Բորոտութենէ մաքրութիւն

1Եւ Տէրը խօսեցաւ Մովսէսի՝ ըսելով, 2Բորոտին օրէնքը այս է իր մաքրուելու օրը. Անիկա քահանային պիտի տարուի . 3Եւ քահանան բանակէն դուրս պիտի ելլէ, ու քահանան պիտի նայի. ու եթէ բորոտին բորոտութեան ախտը բժշկուած է, 4Այն ատեն քահանան պիտի հրամայէ որ մաքրուելու մարդուն համար երկու ողջ և մաքուր թռչուն ու եղեւնափայտ ու կրկնակի կարմիր և զոպայ առնուի։ 5Եւ քահանան պիտի հրամայէ որ թռչունին մէկը հողէ ամանի մը մէջ կենդանի ջուրի վրայ մորթուի։ 6Եւ ողջ թռչունը ու եղեւնափայտը և կրկնակի կարմիրը ու զոպան պիտի առնէ, և ասոնք ողջ թռչունին հետ կենդանի ջուրին վրայ մորթուած թռչունին արեանը մէջ պիտի թաթխէ. 7Եւ բորոտութենէն մաքրուելու մարդուն վրայ եօթը անգամ սրսկէ ու մաքրէ զանիկա և ողջ թռչունը դէպ ի դաշտը արձակէ: 8Եւ մաքրուելու մարդը իր հանդերձները պիտի լուայ, ու իր բոլոր մազերը ածիլէ, և ջրով պիտի լուացուի ու մաքրուի. և անկէ ետև բանակը պիտի մտնէ, ու եօթը օր իր վրանին դուրսիդին պիտի կենայ : 9Եւ եօթներորդ օրը իր բոլոր մազերը ածիլէ, իր գլուխը ու մօրուքը և յօնքերը, այսինքն իր բոլոր մազերը, ածիլէ. և իր լաթերը պիտի լուայ ու իր մարմինը ջրով լուայ ու մաքուր ըլլայ: 10Եւ ութերորդ օրը երկու անարատ արու գառ, ու մէկ տարեկան մէկ անարատ էգ գառ, և հացի ընծայի համար իւղով շաղուած երեք տասանորդ բարակ ալիւր, ու մէկ ճաշակ իւղ պիտի առնէ։ 11Եւ մաքրող քահանան մաքրուելու մարդը ասոնցմով Տէրոջը առջև ժողովքի խորանին դուռը պիտի կայնեցնէ: 12Եւ քահանան արու գառին մէկը պիտի առնէ ու մօտեցնէ յանցանքի պատարագի համար, ու իւղին ճաշակը պիտի առնէ , և զանոնք Տէրոջը առջև երերցնելու ընծայ պիտի ընէ: 13Եւ գառը պիտի մորթէ մեղքի պատարագին ու ողջակէզին մորթուած տեղը, սուրբ տեղը պիտի մորթէ . վասն զի յանցանքի պատարագը մեղքի պատարագին պէս քահանայինն է. ասիկա ամենասուրբ է: 14Եւ քահանան յանցանքի պատարագին արիւնեն պիտի առնէ, ու քահանան մաքրուելու մարդուն աջ ականջին բլթակին վրայ, և անոր աջ ձեռքին մեծ մատին վրայ, ու անոր աջ ոտքին մեծ մատին վրայ պիտի դնէ զայն : 15Եւ քահանան իւղին ճաշակէն քիչ մը իւղ պիտի առնէ, ու իր ձախ ձեռքին մէջ թափէ։ 16Եւ քահանան աջ մատը իր ձախ ձեռքին մէջ եղած իւղին պիտի թաթխէ, ու իր մատովը Տէրոջը առջև եօթը անգամ սրսկէ այն իւղէն։ 17Եւ քահանան իր ձեռքին մէջ մնացած իւղէն մաքրուելու մարդուն աջ ականջին բլթակին վրայ, ու անոր աջ ձեռքին մեծ մատին վրայ, և անոր աջ ոտքին մեծ մատին վրա՝յանցանքի պատարագի արիւնին վրայ պիտի դնէ: 18Եւ քահանան իր ձեռքին մէջ մնացած իւղը մաքրուելու մարդուն գլխուն վրայ պիտի դնէ, ու անոր համար քաւութիւն պիտի ընէ Տէրոջը առջև: 19Ետքը քահանան մեղքի պատարագը պիտի մատուցանէ, և իր անմաքրութենէն մաքրուելու մարդուն համար քաւութիւն ընէ, ու անկէ ետև ողջակէզը մորթէ ։ 20Եւ քահանան ողջակէզը ու հացի ընծան սեղանին վրայ պիտի մատուցանէ, ու անոր համար քաւութիւն ընէ, և անիկա պիտի մաքրուի։ 21Եւ եթէ անիկա աղքատ ըլլայ ու այսչափին իր կարողութիւնը չհասնի, այն ատեն անոր քաւութիւն ընելու համար երերցնելու յանցանքի պատարագի գառնուկ մը, և հացի ընծայի համար իւղով շաղուած տասանորդ մը բարակ ալիւր ու ճաշակ մը իւղ պիտի առնէ. 22Եւ երկու տատրակ կամ աղաւնիի երկու ձագ, զորն որ գտնէ, և մէկը մեղքի պատարագ ու միւսը ողջակէզ ըլլայ։ 23Եւ ութերորդ օրը իր մաքրուելուն համար զանոնք քահանային պիտի բերէ ժողովքի խորանին դուռը Տէրոջը առջև։ 24Եւ քահանան պիտի առնէ յանցանքի պատարագին գառնուկը ու իւղին ճաշակը, և զանոնք Տէրոջը առջև երերցնելու ընծայ մատուցանէ։ 25Եւ յանցանքի պատարագին գառնուկը պիտի մորթէ, ու քահանան յանցանքի պատարագին արիւնէն պիտի առնէ, ու մաքրուելու մարդուն աջ ականջին բլթակին վրայ, անոր աջ ձեռքին մեծ մատին վրայ ու անոր աջ ոտքին մեծ մատին վրայ դնէ զայն։ 26Եւ քահանան իւղէն իր ձախ ձեռքին մէջ պիտի թափէ: 27Եւ քահանան իր աջ մատովը իր ձախ ձեռքին մէջ եղած իւղէն Տէրոջ առջև եօթը անգամ պիտի սրսկէ։ 28Եւ քահանան իր ձեռքին մէջ եղած իւղէն մաքրուելու մարդուն աջ ականջին բլթակին վրայ, ու անոր աջ ձեռքին մեծ մատին վրայ, և անոր աջ ոտքին մեծ մատին վրայ՝ յանցանքի պատարագին արիւնը եղած տեղին վրայ պիտի դնէ։ 29Եւ քահանան իր ձեռքին մէջ մնացած իւղը մաքրուելու մարդուն գլխուն վրայ պիտի դնէ՝ Տէրոջը առջև անոր համար քաւութիւն ընելով։ 30Եւ տատրակներէն կամ աղաւնիի ձագերէն մէկը, զորն որ գտնէ: 31Այսինքն որու որ իր ձեռքը հասնի, մէկը մեղքի պատարագի համար և միւսը ողջակէզի համար՝ հացի ընծային հետ մէկտեղ պիտի մատուցանէ. և քահանան մաքրուելու մարդուն համար քաւութիւն ընէ Տէրոջը առջև։ 32Բորոտութեան ախտ ունեցողին ու իր մաքրուելուն համար կարողութիւն չունեցողին օրէնքը այս է։ 33Եւ Տէրը խօսեցաւ Մովսէսի ու Ահարոնի՝ ըսելով, 34Երբ մտնէք Քանանու երկիրը՝ զոր ձեզի ստացուածք ըլալու պիտի տամ, և ձեր ստացուածքը եղած երկրին մէկ տանը մէջ բորոտութեան հարուածը տալու ըլլամ, 35Այն տանը տէրը պիտի գայ, ու իմացնէ քահանային՝ ըսելով, Ինծի կ’երեւայ որ տանս մէջ ախտ կայ։ 36Եւ քահանան պիտի հրամայէ որ տունը պարպեն, դեռ ինք տեսնելու ներս չմտած, որպէս զի տանը մէջ եղած բաներէն մէ՛կը անմաքուր չըլլայ, ու անկէ ետև քահանան տունը տեսնելու պիտի մտնէ. 37Եւ ախտին նշաններուն պիտի նայի, ու եթէ ախտը տանը պատերուն վրայ քիչ մը կանանչած կամ կարմրած փոս տեղեր ըրեր է, ու անոնք պատին երեսէն խորունկ կ’երեւան, 38Այն ատեն քահանան տունէն պիտի ելլէ տանը դուռը, և եօթը օր տունը պիտի գոցէ։ 39Ու եօթներորդ օրը քահանան նորէն պիտի գայ ու նայի. և եթէ ախտը տանը պատերուն վրայ տարածուած է, 40Այն ատեն քահանան պիտի հրամայէ որ ախտացեալ քարերը հանեն, և քաղաքէն դուրս անմաքուր տեղ մը նետեն զանոնք։ 41Եւ տանը ներսէն շուրջանակի քերել պիտի տայ, ու անոնց քերած հողը քաղաքին դուրսիդին անմաքուր տեղ մը պիտի թափեն ։ 42Եւ ուրիշ քարեր պիտի առնեն ու այն քարերուն տեղը դնեն, և ուրիշ հող պիտի առնեն ու տունը ծեփեն։ 43Եւ եթէ քարերը հանելէ ետքը ու տունը քերելէ և ծեփելէ ետքը ախտը նորէն գայ ու տանը մէջ երեւան ելլէ, 44Այն ատեն քահանան պիտի գայ ու նայի. և եթէ ախտը տանը մէջ տարածուած է, տանը մէջ բորբոքած բորոտութիւն կայ. անմաքուր է այն։ 45Եւ տունը, ասինքն անոր քարերը ու փայտերը ու տանը բոլոր ծեփուած հողը, փլցնէ և քաղաքին դուրսիդին անմաքուր տեղ մը հանէ։ 46Եւ ով որ այն տունը մտնէ անոր բոլոր գոցուած օրերը, մինչև իրիկուն անմաքուր պիտի ըլլա։ 47Եւ այն տունը պառկողը իր հանդերձները պիտի լուայ, ու այն տանը մէջ հաց ուտողը իր հանդերձները պիտի լուայ։ 48Եւ եթէ քահանան գայ ու նայի որ տունը ծեփուելէն ետքը ախտը տանը մէջ տարածուած չէ, այն ատեն քահանան այն տանը մաքուր ըլլալը ծանուցանէ, վասն զի ախտը բժշկուած է։ 49Եւ տանը մաքրութեանը համար երկու թռչուն ու եղեւնափայտ և կրկնակի կարմիր ու զոպայ պիտի առնէ: 50Եւ պիտի մորթէ թռչունին մէկը հողէ ամանի մը մէջ կենդանի ջուրի վրայ: 51Եւ եղեւնափայտը ու զոպան և կրկնակի կարմիրը ու ողջ թռչունը պիտի առնէ, ու զանոնք մորթուած թռչունին արեանը և այն կենդանի ջուրին մէջ պիտի թաթխէ, ու եօթը անգամ տանը վրայ սրսկէ. 52Եւ թռչունին արիւնովը ու այն կենդանի ջրով և այն ողջ թռչունով ու եղեւնափայտով և զոպայով ու կրկնակի կարմիրով պիտի մաքրէ տունը. 53Եւ ողջ թռչունը քաղաքին դուրսիդին դէպ ի դաշտը պիտի արձակէ, ու տանը համար քաւութիւն ընէ, և պիտի մաքրուի այն: 54Բոլոր բորոտութեան ախտին ու գոնջութեան, 55Եւ հանդերձի կամ տան մը բորոտութեան, 56Եւ ուռեցքի ու քոսի և պաղպաջի օրէնքը այս է: 57Բանի մը ո՛ր ատեն անմաքուր ըլլալը ու ո՛ր ատեն անոր մաքրուիլը* սորվեցնելու համար՝ բորոտութեան օրէնքը այս է: