ գետինը և թուքով կաւ շինեց, ու այն կաւը կոյրին աչքերուն վրայ ծեփեց: 7Եւ ըսաւ անոր, Գնա, լուացուէ Սելովամի ավազանին մէջ, (որ ղրկուած կը թարգմանուի,) ուստի գնաց ու լուացուեցաւ, եկաւ ու կը տեսնէր։ 8Իսկ դրացիները և անոնք որ առաջուընէ տեսած էին զանիկա որ կոյր էր, կ’ըսէին, Ասիկա չէ՞ր որ կը նստէր և կը մուրար. ոմանք կ’ըսէին. Անիկա է: 9Ուրիշները կ’ըսէին, Անոր նման մէկն է, իսկ ինք կ’ըսէր թէ Ես եմ։ 10ուստի ըսին իրեն, հապա ի՞նչպէս բացուեցան քու աչքերդ։ 11Ինք պատասխան տուաւ ու ըսաւ, Յիսուս կոչուած մարդ մը կաւ շինեց ու աչքերս ծեփեց, և ըսաւ ինծի, Գնա Սելովամի աւազանը ու լուացուէ. ես ալ գացի, լուացուեցայ ու կը տեսնեմ։ 12Եւ ըսին իրեն, Ո՞ւր է անիկա. ըսաւ անոնց, Չեմ գիտեր։

Փարիսեցիները բժշկուողը կը հարցաքննեն

13Փարիսեցիներուն տարին զանիկա որ ատենով կոյր էր։ 14Եւ շաբաթ օր էր երբ Յիսուս կաւը շինեց, ու անոր աչքերը բացաւ։ 15Նորէն փարիսեցիներն ալ կը հարցնէին իրեն, թէ ի՛նչպէս կը տեսնէ. անիկա ալ ըսաւ անոնց, Կաւ դրաւ աչքերուս վրայ, ու լուացուեցայ և կը տեսնեմ։ 16Ասոր վրայ փարիսեցիներէն ոմանք կ’ըսէին, Այն մարդը Աստուծմէ չէ, վասն զի շաբաթ օրը չպահեր. ուրիշները կ’ըսէին, Ի՞նչպէս կրնայ մեղաւոր մարդ մը այսպիսի հրաշքներ ընել. ու անոնց մէջ երկպառակութիւն կար։ 17Նորէն ըսին կոյրին, Դուն ի՞նչ կ’ըսես անոր համար որ քու աչքերդ բացաւ. ան ալ ըսաւ թէ Մարգարէ մըն է։ 18Իսկ Հրեաները չէին հաւատար անոր համար՝ թէ կոյր էր ու բացուեցաւ, մինչև որ այն աչքը բացուածին ծնողքը կանչեցին: 19Եւ անոնց հարցուցին ու ըսին, Ա՞յս է ձեր որդին, որու համար դուք կ’ըսէք թէ կոյր ծնաւ. հապա հիմա ի՞նչպէս կը տեսնէ: 20Անոր ծնողքը պատասխան տուին անոնց ու ըսին, Գիտենք որ ասիկա է մեր որդին, և որ ինք կոյր ծնաւ. 21Բայց հիմա ի՛նչպէս կը տեսնէ՝ չենք գիտեր, կամ թէ ո՛վ բացաւ ատոր աչքերը՝ մենք չենք գիտեր. ինք չափահաս է, իրեն հարցուցէք. թող ինք խօսի իրեն համար: 22Զայս ըսին անոր ծնողքը՝ Հրեաներէն վախնալնուն համար, քանզի Հրեաները միաբան հաւանութեամբ որոշեր էին որ եթէ մէկը զանիկա Քրիստոս դաւանի, ժողովարանէն դուրս ձգուի: 23Ասոր համար անոր ծնողքը ըսին թէ Ինք չափահաս է, իրեն հարցուցէք: 24Ետքը նորէն կանչեցին այն մարդը որ կոյր էր, ու ըսին անոր, Աստուծոյ փառք տուր. մենք գիտենք որ այն մարդը մեղաւոր է: 25Անիկա ալ պատասխան տուաւ ու ըսաւ, Եթէ մեղաւոր է՝ ես չեմ գիտեր. միայն զայս գիտեմ որ կոյր էի և հիմա կը տեսնեմ: 26Նորէն ըսին անոր, Ի՞նչ ըրաւ քեզի, քու աչքերդ ի՞նչպէս բացաւ: 27Պատասխան տուաւ անոնց, Հիմա ըսի ձեզի ու չլսեցիք. ինչո՞ւ համար նորէն լսել կ’ուզէք. միթէ դո՞ւք ալ կ’ուզէք անոր աշակերտ ըլլալ: 28Անոնք նախատելով զանիկա ըսին, Դուն ես անոր աշակերտը, իսկ մենք Մովսէսի աշակերտներն ենք: 29Մենք գիտենք որ Աստուած Մովսէսի հետ խօսեցաւ, բայց ասիկա չենք գիտեր թէ ուրկէ է: 30Պատասխան տուաւ մարդը և ըսաւ անոնց, Աïիկա է զարմանալի բանը՝ որ դուք չէք գիտեր թէ ուրկէ՛ է, և անիկա իմ աչքերս բացաւ: 31Գիտենք որ Աստուած մեղաւորներուն մտիկ չըներ, բայց եթէ մէկը աստուածապաշտ ըլլայ ու անոր կամքը կատարէ, անոր մտիկ կ’ընէ: 32Աշխարհի սկիզբէն ի վեր լսուած չէ որ մարդ մը կոյր ծնածի մը աչքերը բացած է: 33Եթէ Աստուծմէ չըլլար այն մարդը, բան մըն ալ չէր կրնար ընել: 34Պատսախան տուին և ըսին անոր, Դուն բոլորովին մեղքերու մէջ ծնած ես, ու մեզի վարդապետութի՞ւն կ’ընես. և դուրս ըրին զանիկա:

Հոգեկան կուրութիւն

35Յիսուս լսեց որ զանիկա դուրս ըրին, ու երբ գտաւ զանիկա, ըսաւ անոր, Դուն կը հաւատա՞ս Աստուծոյ Որդիին: 36Անիկա պատասխան տուաւ ու ըսաւ, Տէր, ո՞վ է՝ որ հաւատամ անոր: 37Եւ Յիսուս ըսաւ անոր, Տեսար ալ զանիկա, և քեզի հետ խօսողը ան է: 38Անիկա ալ ըսաւ, Կը հաւատամ, Տէր. ու անոր երկրպագութիւն ըրաւ: 39Եւ Յիսուս ըսաւ, Ես դատաստանի համար եկայ այս աշխարհը, որպէս զի չտեսնողները տեսնեն և տեսնողները կուրանան: 40Եւ փարիսեցիներէն ոմանք որոնք իրեն հետ էին, այս բաները լսելով՝ ըսին իրեն, Միթէ մե՞նք ալ կոյր ենք: 41Յիսուս ըսաւ անոնց, Եթէ կոյր ըլլայիք, դուք մեղք չէիք ունենար, բայց հիմա կ’ըսէք թէ Կը տեսնենք, ասոր համար ձեր մեղքը ձեր վրայ կը մնայ: