Նադաբին ու Աբիուդին մեղքը

1Եւ Ահարոնի որդիները, Նադաբ ու Աբիուդ, ամէն մէկը իր բուրվառը առաւ, ու անոր մէջ կրակ դրին և վրան խունկ դրին, ու Տէրոջը առջև օտար կրակ մատուցին, զոր ինք պատուիրած չէր անոնց։ 2Եւ Տէրոջը առջեւէն կրակ ելաւ, ու սպառեց զանոնք, և Տէրոջը առջև մեռան: 3Այն ատեն Մովսէս ըսաւ Ահարոնի, Այս է զոր Տէրը խօսեցաւ՝ ըսելով, Ինծի մօտեցողներուն մէջ սուրբ պիտի սեպուիմ, ու բոլոր ժողովուրդին առջև փառաւորուիմ. և Ահարոն լուռ կեցաւ: 4Եւ Մովսէս կանչեց Ահարոնի հօրեղբօրը Ոզիէլի որդիները, Միսայէլը ու Եղիսափանը, և ըսաւ անոնց, Մօտեցէք, ձեր եղբայրները սրբարանին առջեւէն բանակին դուրսիդին վերցուցէք: 5Եւ անոնք մօտեցան, ու Մովսէսի ըսածին պէս՝ զանոնք իրենց շապիկներովը բանակէն դուրս վերցուցին։ 6Եւ Մովսէս ըսաւ Ահարոնի ու անոր որդիներուն, Եղիազարի և Իթամարի, Գլուխնիդ մի բանաք ու հանդերձնիդ մի պատռէք, որպէս զի չմեռնիք, և բոլոր ժողովուրդին վրայ բարկութիւն չգայ. բայց ձեր եղբայրները, Իսրայէլի բոլոր տունը, Տէրոջը ըրած այրումին վրայ թող լան : 7Եւ դուք ժողովքի խորանին դռնէն դուրս մի ելլէք, որպէս զի չմեռնիք. վասն զի Տէրոջը օծման իւղը վրանիդ է. և անոնք Մովսէսի ըսածին պէս ըրին:

Քահանաներուն համար կանոններ

8Եւ Տէրը խօսեցաւ Ահարոնի՝ ըսելով, 9երբ ժողովքի խորանը մտնէք թէ՛ դուն և թէ՛ քու որդիներդ քեզի հետ, գինի կամ օղի չխմէք, որպէս զի չմեռնիք. ասիկա ձեր ազգերուն մեջ յաւիտենական կանոն ըլլայ: 10Որպէս զի սուրբին ու անսուրբին մէջտեղ, և անմաքուրին ու մաքուրին մէջտեղ տարբերութիւն դնէք. 11Եւ որպէս զի Իսրայէլի որդիներուն սորվեցնէք բոլոր կանոնները, զորոնք Տէրը Մովսէսի ձեռքով զրուցած է անոնց։ 12Եւ Մովսէս խօսեցաւ Ահարոնի ու անոր մնացած որդիներուն, Եղիազարի ու Իթամարի. Տէրոջը պատարագներէն աւելցած հացի ընծան առէք, ու սեղանին քով բաղարջ կերէք. վասն զի անիկա ամենասուրբ է: 13Սուրբ տեղը կերէք զանիկա, վասն զի Տէրոջը պատարագներէն քու իրաւունքդ ու քու որդիներուդ իրաւունքն է. քանզի ինծի այսպէս պատուիրած է: 14Եւ երերցնելու երբուծը ու բարձրացնելու, զիստը՝ դուն ու քու որդիներդ և քու աղջիկներդ քեզի հետ մաքուր տեղ մը պիտի ուտեք. վասն զի Իսրայէլի որդիներուն խաղաղութեան զոհերէն քու իրաւունքիդ ու քու որդիներուդ իրաւունքին համար տրուած են: 15Բարձրացնելու զիստը ու երերցնելու երբուծը ճարպին պատարագներովը Տէրոջը առջև երերցնելու համար պիտի բերեն. և Տէրոջը պատուիրածին պէս քուկդ ու քեզի հետ քու որդիներուդ պիտի ըլլայ յաւիտենական կանոնով: 16Եւ Մովսէս մեղքի պատարագին նոխազը զգուշութեամբ փնտռեց, և ահա այրուած էր. ուստի Ահարոնի մնացած որդիներուն, Եղիազարի ու Իթամարի, բարկացաւ՝ ըսելով, 17Ինչո՞ւ մեղքի պատարագը սուրբ տեղը չկերաք. քանզի այս ամենասուրբ է. ու Տէրը տուաւ ձեզի, որպէս զի ժողովքին անօրէնութիւնը վերցնէք ու Տէրոջը առջև անոնց համար քաւութիւն ընէք: 18Ահա անոր արիւնը սրբարանին մէջ չբերուեցաւ. դուք իմ պատուիրածիս պէս անպատճառ սուրբ տեղը ուտելու էիք զայն: 19Եւ Ահարոն ըսաւ Մովսէսի, Ահա այսօր իրենց մեղքի պատարագը ու ողջակէզը Տէրոջը առջև մատուցին, ու գլխուս այսպիսի բաներ եկան. և եթէ այսօր մեղքի պատարագը ուտելու ըլլայի, Տէրոջը առջև հաճելի պիտի ըլլա՞ր արդեօք: 20Եւ երբ Մովսէս զայս լսեց, հաւնեցաւ: (Բ Օր.14:3-21)