Սրբութեան և արդարութեան օրէնքներ

1Եւ Տէրը խօսեցաւ Մովսէսի՝ ըսելով, 2Խօսէ Իսրայէլի որդիներուն բոլոր ժողովքին ու ըսէ անոնց, Դուք սուրբ եղէք, քանզի ես, ձեր Եհովա Աստուածը, սուրբ եմ: 3Ձեր ամէն մէկը իր մօրմէն ու իր հօրմէն պիտի վախնայ. և իմ շաբաթներս պիտի պահէք. ես եմ Տէրը ձեր Աստուածը: 4Կուռքերուն մի դառնաք, և ձեզի ձուլածոյ աստուածներ մի շինէք. ես եմ Տէրը ձեր Աստուածը: 5Եւ եթէ խաղաղութեան զոհ մատուցանէք Տէրոջը, այնպես մատուցէք որ ընդունելի ըլլայ: 6Զոհը մատուցած օրերնիդ և հետեւեալ օրն ալ պիտի ուտուի. ու երրորդ օրուան մնացածը կրակով պիտի այրուի: 7Եւ եթէ անկէ երրորդ օրը ուտուելու ըլլայ, անիկա պիղծ է, պիտի չընդունուի: 8Եւ զանիկա ուտողը իր անօրէնութիւնը պիտի կրէ, վասն զի Տէրոջը սուրբ բանը պղծեց, ու այն անձը իր ժողովուրդէն պիտի կորսուի: 9Եւ ձեր երկրին հունձքը հնձելու ատեննիդ՝ քու արտիդ եզերքը լման չհնձես, ու քու հունձքէդ ինկած հասկերը չժողվես: 10Եւ քու այգիդ ճռաքաղ չընես, այսինքն այգիիդ մէջ մնացած ողկոյզները չքաղես. զանոնք աղքատին և օտարականին համար թողուս. ես եմ Տէրը ձեր Աստուածը: 11Գողութիւն մի ընէք. սուտ մի զրուցէք, և մէկզմէկ մի խաբէք: 12Եւ իմ անունովս սուտ տեղը երդում մի ընէք, ու ձեր Աստուծոյն անունը մի պղծէք. ես եմ Տէրը: 13Քու դրացիիդ զրկանք մի ըներ, և յափշտակութիւն մի ըներ. քեզի վարձքով բանողին օրական վարձքը մէկ գիշեր մինչև առտու քու քովդ չմնայ: 14Խուլին մի հայհոյեր, ու կոյրին առջև գայթակղութիւն մի դներ, հապա քու Աստուծմէդ վախցիր. ես եմ Տէրը: 15Դատաստանի մէջ անիրաւութիւն մի ընէք. աղքատին աչառութիւն մի ըներ, և մեծը մի շողոքորթեր. քու դրացիդ արդարութիւնով դատէ: 16Քու ժողովուրդիդ մէջ չարախօսութիւն ընելու չպտըտիս. քու ընկերիդ արիւնը չմտնես. ես եմ Տէրը: 17Եղբայրդ քու սրտիդ մէջ չատես. քու դրացիդ անպատճառ յանդիմանես, որպէս զի անոր համար մեղք չկրես: 18Վրէժ չառնես, և քու ժողովուրդիդ որդիներուն ոխ չպահես, հապա քու ընկերդ քու անձիդ պէս սիրես. ես եմ Տէրը: 19Իմ կանոններս պահէք. քու անասունիդ մէկ տեսակը ուրիշ տեսակի հետ զուգաւորել չտաս. քու արտիդ մէջ զանազան սերմ չցանես. և երկու նիւթէ գործուած այլախառն հանդերձ չհագնիս: 20Եւ եթէ մէկը կնոջ մը հետ պառկելով զուգաւորութիւն ընէ, ու անիկա մէկու մը նշանուած աղախինն է ու փրկուած չէ, ոչ ալ անոր ազատութիւն տրուած, անոնք պիտի պատժուին.անոնք պիտի չմեռնին, վասն զի կինը ազատ չէր: 21Եւ մարդը իր յանցանքին պատարագը Տէրոջը պիտի բերէ ժողովքի խորանին դուռը, խոյ մը յանցանքի պատարագի համար: 22Եւ քահանան յանցանքի պատարագին խոյովը Տէրոջը առջև քաւութիւն պիտի ընէ անոր իր ըրած մեղքին համար. և անոր ըրած մեղքը պիտի ներուի իրեն: 23Ու երբ այն երկիրը մտնէք, ու ամէն տեսակ ծառեր տնկէք՝ պտուղը ուտելու համար, այն ատեն անոր պտուղը չթլփատուածի պէս անմաքուր պիտի սեպէք. անիկա ձեզի երեք տարի չթլփատուածի պէս սեպուելով պիտի չուտուի: 24Եւ չորրորդ տարին անոր բոլոր պտուղը Տէրը փառաւորելու համար սուրբ պիտի ըլլայ: 25Եւ հինգերորդ տարին անոր պտուղը պիտի ուտէք, որպէս զի իր արդիւնքը ձեզի համար աւելցնէ. ես եմ Տէրը ձեր Աստուածը: 26Միսը արիւնովը չուտէք. չհմայէք և գուշակութիւն չընէք: 27Ձեր գլուխներուն եզերքի մազերը չկտրէք, ու քու մօրուքիդ եզերքը չաւրես: 28Եւ մեկուն սուգին համար ձեր մարմինին վրայ կտրածներ չընէք, ու ձեր վրայ գիրի նշան չընէք. ես եմ Տէրը: 29Աղջիկդ պոռնիկ ընելով մի պղծէր, որպէս զի երÏիրը պոռնկութեան մէջ չիյնայ, ու երկիրը չարութիւնով չլեցուի: 30Իմ շաբաթներս պահէք, ու իմ սրբարանս յարգէք. ես եմ Տէրը: 31Վհուկներուն մի նայիք, և հմայողներուն բան մի հարցնէք, որպէս զի անոնցմով չպղծուիք. ես եմ Տէրը ձեր Ասուածը: 32Մազը ճերմկածին առջև ոտք ելիր, և ծերը պատուէ, ու քու Աստուծմէդ վախցիր. ես եմ Տէրը: 33Եւ եթէ օտարական մը ձեր երկրին մէջ ձեր քով պանդխտանալու ըլլայ, չնեղէք զանիկա: 34Ձեր քով պանդխտացող օտարկանը ձեր երկրին բնակին պէս ըլլայ ձեզի, և քու անձիդ պէս սիրես զանիկա, վասն զի դուք ալ Եգիպտոսի երկրին մէջ օտարական էիք. ես եմ Տէրը ձեր Աստուածը: 35Դատաստանի մէջ անիրաւութիւն չընէք. ու իմ բոլոր դատաստաններս կանգունի մէջ, կշիռքի մէջ ու չափի մէջ ալ: 36Ձեր կշիռքները լման, ձեր կշիռքի քարերը լման, ձեր արդուն լման ու հիմէնը լման պիտի ըլլայ. ձեզ Եգիպտոսի երկրէն հանող Տէրը, ձեր Աստուածը, ես եմ: 37Ուստի իմ բոլոր կանոններս պահէք, և ընէք զանոնք. ես եմ Տէրը: