Ապաստանի քաղաքները

1Եւ Տէրը խօսեցաւ Յեսուի՝ ըսելով, 2Խօսէ Իսրայէլի որդիներուն ու ըսէ, Մովսէսի ձեռքով այն իմ ձեզի ըսած ապաստանի քաղաքներս ձեզի համար որոշեցէք: 3Որպէս զի սխալմամբ ու անգիտութեամբ մարդ զարնող սպաննողը հոն փախչի. ու անոնք ձեզի ապաստանարան ըլլան արեան վրէժխնդիր եղողէն. 4Եւ անգիտութեամբ սպաննողը այն քաղաքներէն մէկուն մէջ թող փախչի, ու քաղաքին դուռը կայնի, և այն քաղաքին ծերերուն իր իրաւունքը խօսի, որպէս զի լսեն. ու անոնք զանիկա քաղաքին մէջ իրենց քով առնելով՝ անոր տեղ մը տան, որպէս զի իրենց հետ բնակի։ 5Ու երբ արեան վրէժխնդիրը անոր ետեւէն իյնայ, սպաննողը անոր ձեռքը չտան. քանզի անիկա իր դրացին անգիտութեամբ մեռցուցեր է, և առաջուընէ անոր դէմ թշնամութիւն մը չունէր։ 6Եւ անիկա այն քաղաքին մէջ պիտի բնակի, մինչև որ դատաստանի համար ժողովքին առջև կայնի, ու մինչև որ այն օրերը եղող քահանայապետը մեռնի. ետքը սպաննողը թող դառնայ, իր քաղաքը ու իր տունը երթայ, այսինքն այն քաղաքը ուրկէ փախեր էր։ 7Ուստի Գալիլեայի մէջ Կադէսը զատեցին Նեփթաղիմի լեռնակողմը, Սիւքէմը Եփրեմի լեռնակողմը, և Կարիաթ-արբան՝ այսինքն Քեբրոնը՝ Յուդայի լեռնակողմը։ 8Ու Երիքովի դիմաց Յորդանանու անդիի կողմը դէպ ի արեւելք՝ Ռուբէնի ցեղէն՝ անապատին դաշտին մէջ Բոսորը, և Գադի ցեղէն՝ Գաղաադու մէջ Ռամովթը, ու Մանասէի ցեղէն՝ Բասանի մէջ Գովղանը տուին։ 9Բոլոր Իսրայէլի որդիներուն համար ու անոնց մէջ բնակող օտարականին համար որոշուած քաղաքները ասոնք են. որպէս զի ամէն ով որ սխալմամբ մարդ մեռցնէ, հոն փախչի, ու արեան վրեժխնդրին ձեռքով չմեռնի, մինչև որ դատաստանի համար ժողովքին առջև չկայնի։