Աքարի մեղքը

1Բայց Իսրայէլի որդիները նզովքի վրայով յանցանք գործեցին. քանզի Յուդայի ցեղէն Զարայի որդւոյն Զարդիր որդւոյն Քարմիի որդին Աքար նզովուածէն առաւ, ու Տէրոջը բարկութիւնը Իսրայէլի որդիներուն վրայ բորբոքեցաւ։ 2Եւ Յեսու Երիքովէ մարդիկ ղրկեց դէպ ի Գայի, որ Բեթաւանի մօտ է՝ Բեթէլի արեւելեան կողմը, և խօսեցաւ անոնց՝ ըսելով, Ելէք ու այն երկիրը լրտեսեցէք, և այն մարդիկը ելան ու Գային լրտեսեցին։ 3Եւ Յեսուի դարձան ու անոր ըսին, Բոլոր ժողովուրդը չելլէ, միայն երկու կամ երեք հազար մարդու չափ ելլեն ու Գային զարնեն բոլոր ժողովուրդը հոն տանելով մի յոգնեցներ. քանզի անոնք քիչուոր են։ 4Ուստի ժողովուրդէն երեք հազարի չափ մարդ հոն ելան, բայց Գայիի մարդոց առջեւէն փախան, 5Եւ Գայիի մարդիկը անոնցմէ երեսունըվեց մարդու չափ զարկին, քանզի զանոնք դրանը առջեւէն մինչև Սեբարիմ հալածեցին, ու զառիվայրին վրայ զանոնք զարկին. ուստի ժողովուրդին սիրտը հալեցաւ ու ջուրի պէս եղաւ։ 6Եւ Յեսու իր հանդերձները պատռելով Տէրոջը տապանակին առջև երեսին վրայ գետինը ինկաւ մինչև իրիկուն, թէ՛ ինք և թէ՛ Իսրայէլի ծերերը, ու իրենց գլխուն վրայ հող ցանեցին։ 7Եւ Յեսու ըսաւ, Ոհ, Տէր Եհովա, ինչո՞ւ համար այս ժողովուրդը Յորդանանու ասդիի կողմը անցուցիր, որպէս զի մեզ Ամօրհացւոց ձեռքը մատնես ու մեզ կորսնցնես. երանի՜ թէ Յորդանանու անդիի կողմը գոհ ըլլալով մնայինք։ 8Ոհ, Տէր, Իսրայէլ իր թշնամիներուն առջև կռնակ դարձնելէն ետև՝ ալ ես ի՞նչ ըսեմ: 9Որովհետև Քանանացիները ու երկրին բոլոր բնակիչները լսելով՝ մեզ պիտի պաշարեն. ու մեր անունը երկրի վրայէն բոլորովին պիտի վերցնեն, այն ատեն քու մեծ անունդ ի՞նչ պիտի ընես։ 10Եւ Տէրը Յեսուի ըսաւ, Ոտքի վրայ ելիր. ինչո՞ւ համար այսպէս երեսիդ վրայ ինկեր ես. 11Իսրայէլ մեղք գործեց, և իմ անոնց հրամայած ուխտս զանց ըրին. քանզի նզովուածէն առին, ու գողութիւն ըրին և սուտ զրուցեցին, ու նաև իրենց կարասիներուն մէջ դրին. 12Ուստի Իսրայէլի որդիները պիտի չկրնան իրենց թշնամիներուն առջև կենալ. իրենց թշնամիներուն առջև կռնակ պիտի դարձնեն, քանզի նզովուած եղան. և ալ ձեզի հետ պիտի չըլլամ, եթե դուք նզովուածը ձեր մէջէն բնաջինջ չընէք։ 13Ելիր, ժողովուրդը սրբէ, ու ըսէ, Վաղուան համար սրբուեցէք, քանզի Իսրայէլի Տէր Աստուածը այսպէս կ’ըսէ, Ով Իսրայէլ, ձեր մէջ նզովուած կայ. մինչև որ նզովուածը ձեր մէջէն չվերցնէք, քու թշնամիներուդ առջև պիտի չկրնաս կենալ։ 14Ուստի առտուանց ձեր ցեղերով մօտենաք, ու Տէրը ո՛ր ցեղը վիճակով բռնելու ըլլայ, անիկա իր ազգատոհմներով մօտենայ. և Տէրը ո՛ր ազգատոհմը բռնելու ըլլայ, անիկա իր տուներով մօտենայ, ու Տէրը ո՛ր տունը բռնելու ըլլայ, անիկա իր մարդոցմով մօտենայ, 15Եւ ով որ նզովուածով բռնուի, կրակով պիտի այրուի, թէ՛ ինք և թէ՛ իր ամէն ունեցածը, քանզի Տէրոջը ուխտը զանց ըրաւ, ու Իսրայէլի մէջ անզգամութիւն ըրաւ: 16Ուստի Յեսու առտուանց կանուխ ելաւ, ու Իսրայէլը իր ցեղերովը մօտեցուց, և Յուդայի ցեղը բռնուեցաւ. 17Ու Յուդայի ազգատոհմները մօտեցուց, և Զարայեանց ազգատոհմը բռնուեցաւ. ու Զարայեանց տոհմը իր մարդոցմովը մօտեցուց, և Զաբդի բռնուեցաւ. 18Ետքը անոր տունը իր մարդոցմովը մօտեցուց, և Յուդայի ցեղէն Զարայի որդւոյն Զաբդիի որդւոյն Քարմիի որդին Աքար բռնուեցաւ։ 19Այն ատեն Յեսու Աքարի ըսաւ, Որդիս, հիմա Իսրայէլի Տէր Աստուծոյն փառք տուր, ու քու մեղքդ անոր խոստովանէ, և քու ըրածդ հիմա ինծի յայտնէ, ինծմէ մի պահեր։ 20Ու Աքար պատասխան տուաւ Յեսուի և ըսաւ, Իրաւցընէ ես Իսրայէլի Տէր Աստուծոյն դէմ մեղք գործեցի, ու այսպիսի այսպիսի բան մը ըրի: 21Այսինքն աւարին մէջ աղուոր բանուած Բաբելոնի վերարկու մը, ու երկու հարիւր սիկղ արծաթ, և յիսուն սիկղի ծանրութեամբ ոսկի լեզու մը տեսայ, ու անոնց ցանկալով առի. և ահա անոնք իմ վրանիս մէջ հողին տակ պահուած են, ու արծաթը անոր տակ է։ 22Ուստի Յեսու լրաբերներ ղրկեց. ու անոնք վրանը վազեցին. և ահա վրանին մէջ պահուած էր այն, ու արծաթը անոր տակ էր. 23Եւ զանոնք վրանին մէջէն առնելով Յեսուի ու բոլոր Իսրայէլի որդիներուն բերին, և զանոնք Տէրոջը առջև դրին։ 24Այն ատեն Յեսու ու իրեն հետ բոլոր Իսրայէլ՝ Զարայեան Աքարը ու այն արծաթը և վերարկուն ու ոսկի լեզուն և անոր տղաքը, աղջիկները, արջառները, էշերը, ոչխարները, վրանը ու անոր ամէն բանը առին, և զանոնք Աքովրի ձորը հանեցին։ 25Ու Յեսու ըսաւ, Ինչո՞ւ համար դուն մեզ նեղեցիր. Տէրը այսօր քեզ պիտի նեղէ ուստի բոլոր Իսրայէլ զանիկա քարերով քարկոծեցին, ու զանոնք քարերով քարկոծելէ ետև կրակով այրեցին։ 26Ետքը անոր վրայ մեծ քարակոյտ մը դիզեցին, որ կը կենայ մինչ այսօր։ Ու Տէրը իր սաստիկ բարկութենէն դադարեցաւ. այս պատճառաւ այն տեղին անունը Աքովրի ձոր ըսուեցաւ մինչև այսօր։