Շմաւոնին յատկացուած երկիրը

1Ու երկրորդ վիճակը Շմաւոնի ելաւ, Շմաւոնի որդիներուն ցեղին իրենց տոհմերուն համեմատ. ու անոնց ժառանգութիւնը Յուդայի որդիներուն ժառանգութեան մէջ եղաւ։ 2Եւ իրենց ժառանգութեան մէջ այս քաղաքները ունեցան. Բերսաբէէ, (Սաբէէ,) Մօլադա, 3Ասեր-սուաղ, Բաղա, Ասէմ, 4Էլթուղադ, Բաթուլ, Հօրմա, 5Սիկելակ, Բեթ մարքաբովթ, Ասեր-սուսա, 6Բեթլաբաւովթ և Սարուհէն. տասուիրեք քաղաք ու անոնց գեղերը։ 7Ային, Ռեմօն, Եթեր և Ասան. չորս քաղաք ու անոնց գեղերը։ 8Եւ այս քաղաքներուն բոլորտիքը եղած բոլոր գեղերը՝ մինչև Բաաղեթ-բէեր ու հարաւային Ռաման։ Շմաւոնի որդիներուն ցեղին ժառանգութիւնը իրենց տոհմերուն համեմատ ասիկա է։ 9Շմաւոնի որդիներուն ժառանգութիւնը Յուդայի որդիներուն բաժինէն եղաւ, քանզի Յուդայի որդիներուն բաժինը շատ էր իրենց. անոր համար Շմաւոնի որդիները անոնց ժառանգութեանը մէջ ժառանգութիւն առին։

Զաբուղոնին յատկացուած երկիրը

10Ու երրորդ վիճակը Զաբուղոնի որդիներուն ելաւ իրենց տոհմերուն համեմատ. և անոնց ժառանգութեանը սահմանը մինչև Սարիդ եղաւ. 11Ու անոնց սահմանը դէպ ի ծովը ու Մարաղա կ’ելլէ, և Դաբասէթ կը հասնի, ու Յեկնամի դիմաց եղող ձորը կը հասնի, 12Եւ Սարիդէ դէպ ի արեւելեան կողմը՝ Քասղովթ-թաբօրին սահմանը կը դառնայ, ու Դաբարաթէ ելլելով՝ վեր Յափիէ կ’ելլէ, 13Եւ անկէ դէպ ի արեւելք անցնելով Գեթքոփեր և Իթագասին կ’անցնի, ու Ռեմօն-մեթօար և Նուա կ’ելլէ. 14Ետքը այս սահմանը հիւսիսային կողմէն Ենաթօն կը պտըտի, ու Յեփթայէլի ձորին մէջ կը վերջանայ. 15Եւ Կատտաթ ու Նաաղօլ և Սամրօն ու Յադելա և Բեթլէհէմ. տասուերկու քաղաք ու անոնց գեղերը։ 16Զաբուղոնի որդիներուն ժառանգութիւնը իրենց տոհմերուն համեմատ ասիկա է, այս քաղաքները ու անոնց գեղերը։

Իսաքարին յատկացուած երկիրը

17Չորրորդ վիճակը Իսաքարի ելաւ, Իսաքարի որդիներուն իրենց տոհմերուն համեմատ. 18Ու անոնց սահամանը ասիկա եղաւ. Յեզրայէլ ու Քասելովթ և Սունամ, 19Ու Ափերէմ և Սիան ու Անարէթ, 20Եւ Ռաբբիթ ու Կէսիօն ու Աբէս, 21Եւ Ռամաթ ու Ենգանիմ և Ենքադդա ու Բեթփասես. 22Եւ այս սահմանը Թաբօր, Սասիմա ու Բեթսամիւս կը հասնի, ու անոնց սահմանը Յորդանանու մէջ կը վերջանայ. տասնըվեց քաղաք ու անոնց գեղերը։ 23Իսաքարի որդիներուն ցեղին ժառանգութիւնը իրենց տոհմերուն համեմատ ասիկա է, այս քաղաքները ու անոնց գեղերը։

Ասերին յատկացուած երկիրը

24Եւ հինգերորդ վիճակը Ասերի որդիներուն ցեղին ելաւ իրենց տոհմերուն համեմատ։ 25Ու անոնց սահմանը ասիկա եղաւ. Քեղկաթ ու Աղի և Բետէն ու Աքսափ, 26Եւ Ալամելէք ու Ամադ և Մասաղ, ու արևմտեան կողմէն մինչև Կարմեղոս և Սիօր-լեբնաթ կը հասնի, 27Ու արեւելեան կողմէն դէպ ի Բեթդագոն կը դառնայ, ու հիւսիսային կողմէն Զաբուղոն, Յեփթայէլի ձորը, Բեթամէկ ու Նիիէլ կը հասնի, և ձախ կողմէն Քաբօղ կ’ելլէ, 28Ու Եբրօն և Րոոբ ու Համմօն և Կանա, մինչև մեծ Սիդոն. 29Ետքը այս սահմանը Ռամա կը դառնայ մինչև Տիւրոս ամուր քաղաքը, և այս սահմանը Ուսա դառնալով ծովուն մէջ՝ Աքեզիբի վիճակին մէջ կը վերջանայ. 30Ու Ամմա և Ափէկ ու Րոոբ. քսանուերկու քաղաքներ ու անոնց գեղերը։ 31Ասերի որդիներուն ցեղին ժառանգութիւնը իրենց տոհմերուն համեմատ ասիկա է, այս քաղաքները ու անոնց գեղերը։

Նեփթաղիմին յատկացուած երկիրը

32Վեցերորդ վիճակը Նեփթաղիմի որդիներուն ելաւ, այսինքն Նեփթաղիմի որդիներուն իրենց տոհմերուն համեմատ։ 33Ու անոնց սահմանը ասիկա եղաւ. Հելեփէ ու Ալօնէ մինչև Սանանիմ, ու Ադամի-Նագեբ և Յաբնէլ մինչև Լակում, ու սահմանը Յորդանանու մէջ կը վերջանայ։ 34Եւ այս սահմանը արեւմտեան կողմէն Ազանօթ-թաբօր կը դառնայ, ու անկէ Հուկօկ կ’ելլէ. և հարաւային կողմէն մինչև Զաբուղոն կը հասնի, ու արեւմտեան կողմէն մինչև Ասեր, և արեւելեան կողմէն մինչև Յուդա ու Յորդանան կը հասնի. 35Եւ պարսպաւոր քաղաքները՝ Ասեդիմ, Սէր, Ամաթ, Ռեկկաթ, 36Քեներեթ, Ադամա, Ռամա, Հասոր, 37Կադէս, Եդրայի, Ենհասոր, Յարօն, 38Մակդաղիէլ, Հարէմ, Բեթանաթ ու Բեթսամիւս, տասնըինը քաղաք և անոնց գեղերն են։ 39Նեփթաղիմի որդիներուն ցեղին ժառանգութիւնը իրենց տոհմերուն համեմատ ասիկա է, այս քաղաքները ու անոնց գեղերը։

Դանին յատկացուած երկիրը

40Եօթներորդ վիճակը Դանի որդիներուն ցեղին ելաւ իրենց տոհմերուն համեմատ։ 41Եւ անոնց ժառանգութեան սահմանը ասիկա եղաւ. Սարաա ու Եսթաւուղ և Իրսամէս, 42Ու Սաղաբին և Այեղոն ու Յեթլա, 43Եւ Ելօն ու Թամնաթա և Ակկարոն, 44Ու Ելթեկէ և Գաբաթոն ու Բաալօթ, 45Ու Եհուդ և Բանէ-բարակ ու Գեթրեմօն, 46Եւ Մէարկօն ու Ռակկոն, Յոպպէի դիմացը եղած սահմանովը մէկտեղ։ 47Եւ Դանի որդիներուն սահմանը իրենց պզտիկ եկաւ. ուստի Դանի որդիները ոտք ելան, ու Լէսէմի հետ պատերազմեցան, և զանիկա առնելէ ետքը սուրի բերնէ անցուցին, ու զանիկա ժառանգելով անոր մէջ բնակեցան, և Լէսէմը իրենց հօրը Դանի անունովը Դան կոչեցին։ 48Դանի որդիներուն ցեղին ժառանգութիւնը իրենց տոհմերուն համեմատ ասիկա է, այս քաղաքները ու անոնց գեղերը։

Երկրին վերջին յատկացումը

49Ու երկիրը իր սահմաններովը բաժնելը լմնցնելէն ետքը, Իսրայէլի որդիները Նաւեան Յեսուի իրենց մէջ ժառանգութիւն տուին. 50Տէրոջը հրամանով անոր ուզած քաղաքը, Թամնաթ-սարան, իրեն տուին Եփրեմի լեռանը վրայ. ու անիկա քաղաքը շինեց, և անոր մէջ բնակեցաւ։ 51Ասոնք են այն ժառանգութիւնները զորոնք Եղիազար քահանան և Նաւեան Յեսու ու Իսրայէլի որդիներուն ցեղերուն նահապետները Սելովի մէջ Տէրոջը առջև, ժողովքի խորանին դրանը քով, վիճակով բաժնեցին. ու երկիրը բաժնելը լմնցուցին։