Յեսու Սիւքէմի մէջ ժողովուրդին

1Եւ Յեսու Իսրայէլի ամէն ցեղերը Սիւքէմի մէջ ժողվեց, ու Իսրայէլի ծերերը, իշխանները, դատաւորները և ոստիկանները կանչեց. ու անոնք Աստուծոյ առջև կայնեցան։ 2Եւ Յեսու բոլոր ժողովուրդին ըսաւ, Իսրայէլի Տէր Աստուածը այսպէս կ’ըսէ. Առաջ ձեր հայրերը, Աբրահամի հայրը ու Նաքովրի հայրը Թարա, Գետին անդիի կողմը բնակեցան, և օտար աստուածներ պաշտեցին։ 3Ու ես ձեր հայրը Աբրահամը Գետին անդիի կողմէն առի, ու զանիկա Քանանու բոլոր երկրին մէջ պտըտցուցի, և անոր սերունդը շատցուցի, ու Իսահակը անոր տուի. 4Եւ Իսահակի Յակոբը ու Եսաւը տուի. ու Եսաւի Սէիր լեռը ժառանգութիւն տուի. և Յակոբ ու անոր որդիները Եգիպտոս իջան։ 5Եւ Մովսէսը ու Ահարոնը ղրկելով Եգիպտոսը զարկի, (ինչպէս անոր մէջ ըրի,) ետքը ձեզ հանեցի։ 6Ուստի ես ձեր հայրերը Եգիպտոսէ հանեցի, և դուք ծովը եկաք. ու Եգիպտացիները կառքերով ու ձիաւորներով մինչև Կարմիր ծովը ձեր հայրերուն ետեւէն ինկան։ 7Այն ատեն անոնք Տէրոջը աղաղակեցին, և անիկա ձեր ու Եգիպտացւոց մէջտեղ խաւար ձգեց, ու ծովը անոնց վրայ բերելով զանոնք ծածկեց. և ձեր աչքերը Եգիպտոսի մէջ ըրած բաներս տեսան. ու շատ ժամանակ անապատին մէջ բնակեցաք։ 8Ետքը ձեզ բերի Յորդանանու անդիի կողմը բնակող Ամօրհացւոց երկիրը, ու ձեզի հետ պատերազմ ըրին. և զանոնք ձեր ձեռքը տուի, ու անոնց երկիրը ժառանգեցիք. և զանոնք ձեր առջեւէն բնաջինջ ըրի։ 9Ետքը Մովաբի թագաւորը Սեպփօրեան Բաղակ ելաւ, ու Իսրալէլի դէմ պատերազմ ըրաւ, և մարդ ղրկեց Բէովրեան Բաղաամը կանչելու, որպէս զի ձեզ նզովէ. 10Բայց չուզեցի Բաղաամի մտիկ ընել. ու անիկա ձեզ բոլորովին օրհնեց, և անոր ձեռքէն ձեզ ազատեցի։ 11Ետքը Յորդանանէ անցնելով Երիքով եկաք, ու Երիքովի բնակիչները, Ամօրհացիները, Փերեզացիները, Քանանացիները, Քետացիները, Գերգեսացիները, Խեւացիները ու Յեբուսացիները ձեզի դէմ պատերազմ ըրին, ու զանոնք ձեր ձեռքը տուի. 12Եւ ձեր առջեւէն իշամեղուները ղրկեցի, որոնք զանոնք, այսինքն Ամօրհացւոց երկու թագաւորները, ձեր առջեւէն վռնտեցին. ոչ քու սրովդ և ոչ քու աղեղովդ վռնտուեցան. 13Ու ձեզի երկիր մը տուի, որուն մէջ դուք չաշխատեցաք, և քաղաքներ՝ զորոնք դուք չշինեցիք, ու անոնց մէջ կը բնակիք. և կ’ուտէք այն այգիներէն ու ձիթենիներէն զորոնք դուք չտնկեցիք։ 14Ուստի հիմա դուք Տէրոջմէն վախցէք, և անոր հաւատարմութեամբ ու ճշմարտութեամբ ծառայութիւն ըրէք, և այն աստուածները, որոնց ձեր հայրերը Գետին անդիի կողմը ու Եգիպտոսի մէջ ծառայութիւն ըրին, մէկդի ձգեցէք, և Տէրը պաշտեցէք։ 15Բայց եթէ Տէրոջը ծառայութիւն ընելը ձեզի հաճոյ չերևնար, ձեզի ընտրեցէք այսօր թէ ո՛վ պիտի պաշտէք. Գետին անդիի կողմը ձեր հայրերուն պաշտած աստուածնե՞րը, թէ Ամօրհացւոց աստուածները որոնց երկրին մէջ դուք կը բնակիք. բայց ես ու իմ տունս Եհովան պիտի պաշտենք։ 16Եւ ժողովուրդը պատասխան տուաւ ու ըսաւ, Քա՛ւ լիցի որ մենք Եհովան թողունք և ուրիշ աստուածներ պաշտենք. 17Քանզի Եհովա ինքն է մեր Աստուածը, որ մեզ ու մեր հայրերը Եգիպտոսի երկրէն, ծառայութեան տունէն, հանեց, և ինք մեր աչքերուն առջև այս մէծ նշաններն ըրաւ, ու մեզ պահեց մեր ամէն գացած ճամբուն մէջ և ամէն ազգերուն մէջ, որոնց մէջէն անցանք։ 18Ու Եհովա բոլոր ազգերը ու այս երկրին մէջ բնակող Ամօրհացիները մեր առջեւէն վռնտեց. մենք ալ Եհովան պիտի պաշտենք, որովհետև մեր Աստուածը ինքն է։ 19Եւ Յեսու ժողովուրդին ըսաւ, Դուք չէք կրնար Եհովան պաշտել, քանզի անիկա սուրբ Աստուած է. ու անիկա նախանձոտ Աստուած ըլլալով՝ ձեր յանցանքները ու մեղքերը չներեր։ 20Քանզի երբ Եհովան թողուք ու օտար աստուածները պաշտէք, այն ատեն պիտի դառնայ, ու ձեզի բարիք ընելու տեղ ձեզ չարչարելով բնաջինջ պիտի ընէ։ 21Եւ ժողովուրդը Յեսուի ըսաւ, Ոչ, հապա մենք Եհովան պիտի պաշտենք։ 22Ու Յեսու ժողովուրդին ըսաւ, Դուք ձեր անձերուն վկայ էք, որ դուք ձեզի Եհովան ընտրեցիք՝ զանիկա պաշտելու համար. (ու անոնք ըսին, Վկայ ենք.) 23Ուրեմն հիմա ձեր մէջ եղած օտար աստուածները վերցուցէք, և ձեր սիրտը Իսրայէլի Տէր Աստուծոյն դարձուցէք։ 24Ու ժողովուրդը Յեսուի ըսաւ, Մենք մեր Տէր Աստուածը պիտի պաշտենք, ու անոր խօսքը մտիկ ընենք։ 25Եւ նոյն օրը Յեսու ժողովուրդին հետ ուխտ ըրաւ, ու Սիւքէմի մէջ անոր կանոն ու դատաստան դրաւ։ 26Եւ Յեսու այս խօսքերը Աստուծոյ օրինաց գիրքին մէջ գրեց, ու մեծ քար մը առաւ, և զանիկա Տէրոջը սրբարանին քով եղած բեւեկնիին տակ կանգնեց։ 27Ու Յեսու բոլոր ժողովուրդին ըսաւ, Ահա այս քարը մեզի վկայ ըլլայ, քանզի ասիկա Տէրոջը մեզի հետ խօսած բոլոր խօսքերը լսեց. ուստի ասիկա ձեզի վկայ ըլլայ, որպէս զի չըլլայ թէ ձեր Աստուածը ուրանաք։ 28Ետքը Յեսու ժողովուրդը արձակեց, ու ամէն մարդ իր ժառանգութեանը գնաց։

Յեսու և Եղիազար կը մեռնին

29Եւ այս բաներէն ետքը Տէրոջը ծառան Նաւեան Յեսու մեռաւ, հարիւր տասը տարեկան ըլլալով. 30Ու զանիկա իր ժառանգութեանը սահմանին մէջ Գաաս լեռան հիւսիսային կողմը՝ Եփրեմի լեռը Թամնաթ-սարայի մէջ թաղեցին։ 31Եւ Յեսուի բոլոր օրերուն մէջ, ու Յեսուէ ետքը ողջ մնացող և Իսրայէլի համար Տէրոջը ըրած ամէն գործերը գիտցող ծերերուն բոլոր օրերուն մէջ, Իսրայէլ Տէրոջը ծառայութիւն ըրաւ։ 32Եւ Յովսէփի ոսկորները, զորոնք Իսրայէլի որդիները Եգիպտոսէ հաներ էին, Սիւքէմի մէջ թաղեցին ագարակին այն մասին մէջ զոր Յակոբ Սիւքէմի հօրը Եմովրի որդիներէն հարիւր կտոր արծաթի ծախու առեր էր. ու անիկա Յովսէփի որդիներուն ժառանգութիւն եղաւ։ 33Ահարոնի որդին Եղիազար ալ մեռաւ, ու զանիկա Եփրեմի լեռը, անոր որդւոյն Փենէհէսի տրուած բլուրին վրայ թաղեցին։