Սատանան կրկին Յոբը կը փորձէ

1Եւ ուրիշ օր մը Աստուծոյ որդիները գացին Տէրոջը առջև կայնելու, ու սատանայ ալ գնաց անոնց մէջ Տէրոջը առջև կայնելու: 2Ե Տէրը ըսաւ սատանայի, Ուրկէ՞ կու գաս. ու սատանայ պատասխան տուաւ Տէրոջը ու ըսաւ, Երկրի վրայ շրջելէն ու անոր մէջ պտըտելէն: 3Եւ Տէրը սատանայի ըսաւ, Իմ Յոբ ծառայիս աղէկ ուշադրութիւն ըրի՞ր, որ երկրի վրայ անոր պէս կատարեալ և արդար, աստուածավախ ու չարութենէ ետ քաշուող մարդ չկայ, ու անիկա տակաւին իր կատարելութեանը մէջ հաստատ է, թէև դուն ուզեցիր զիս համոզել որ զանիկա զուր տեղը կորսնցնեմ: 4Եւ սատանայ պատասխան տուաւ ու Տէրոջը ըսաւ, Մորթի տեղ մորթ` նաև մարդս իր բոլոր ստացուածքը իր կեանքին տեղ կու տայ: 5Բայց հիմա ձեռքդ երկնցուր, ու անոր ոսկորին ու մարմինին դպչէ, ու պիտի տեսնես թէ ի՛նչպէս քեզի դէմ պիտի հայհոյէ: 6Եւ Տէրը ըսաւ սատանայի, Ահա զանիկա քու ձեռքդ կու տամ. միայն թէ անոր կեանքը պահէ: 7Ու սատանայ ելաւ Տէրոջը առջևէն, ու Յոբը ոտքին թաթէն մինչև գագաթը գէշ պալարներով զարկաւ: 8Եւ անիկա խեցիի մը կտոր առաւ, որպէս զի անով քերուի. ու մոխիրի մէջ նստաւ: 9Եւ անոր կինը ըսաւ անոր, Դուն տակաւին քու կատարելութեանդ մէջ հաստատ կը կենա՞ս. Աստուծոյ դէմ հայհոյէ ու մեռիր: 10Եւ Յոբ ըսաւ անոր, Դուն անզգամ կնոջ մը պէս կը խօսիս. Աստուծոյ ձեռքէն միայն բարիքը ընդունինք, ու չարիքը չընդունի՞նք: Այս ամէնուն մէջ Յոբ իր շրթունքներովը չմեղանչեց:

Յոբին բարեկամները

11Եւ Յոբի երեք բարեկամները, Եղիփազ Թեմանացի, Բաղդատ Սօքեցի ու Սոփար Նաամացի, երբ լսեցին անոր գլուխը եկած այս բոլոր փորձութիւնները, ամէն մէկը իր տեղէն ելլելով եկան ու մէկտեղ ժողվուեցան, որպէս զի երթան ցաւակից ըլլան անոր ու զանիկա մխիթարեն: 12Ու հեռուէն աչքերնին վերցնելով տեսան, բայց չճանչցան զանիկա. և ձայներնին վերցուցին ու լացին, ու ամէն մէկը իր պատմուճանը պատռելով` դէպ ի երկինք գլուխնին հող ցանեցին: 13Եւ անոր հետ եօթը օր ու եօթը գիշեր գետնի վրայ նստան. ու մէ՛կը անոր խօսք մը չզրուցեց, քանզի տեսան որ անոր ցաւը խիստ սաստիկ էր: