Որդեծնութենէ յետոյ կիներու մաքրութիւնը

1Եւ Տէրը խօսեցաւ Մովսէսի՝ ըսելով, 2Խօսէ Իսրայէլի որդիներուն ու ըսէ, Եթէ կին մը սերմ առնէ ու արու զաւակ ծնանելու ըլլայ, եօթը օր անմաքուր պիտի ըլլայ. իր դաշտանին համար զատուելու օրերուն համեմատ անմաքուր պիտի ըլլայ: 3Եւ ութերորդ օրը տղուն անթլփատութեան մարմինը պիտի թլփատուի : 4Եւ անիկա իր մաքրուելուն արիւնովը երեսունուիրեք օր պիտի նստի. ու մինչև իր մաքրուելու օրերուն լմննալը՝ բնաւ սուրբ բանի մը պիտի չդպչի, ոչ ալ սրբարանը մտնէ: 5Բայց եթէ անիկա աղջիկ ծնանելու ըլլայ, երկու շաբաթ անմաքուր պիտի ըլլայ իր դաշտանի ժամանակին պէս, և վաթսունըվեց օր իր մաքրուելուն արիւնովը պիտի նստի: 6Եւ երբ տղայ կամ աղջիկ զաւկի համար իր մաքրուելու օրերը լմննան, ժողովքի խորանին դուռը ողջակէզի համար մէկ տարեկան գառ, ու մեղքի պատարագի համար աղաւնիի ձագ մը կամ տատրակ մր պիտի բերէ, քահանային, 7Որ պիտի մատուցանէ զանիկա Տէրոջը առջև ու քաւութիւն ընէ անոր համար, և անիկա իր արիւնին աղբիւրէն պիտի մաքրուի: Արու կամ էգ զաւակ ծնանողին օրէնքը այս է: 8Եւ եթէ գառ բերելու կարող չէ, երկու տատրակ կամ աղաւնիի երկու ձագ առնէ, մէկը ողջակէզի ու միւսը մեղքի պատարագի համար, և քահանան քաւութիւն ընէ անոր համար, ու անիկա մաքրուի: