Ամօրհացիները պարտուեցան

1Ու երբ Երուսաղէմի Ադոնիսեդեկ թագաւորը լսեց թէ Յեսու Գային առաւ ու զանիկա բոլորովին կործանեց, և թէ ինչ որ Երիքովի ու անոր թագաւորին ըրաւ, Գայիի ու անոր թագաւորին ալ այնպէս ըրաւ, և թէ Գաբաւոնի բնակիչները Իսրայէլացւոց հետ հաշտութիւն ըրին, ու անոնց մէջ մնացին, 2Շատ վախցան ինք ու իր ժողովուրդը. քանզի Գաբաւոն Թագաւորանիստ քաղաքի մը պէս մեծ քաղաք մըն էր, ու անիկա Գայիէ մեծ էր, և անոր բոլոր մարդիկը զօրաւոր էին։ 3Ասոր համար Երուսաղէմի Ադոնիսեդեկ թագաւորը Քեբրոնի Հօհամ թագաւորին, Յերիմութի Փիրամ թագաւորին, ու Լաքիսի Յափիէ թագաւորին, ու Էգղոնի Դաբիր թագաւորին մարդ ղրկեց, ըսելով, 4Ինծի ելէք ու ինծի օգնութիւն ըրէք որպէս զի Գաբաւոնը զարնենք. քանզի Յեսուի հետ ու Իսրայէլի որդիներուն հետ հաշտութիւն ըրաւ։ 5Ուստի Ամօրհացւոց հինգ թագաւորները, Երուսաղէմի թագաւորը, Քեբրոնի թագաւորը, Յերիմութի թագաւորը, Լաքիսի թագաւորը ու Էգղոնի թագաւորը, ժողվուեցան, և իրենք ու իրենց բոլոր բանակները ելան, և Գաբաւոնի քով բանակ դրին, ու անոր դէմ պատերազմ ըրին։ 6Եւ Գաբաւոնի բնակիչները Գաղգաղայի մէջ բանակը Յեսուի մարդ ղրկեցին՝ ըսելով, Քու ծառաներէդ ձեռքդ մի քաշեր, շուտով մեզի ել, մեզ ազատէ ու մեզի օգնութիւն ըրէ. քանզի լեռնաբնակ Ամօրհացւոց բոլոր թագաւորները մեր վրայ ժողվուեցան։ 7Եւ Յեսու ինք ու իրեն հետ բոլոր պատերազմական մարդիկը և զօրքին բոլոր զօրաւորները Գաղգաղայէ ելան։ 8Ու Տէրը Յեսուի ըսաւ, Անոնցմէ մի վախնար, քանզի զանոնք քու ձեռքդ տուի. բնաւ անոնցմէ մէկը պիտի չկարենայ քու առջեւդ կայնիլ։ 9Եւ Յեսու Գաղգաղայէ բոլոր գիշերը քալելով՝ յանկարծակի անոնց վրայ հասաւ։ 10Ու Տէրը խռովեցուց զանոնք Իսրայէլի առջև, և զանոնք Գաբաւոնի մօտ մեծ կոտորածով մը կոտրեց, ու զանոնք Բեթորոն ելլելու ճամբուն վրայ հալածեց, և զանոնք մինչև Ազեկա ու Մակեդա զարկաւ։ 11Ու երբ անոնք Իսրայէլի առջեւէն կը փախչէին ու Բեթորոնէ վար կ’իջնէին, Տէրը անոնց վրայ երկինքէն կարկուտի մեծ քարեր նետեց մինչև Ազեկա, ու մեռան. կարկուտին քարերէն մեռնողները Իսրայէլի որդիներուն սրով մեռցուցածներէն շատ էին։ 12Այն ատեն Յեսու Տէրոջը հետ խօսեցաւ, այն օրը որ Տէրը Ամօրհացիները Իսրայէլի որդիներուն ձեռքը տուաւ, ու Իսրայէլի առջև ըսաւ, Արև, դուն Գաբաւոնի դիմաց կայնէ. Լուսին, դուն ալ Այեղոնի ձորին դիմաց կայնէ։ 13Ու արեւը կայնեցաւ, և լուսինը իր տեղը մնաց, մինչև որ ժողովուրդը իր թշնամիներէն վրէժ առաւ։ Միթէ ասիկա Ուղիղին գիրքին մէջ գրուած չէ՞. ուստի արեւը երկինքին մէջտեղը կայնեցաւ ու լման մէկ օրի չափ մտնելու չարտորաց։ 14Անոր պէս օր մը չեղաւ, ոչ առաջ ու ոչ ետքը, որ Տէրը մարդու ձայնը լսեց, քանզի Տէրը Իսրայէլի համար պատերազմեցաւ։

Յեսու հինգ թագաւորներ գերի կ’առնէ

15Ետքը Յեսու ու անոր հետ բոլոր Իսրայէլ Գաղգաղա՝ բանակը դարձան։ 16Եւ հինգ թագաւորները փախան, ու Մակեդա, այրին մէջ, պահուեցան։ 17Եւ Յեսուի պատմուեցաւ՝ ըսելով, Այն հինգ թագաւորները Մակեդա, այրին մէջ, պահուած գտնուեցան։ 18Եւ Յեսու ըսաւ, Այրին բերանը մեծ քարեր գլորեցէք, ու անոր վրայ մարդիկ դրէք որպէս զի պահպանութիւն ընեն. 19Բայց դուք մի կայնիք, ձեր թշնամիները հալածեցէք, ու անոնց ետեւինները զարկէք, և անոնց թող մի տաք որ իրենց քաղաքները մտնեն. քանզի ձեր Տէր Աստուածը զանոնք ձեր ձեռքը մատնեց։ 20Ու երբ Յեսու Իսրայէլի որդիներուն հետ զանոնք խիստ մեծ կոտորածով մը կոտրեց, ու զանոնք հատցուց լմնցուց, և անոնց փախստականները պարսպաւոր քաղաքներու մէջ մտան, 21Բոլոր ժողովուրդը խաղաղութեամբ Մակեդա, բանակը Յեսուի դարձաւ. ու Իսրայէլի որդիներուն դէմ բնաւ մէկը իր լեզուն չշարժեց։ 22Այն ատեն Յեսու ըսաւ, Այրին բերանը բացէք, ու այրէն այն հինգ թագաւորները հանեցէք ինծի բերէք։ 23Եւ այնպէս ըրին, ու այրէն այն հինգ թագաւորները, այսինքն Երուսաղէմի թագաւորը, Քեբրոնի թագաւորը, Յերիմութի թագաւորը, Լաքիսի թագաւորը ու Էգղոնի թագաւորը, հանեցին անոր տարին։ 24Ու երբ այս թագաւորները Յեսուի առջև հանեցին, Յեսու Իսրայէլի բոլոր մարդիկը կանչեց, ու իրեն հետ գացող պատերազմողներուն գլխաւորներուն ըսաւ, Մօտեցէք ու ձեր ոտքերը այս թագաւորներուն պարանոցներուն վրա դրէք. և անոնք մօտեցան և իրենց ոտքերը անոնց պարանոցներուն վրայ դրին։ 25Եւ Յեսու անոնց ըսաւ, Մի վախնաք ու մի զարհուրիք, ուժովցէք և քաջասիրտ եղէք. քանզի Տէրը այսպէս պիտի ընէ ձեր ամէն թշնամիներուն, որոնց հետ դուք պիտի պատերազմիք։ 26Եւ անկէ ետև Յեսու զանոնք զարկաւ մեռցուց, ու զանոնք հինգ ծառէ կախեց, և ծառերուն վրայ մինչև իրիկուն կախուած մնացին։ 27Ու արեւի մտնելու ատենը Յեսու հրամայեց, ու զանոնք ծառերուն վրայէն իջեցուցին, և իրենց պահուած այրին մէջ նետեցին զանոնք, ու այրին բերանը մեծ քարեր դրին, որոնք կը կենան մինչև այսօր։

Յեսու աւելի երկիրներ կը գրաւէ

28Եւ Յեսու նոյն օրը Մակեդան ալ առաւ. ու զանիկա սուրի բերնէ անցուց, և անոր թագաւորը ու անոր մէջ գտնուած բոլոր հոգիները կորսնցուց, և մէ՛կը ողջ չթողուց. ու Մակեդայի թագաւորին ալ այնպէս ըրաւ, ինչպէս Երիքովի թագաւորին ըրած էր։ 29Ետքը Յեսու և իրեն հետ բոլոր Իսրայէլ Մակեդայէ Լեբնա անցան, ու Լեբնայի դէմ պատերազմեցան. 30Եւ Տէրը զանիկա ալ անոր թագաւորովը Իսրայէլի ձեռքը մատնեց, և զանիկա ու անոր մէջ գտնուած բոլոր հոգիները սուրի բերնէ անցուցին, ու մէ՛կը ողջ չթողուցին. և անոր թագաւորին այնպէս ըրին, ինչպէս Երիքովի թագաւորին ըրած էին։ 31Ետքը Յեսու ու իրեն հետ բոլոր Իսրայէլ Լեբնայէ Լաքիս անցան, և անոր քով բանակելով անոր դէմ պատերազմեցան. 32Եւ Տէրը Լաքիսը Իսրայէլի ձեռքը մատնեց, և զանիկա երկրորդ օրը առնելով, զանիկա ու անոր մէջ գտնուած բոլոր հոգիները սուրի բերնէ անցուցին, ինչպէս Լեբնայի ըրած էին։ 33Այն ատեն Գազերի Հօրամ թագաւորը Լաքիսի օգնութիւն ընելու ելաւ. և Յեսու զանիկա ու անոր ժողովուրդը կոտրեց, այնպէս որ անոնցմէ մէ՛կը ողջ չմնաց։ 34Ետքը Յեսու և իրեն հետ բոլոր Իսրայէլ Լաքիսէ Էգղոն անցան, և անոր քով բանակելով, անոր դէմ պատերազմ ըրին. 35Եւ զանիկա նոյն օրը առնելով սուրի բերնէ անցուցին. ու Յեսու նոյն օրը անոր մէջ գտնուած բոլոր հոգիները կորսնցուց, ինչպէս Լաքիսի ըրած էր։ 36Ետքը Յեսու ու իրեն հետ բոլոր Իսրայէլ Էգղոնէ Քեբրոն ելան, ու անոր դէմ պատերազմ ըրին. 37Եւ զանիկա առնելէ ետքը սուրի բերնէ անցուցին զանիկա ու անոր թագաւորը, և անոր բոլոր քաղաքները ու անոր մէջ գտնուած բոլոր հոգիները, և մէ՛կը ողջ չթողուցին, ինչպէս Էգղոնի ըրին. այսպէս զանիկա ու անոր մէջ գտնուած բոլոր հոգիները կորսնցուց։ 38Ետքը Յեսու և իրեն հետ բոլոր Իսրայէլ Դաբիր դարձան, ու անոր հետ պատերազմեցան. 39Եւ զանիկա ու անոր թագաւորը և անոր բոլոր քաղաքները առին, ու զանոնք սուրի բերնէ անցուցին. և անոր մէջ գտնուած բոլոր հոգիները կորսնցուցին, ու մէ՛կը ողջ չթողուցին. ինչպէս Քեբրոնի ըրաւ, և ինչպէս Լեբնայի ու անոր թագաւորին ըրաւ, նոյնպէս ալ Դաբիրի ու անոր թագաւորին ըրաւ։ 40Եւ Յեսու բոլոր լեռնային, հարաւային, դաշտային ու լեռներուն տակ եղած երկիրները և անոնց բոլոր թագաւորները զարկաւ, ու մէ՛կը ողջ չթողուց, հապա ամէն շնչաւորը մեռցուց, ինչպէս Իսրայէլի Տէր Աստուածը պատուիրեր էր։ 41Եւ Յեսու Կադէս-բառնեայէ մինչև Գազա, ու բոլոր Գոսոմի երկիրը մինչև Գաբաւոն զանոնք զարկաւ։ 42Եւ այս բոլոր թագաւորները ու անոնց երկիրը Յեսու մէկէն առաւ. քանզի Իսրայէլի համար Իսրայէլի Տէր Աստուածը պատերազմ կ’ընէր։ 43Եւ Յեսու և իրեն հետ բոլոր Իսրայէլ Գաղգաղա բանակը դարձան։