1Այն ատեն Յոբ Տէրոջը պատասխան տալով` ըսաւ, 2Գիտեմ որ ամէն բանի կարող ես, Ու քու դիտաւորութիւնդ բնաւ չարգիլուիր: 3Ո՞վ է ասիկա որ տգիտութեամբ խորհուրդը կը նսեմացնէ. Արդարև կը զրուցէի, բայց չէի հասկնար. Ինծի սքանչելի բաներ ըլլալով` չէի իմանար: 4Կ’աղաչեմ, մտիկ ըրէ որպէս զի ես զրուցեմ, Քեզի հարցնեմ ու ինծի սորվեցուր: 5Ես քու վրայովդ ականջի լրով լսեր էի, Բայց հիմա աչքս կը տեսնէ քեզ: 6Անոր համար իմ անձս կ’արհամարհեմ, Հողի ու մոխիրի վրայ կը զղջամ: 7Արդ Տէրը այս խօսքերը Յոբի զրուցելէն ետքը` Տէրը Եղիփազ Թեմանացիի ըսաւ, Քու վրադ ու երկու ընկերներուդ վրայ իմ բարկութիւնս բորբոքեցաւ, վասն զի ինծի համար իմ Յոբ ծառայիս պէս շիտակ չխօսեցաք: 8Ուստի հիմա ձեզի եօթը զուարակ ու եօթը խոյ առէք, ու Յոբ ծառայիս երթալով` ձեզի համար ողջակէզ մատուցէք, և իմ Յոբ ծառաս ձեզի համար աղօթք ընէ, որպէս զի ես ալ անոր աղօթքը ընդունելով` ձեր անմտութեանը պէս չընեմ ձեզի. վասն զի իմ առջևս Յոբ ծառայիս պէս շիտակ չխօսեցաք: 9Այն ատեն Եղիփազ Թեմանացի ու Բաղդատ Սօքեցի և Սոփար Նաամացի երթալով` Տէրոջը իրենց ըսածին պէս ըրին. և Տէրը Յոբի աղօթքը ընդունեց: 10Եւ Տէրը գերութենէ ազատեց Յոբը` իր բարեկամներուն համար աղօթք ըրած ատենը. նաև Տէրը Յոբի բոլոր ստացուածքին կրկնապատիկը տուաւ: 11Եւ անոր բոլոր եղբայրները ու բոլոր քոյրերը և զանիկա առաջուընէ ճանչցողներուն բոլորն ալ անոր գալով` անոր տանը մէջ հաց կերան անոր հետ, ու անոր համար ցաւելով` Տէրոջը անոր ղրկած բոլոր փորձանքին համար անոր մխիթարութիւն տուին. և ամէն մէկը մէյմէկ կտոր ստակ ու մէյմէկ ոսկի օղ տուին անոր: 12Եւ Տէրը Յոբի վերջը առաջինէն աւելի օրհնեց. այնպէս որ տասնըչորս հազար ոչխար, ու վեց հազար ուղտ, և հազար զոյգ եզ ու հազար մատակ էշ ունեցաւ: 13Եւ անոր եօթը տղայ ու երեք աղջիկ եղաւ: 14Ու մէկ աղջկան անունը Եմիմա, ու երկրորդին անունը Կասիա, ու երրորդին անունը Կերեն-հապուք դրաւ: 15Եւ բոլոր երկրին վրայ Յոբի աղջիկներուն պէս գեղեցիկ կիներ չէին գտնուեր. ու հայրերնին անոնց ժառանգութիւն տուաւ իրենց եղբայրներուն մէջ: 16Եւ ասկէ ետքը Յոբ հարիւր քառասուն տարի ապրելով` տեսաւ իր որդիները ու իր որդւոց որդիները մինչև չորրորդ ազգը: 17Ու Յոբ ծերացած ու օրերը լեցուած մեռաւ: