Գայիի գրաւումը և կործանումը

1Եւ Տէրը Յեսուի ըսաւ, Մի վախնար ու մի զարհուրիր. բոլոր պատերազմող մարդիկը քեզի հետ առ, ու ելիր դէպ ի Գայի գնա, ահա Գայիի թագաւորը ու անոր ժողովուրդը և անոր քաղաքը ու անոր երկիրը քու ձեռքդ տուի. 2Եւ Երիքովի ու անոր թագաւորին ըրածիդ պէս Գայիի ու անոր թագաւորին ալ ընես, միայն թէ անոր աւարը ու անասունները ձեզի առնէք։ Քաղաքին ետեւի կողմէն դարաններ պատրաստես։ 3Ուստի Յեսու ու բոլոր պատերազմող մարդիկը ոտք ելան, որպէս զի Գայիի վրայ երթան. և Յեսու երեսուն հազար զօրաւոր մարդ ընտրեց, ու զանոնք գիշերով ղրկեց. 4Եւ անոնց պատուիրելով՝ ըսաւ, Նայեցէք, դուք քաղաքին ետեւէն այն քաղաքին համար դարանի մէջ պիտի նստիք. քաղաքէն շատ մի հեռանաք, և ամէնդ ալ պատրաստ ըլլաք: 5Ու ես ինծի հետ եղող բոլոր ժողովուրդով քաղաքին պիտի մօտենամ. ու երբ անոնք առաջին անգամին պէս մեզի դէմ ելլեն, անոնց առջեւէն պիտի փախչինք. 6Ու անոնք մեր ետեւէն պիտի ելլեն, մինչև որ զանոնք քաղաքէն զատենք. որովհետև անոնք պիտի ըսեն թէ Մեր առջեւէն փախան առաջին անգամին պէս. ու մենք անոնց առջեւէն պիտի փախչինք։ 7Այն ատեն դուք դարանէն ելլէք ու քաղաքը առնէք, քանզի ձեր Տէր Աստուածը զանիկա ձեր ձեռքը պիտի տայ։ 8Ու երբ քաղաքը առնէք, քաղաքը կրակով այրէք. Տէրոջը ըսածին պէս ընէք. ահա ձեզի պատուիրեցի։ 9Եւ Յեսու զանոնք ղրկեց, ու անոնք գացին դարանը նստան Բեթէլի ու Գայիի մէջտեղ, Գայիի արեւմտեան կողմէն, և Յեսու այն գիշերը ժողովուրդին մէջ մնաց։ 10Ու Յեսու առտուանց կանուխ ելաւ ու ժողովուրդը աչքէ անցուց, և ինք Իսրայէլի ծերերուն հետ ժողովուրդին առջեւէն դէպ ի Գայի գնաց: 11Եւ իրեն հետ եղող բոլոր պատերազմական մարդիկն ալ ելան, ու մօտենալով քաղաքին առջև գացին, ու Գայիի հիւսիսային կողմը բանակեցան. և անոնց ու Գայիի մէջտեղ ձոր մը կար։ 12Եւ հինգ հազարի չափ մարդ առաւ, ու զանոնք դարանի մէջ նստեցուց Բեթէլի ու Գայիի մէջտեղ քաղաքին արեւմտեան կողմը։ 13Ու ժողովուրդը քաղաքին հիւսիսային կողմը դրին բոլոր բանակը, ու քաղաքին արեւմտեան կողմը՝ դարանը. և Յեսու այն գիշերը ձորին մէջ գնաց։ 14Ու երբ Գայիի թագաւորը զանիկա տեսաւ, քաղաքին մարդոցմով շուտով ու կանուխ դուրս ելաւ, որպէս զի ինք ու իր բոլոր ժողովուրդը որոշ ժամանակով մը դաշտի վրայ Իսրայէլի դէմ պատերազմին, ու չէր գիտեր որ քաղաքին ետեւը իրեն համար դարան պատրաստուած էր։ 15Եւ Յեսու ու բոլոր Իսրայէլ անոնց առջև զիրենք զարնուածի պէս ցուցնելով՝ անապատին ճամբան փախան։ 16Ու քաղաքին մէջ եղող բոլոր ժողովուրդը ժողվուեցաւ որպէս զի զանոնք հալածեն, ու Յեսուի ետեւէն իյնալով քաղաքէն զատուեցան։ 17Եւ Գայիի ու Բեթէլի մէջ մարդ չմնաց՝ որ Իսրայէլի ետեւէն չելլէ. ուստի քաղաքը բաց թողուցին, ու Իսրայէլի ետևէն ինկան։ 18Եւ Տէրը Յեսուի ըսաւ, Ձեռքդ եղած նիզակը դէպ ի Գայի երկնցուր, քանզի զանիկա քու ձեռքդ պիտի տամ. և Յեսու ձեռքը եղած նիզակը դէպ ի քաղաքը երկնցուց: 19Ու դարանակալները շուտով իրենց տեղէն ելան, և անիկա իր ձեռքը երկնցուցածին պէս, վազեցին քաղաքը մտան ու առին զանիկա, և շուտով մը քաղաքը կրակով բռնկցուցին։ 20Ու Գայիի բնակիչները ետեւնին դարձան տեսան որ ահա քաղաքին ծուխը մինչև երկինք կ’ելլէր. և անոնք հոս կամ հոն փախչելու կարողութիւն չունէին. ու անապատը փախչող ժողովուրդն ալ իր ետեւէն ինկողներուն վրայ դարձաւ։ 21Եւ Յեսու ու բոլոր Իսրայէլ երբ տեսան որ դարանակալները քաղաքը առին, ու քաղաքին ծուխը վեր կ’ելլէր, իրենք ալ ետ դարձան ու Գայիի մարդիկը զարկին։ 22Միւսներն ալ քաղաքէն անոնց դէմը ելան. ուստի մէկ կողմանէ ասոնք՝ ու միւս կողմանէ ալ անոնք ըլլալով, Գայիի մարդիկը Իսրայելացւոց մէջտեղ մնացին, ու զանոնք զարկին մինչև որ անոնցմէ մարդ մը ողջ չմնաց ու չազատեցաւ։ 23Եւ Գայիի թագաւորը ողջ բռնեցին, ու զանիկա Յեսուի բերին։ 24Ու երբ Իսրայելացիք Գայիի բոլոր բնակիչները, զիրենք հալածողները, դաշտին ու անապատին մէջ ջարդեցին, ու անոնց ամէնն ալ սուրի բերնէ իյնալով հատան, բոլոր Իսրայելացիք Գայի դարձան, ու զանիկա սուրի բերնէ անցուցին։ 25Եւ այն օրը ինկածներուն ամէնը, թէ՛ այր մարդ և թէ՛ կին մարդ, տասուերկու հազար էր, այսինքն Գայիի բոլոր մարդիկը։ 26Ու Յեսու նիզակով երկնցուցած ձեռքը ետ չքաշեց մինչև որ Գայիի բոլոր բնակիչները բնաջինջ ըրաւ։ 27Բայց Իսրայելացիք անասունները ու քաղաքին աւարը իրենց առին, Տէրոջը Յեսուի հրամայած խօսքին համեմատ։ 28Եւ Յեսու Գային այրեց, ու զանիկա մշտնջենաւոր աւերակներու դէզ ըրաւ մինչև այսօր։ 29Եւ Գայիի թագաւորը ծառէ մը կախեց մինչև իրիկուն. ու արևին մտնելու ատենը՝ Յեսու հրամայեց որ անոր մեռած մարմինը ծառէն վար իջեցնեն, և զանիկա քաղաքին դրանը առջեւ նետեցին, ու անոր վրայ մեծ քարակոյտ մը դիզեցին, որ կը կենայ մինչև այսօր։

Գեբաղ լեռան վրայ օրենքը կը կարդացուի

30Այն ատեն Յեսու Իսրայէլի Տէր Աստուծոյն սեղան մը շինեց Գեբաղ լեռան վրայ, 31Ինչպէս Տէրոջը ծառան Մովսէս Իսրայէլի որդիներուն պատուիրեր էր. ու Մովսէսի օրինաց գիրքին մէջ գրուածին պէս՝ Յեսու այս սեղանը ամբողջ քարերէ շինեց, որոնց վրայ երկաթ չէր դպած. և անոր վրայ Տէրոջը ողջակէզներ ու խաղաղութեան զոհեր մատուցին։ 32Եւ հոն այն քարերուն վրայ գրեց Մովսէսի օրինաց գիրքին օրինակը զոր Իսրայէլի որդիներուն առջև գրեց։ 33Ու բոլոր Իսրայէլ և անոնց ծերերը ու ոստիկանները և դատաւորները տապանակին մէկ կողմէն ու միւս կողմէն՝ Տէրոջը ուխտին տապանակը վերցնող Ղեւտացի քահանաներուն առջեւէն կ’երթային, թէ՛ օտարականները և թէ՛ բնակները. անոնց կէսը Գարիզին լեռանը կողմը՝ ու կէսն ալ Գեբաղ լեռանը կողմը կայնեցան, ինչպէս Տէրոջը ծառան Մովսէս պատուիրեր էր առաջ որ Իսրայէլի ժողովուրդը օրհնեն։ 34Եւ անկէ ետև օրէնքին բոլոր խօսքերը կարդաց, թէ՛ օրհնութիւնները և թէ՛ անէծքները, ինչ որ գրուած էր օրինաց գիրքին մեջ։ 35Մովսէսի բոլոր պատուիրածներէն բնաւ խօսք մը չմնաց, որ զանիկա Յեսու Իսրայէլի բոլոր ժողովքին և անոնց կիներուն ու տղաքներուն և անոնց մէջ պտըտող օտարականին առջև չկարդայ։