Սատանան Յոբը կը փորձէ

1Հուս երկրին մէջ Յոբ անունով մարդ մը կար. ու այն մարդը կատարեալ ու արդար և աստուածավախ էր, ու չարութենէ ետ կը քաշուէր: 2Եւ անոր եօթը տղայ ու երեք աղջիկ ծնան: 3Ու անոր ստացուածքը եօթը հազար ոչխար. ու երեք հազար ուղտ, և հինգ հարիւր զոյգ եզ, ու հինգ հարիւր մատակ էշ էր, ու խիստ շատ ծառաներ ուներ. և այն մարդը բոլոր արևելցիներէն մեծ էր: 4Ու անոր տղաքը կ’երթային, ու ամէն մէկը իր օրը տուներնին հացկերոյթ կ’ընէին, և մարդ ղրկելով երեք քոյրերնին կը հրաւիրէին, որպէս զի իրենց հետ ուտեն ու խմեն: 5Ու երբ հացկերոյթին օրերը կը լմննային, Յոբ կանչել կու տար* զանոնք ու կը սրբէր. և առտուանց կ’ելլէր` անոնց ամէնուն թիւովը ողջակէզներ կը մատուցանէր. որովհետև կ’ըսէր Յոբ, Կարելի է որ տղաքս մեղք գործեցին, ու սիրտերնուն մէջ Աստուծոյ հայհոյեցին. միշտ այսպէս կ’ընէր Յոբ: 6Արդ օր մը Աստուծոյ որդիները գացին Տէրոջը առջև կայնելու, ու սատանայ ալ գնաց անոնց մէջ. 7Եւ Տէրը ըսաւ սատանայի. Ուրկէ՞ կու գաս. ու սատանայ պատասխան տուաւ Տէրոջը ու ըսաւ, Երկրի վրայ շրջելէն ու անոր մէջ պտըտելէն: 8Եւ Տէրը ըսաւ սատանայի, Իմ Յոբ ծառայիս աղէկ ուշադրութիւն ըրի՞ր, որ երկրի վրայ անոր պէս կատարեալ և արդար, աստուածավախ ու չարութենէ ետ քաշուող մարդ չկայ: 9Ու սատանայ պատասխան տուաւ Տէրոջը ու ըսաւ, Միթէ Յոբ ձրի՞ կը պաշտէ զԱստուած*. 10Չէ՞ որ դուն անոր ու անոր տանը և անոր ամէն ունեցածներուն բոլորտիքը ցանկով պատեցիր, անոր ձեռքերուն գործերը օրհնեցիր, ու անոր ստացուածքը երկրի վրայ շատցաւ: 11Բայց հիմա ձեռքդ երկնցուր, ու անոր ամէն ունեցածին դպչէ, ու պիտի տեսնես թէ ի՛նչպէս քեզի դէմ պիտի հայհոյէ: 12Եւ Տէրը ըսաւ սատանայի, Ահա անոր ամէն ունեցածը քու ձեռքդ կու տամ. միայն թէ իրեն վրայ ձեռք չերկնցնես: Այն ժամանակ սատանայ Տէրոջը առջևէն ելաւ:

Յոբին զաւակները և հարստութիւնը կորսուեցան

13Ու եղաւ որ օր մը անոր տղաքը ու աղջիկները իրենց մեծ եղբօրը տանը մէջ կ’ուտէին ու գինի կը խմէին: 14Ու պատգամաբեր մը եկաւ Յոբի ու ըսաւ, Երբ եզները կը հերկէին ու մատակ էշերը անոնց քով կ’արածուէին, 15Սաբայեցիք յարձակեցան ու զանոնք առին, ու ծառաները սուրի բերնէ անցուցին. և միայն ես ազատեցայ ու եկայ որպէս զի քեզի պատմեմ: 16Երբ անիկա տակաւին կը խօսէր, ուրիշ մէկն ալ եկաւ ու ըսաւ, Երկինքէն Աստուծոյ կրակը իջաւ, ու հօտերը ու ծառաները այրեց ու զանոնք սպառեց. և միայն ես ազատեցայ ու եկայ որպէս զի քեզի պատմեմ: 17Երբ անիկա տակաւին կը խօսէր, ուրիշ մէկն ալ եկաւ ու ըսաւ, Քաղդէացիք երեք գունդի բաժնուած` ուղտերուն վրայ յարձակեցան և զանոնք առին, ու ծառաները սուրի բերնէ անցուցին. և միայն ես ազատեցայ ու եկայ որպէս զի քեզի պատմեմ: 18Երբ անիկա տակաւին կը խօսէր, ուրիշ մէկն ալ եկաւ ու ըսաւ, Որ ատեն տղաքդ ու աղջիկներդ իրենց մեծ եղբօրը տանը մէջ կ’ուտէին ու գինի կը խմէին, 19Ահա անապատին անդիի կողմէն մեծ հով մը եկաւ, ու տանը չորս կողմը այնպէս զարկաւ, որ տղոցը վրայ փլաւ, ու անոնք մեռան. և միայն ես ազատեցայ ու եկայ որպէս զի քեզի պատմեմ: 20Այն ատեն Յոբ ելաւ, իր պատմուճանը պատռեց և գլխուն մազերը կտրեց, ու գետինը իյնալով երկրպագութիւն ըրաւ, 21Ու ըսաւ, Մօրս արգանդէն մերկ ելայ, ու հոն մերկ պիտի դառնամ. Տէրը տուաւ ու Տէրը առաւ, օրհնեալ ըլլայ Տէրոջը անունը: 22Այս ամէնուն մէջ Յոբ չմեղանչեց, ու Աստուծոյ անզգամութիւն չտուաւ: