Երիքովի անկումը

1Ու Երիքով Իսրայէլի որդիներուն պատճառաւ ամուր կերպով մը փակուած էր. ելլող ու մտնող չկար։ 2Եւ Տէրը Յեսուի ըսաւ, Նայէ, Երիքովը ու անոր թագաւորը և զօրաւոր կտրիճները քու ձեռքդ տուի։ 3Ուստի ամէն պատերազմական մարդիկը քաղաքին բոլորտիքը դառնալով՝ մէկ անգամ քաղաքին բոլորտիքը պտըտիք. վեց օր այսպէս ընես։ 4Եւ տապանակին առջև եօթը քահանայ եօթը Յոբելեան փողերը առնեն. ու եօթներորդ օրը քաղաքին բոլորտիքը եօթը անգամ պտըտիք, և քահանաները փողերը հնչեցնեն։ 5Ու երբ Յոբելեան եղջիւրները երկար հնչեցնեն, և դուք փողերուն ձայնը լսէք, բոլոր ժողովուրդը մեծ աղաղակ մը հանէ. և քաղաքին պարիսպները վար պիտի իյնան, ու ժողովուրդին ամէն մէկը շիտակ յառաջ երթալով ներս պիտի մտնէ։ 6Եւ Նաւէի որդին Յեսու քահանաները կանչեց ու անոնց ըսաւ, Ուխտին տապանակը վերցուցէք, ու Տէրոջը տապանակին առջեւէն եօթը քահանայ եօթը Յոբելեան փողեր առնեն։ 7Ետքը ժողովուրդին ըսաւ, Անցէք ու քաղաքին բոլորտիքը պտըտեցէք, և զինուորները Տէրոջը տապանակին առջև անցնին։ 8Ու երբ Յեսու ժողովուրդին պատուիրեց, եօթը քահանաները, որոնք եօթը Յոբելեան փողերը ունէին, Տէրոջը առջև անցնելով փողերը հնչեցուցին, ու Տէրոջը ուխտին տապանակը անոնց ետեւէն կ’երթար։ 9Եւ զինուորները փողերը հնչեցնող քահանաներուն առջեւէն կ’երթային, բայց վերջապահները՝ տապանակին ետեւէն ու քահանաները փողերը հնչեցնելով կ’երթային։ 10Եւ Յեսու ժողովուրդին պատուիրելով՝ ըսաւ, Բնաւ աղաղակ մի հանէք, և ձայներնիդ չլսուի, ու ձեր բերնէն խօսք մը չելլէ, մինչև այն օրը որ ես ձեզի ըսեմ թէ Աղաղակ հանեցէք. այն ատեն աղաղակեցէք։ 11Ուստի Տէրոջը տապանակին քաղաքին բոլորտիքը մէկ անգամ պտըտելէն ետև բանակը դարձան, ու գիշերը բանակին մէջ մնացին։ 12Եւ Յեսու առտուանց կանուխ ելաւ, ու քահանաները Տէրոջը տապանակը վերցուցին։ 13Եւ եօթը Յոբելեան փողերը կրող եօթը քահանաները Տէրոջը տապանակին առջեւէն կ’երթային՝ փողերը հնչեցնելով, ու զինուորները անոնց առջեւէն կ’երթային, ու վերջապահները՝ Տէրոջը տապանակին ետեւէն, եւ քահանաները փողերը հնչեցնելով կ’երթային։ 14Երկրորդ օրն ալ քաղաքին բոլորտիքը մէկ անգամ պտըտելով բանակը դարձան. վեց օր այսպէս ըրին։ 15Ու եօթներորդ օրը կանուխ ելան՝ արշալոյսին ծագած ատենը, ու քաղաքին բոլորտիքը եօթը անգամ պտըտեցան նոյն կերպով. միայն թէ այն օրը քաղաքին բոլորտիքը եօթը անգամ պտըտեցան։ 16Ու եօթներորդ անգամին երբ քահանաները փողերը հնչեցուցին, Յեսու ժողովուրդին ըսաւ, Աղաղակեցէք, քանզի Տէրը այս քաղաքը ձեր ձեռքը տուաւ։ 17Եւ քաղաքը ու բոլոր անոր մէջ եղածը Տէրոջմէ նզովուած ըլլան, միայն Ռախաբ պոռնիկը մեր ղրկած լրտեսները պահելուն համար ողջ մնայ, թէ՛ ինք և թէ՛ իրեն հետ տանը մէջ բոլոր եղողները։ 18Բայց դուք ամէն կերպով զգուշանաք նզովուածէն, չըլլայ որ նզովուածէն առնելով դուք ալ նզովուած ըլլաք, ու Իսրայէլի բանակը նզովքի մէջ ձգելով՝ զանիկա նեղութեան հանդպցնէք։ 19Եւ բոլոր արծաթը ու ոսկին և պղնձէ ու երկաթէ ամանները Տէրոջը համար սուրբ ըլլան, Տէրոջը գանձը մտնեն։ 20Ուստի ժողովուրդը աղաղակեց, որովհետև փողերը հնչուեցան. ու երբ ժողովուրդը փողերուն ձայնը լսեց, ու ժողովուրդը բարձրաձայն աղաղակեց, պարիսպները վար ինկան. և ժողովուրդին ամէն մէկը շիտակ յառաջ քաղաքը մտնելով՝ քաղաքը առին: 21Ու բոլոր քաղաքին մէջ եղողը, այր և կին, երիտասարդ և ծեր, արջառ, ոչխար ու էշ սուրի բերնէ անցընելով կորսնցուցին։ 22Եւ Յեսու այն երկիրը լրտեսող երկու մարդոցն ըսաւ, Այն պոռնիկ կնոջ տունը գացէք, ու ինչպէս անոր երդում ըրիք, կինը ու անոր ամէն ունեցածը անկէ դուրս հանեցէք։ 23Ուստի այն լրտես երիտասարդները գացին, ու Ռախաբը և անոր հայրը ու մայրը ու եղբայրները և անոր ամէն ունեցածը դուրս հանեցին, ու անոր բոլոր ազգատոհմն ալ դուրս հանեցին, և զանոնք Իսրայէլի բանակին դուրսը կեցուցին։ 24Ու քաղաքը և բոլոր անոր մէջ եղածը կրակով այրեցին, միայն արծաթը ու ոսկին և պղնձէ ու երկաթէ ամանները Տէրոջը տանը գանձին մէջ դրին։ 25Այսպէս Յեսու ողջ պահեց Ռախաբ պոռնիկը ու անոր հօրը տունը և անոր ամէն ունեցածը, ու անիկա Իսրայէլի մէջ բնակեցաւ մինչև այսօր. քանզի անիկա պահեց այն լրտեսները զորոնք Յեսու ղրկեր էր Երիքովը լրտեսելու համար։ 26Եւ այն ատեն Յեսու երդում ընելով՝ ըսաւ, Տէրոջը առջև անիծեալ ըլլայ այն մարդը՝ որ ելլէ ու այս Երիքով քաղաքը շինէ. իր անդրանիկով անոր հիմերը դնէ, ու անոր դռներն ալ իր պզտիկ տղով կանգնէ։ 27Եւ Տէրը Յեսուի հետ էր, ու անոր համբաւը բոլոր երկրին մէջ տարածուեցաւ։