Հոգածութիւն ճրագներու

1Եւ Տէրը խօսեցաւ Մովսէսի՝ ըսելով, 2Պատուիրէ Իսրայէլի որդիներուն՝ որ ծեծուած մաքուր ձէթ բերեն քեզի լոյսի համար, որպէս զի միշտ ճրագ վառի: 3Ժողովքի խորանին մէջ, վկայութեանը վարագուրին դուրսիդին, Ահարոն միշտ պիտի պատարագէ զայն՝ իրիկունէ մինչև առտու Տէրոջը առջև վառելու համար. ասիկա ձեր ազգերուն մէջ յաւիտենական կանոն ըլլայ: 4Ճրագները զուտ ոսկի աշտանակին վրայ Տէրոջը առջև միշտ պիտի պատրաստէ: 5Եւ բարակ ալիւր պիտի առնես, ու անով տասուերկու շօթ եփես. ամէն մէկ շօթը երկու տասանորդէ պիտի ըլլայ: 6Եւ զանոնք Տէրոջը առջև մաքուր սեղանին վրայ երկու կարգով պիտի դնես. ամէն մէկ կարգը վեց վեց հատ ըլլայ: 7Եւ ամէն կարգին վրայ զուտ կնդրուկ պիտի դնես, որպէս զի հացին վրայ պատարագի յիշատակ ըլլայ Տէրոջը: 8Իսրայէլի որդիներուն կողմանէ յաւիտենական ուխտով ամէն շաբաթ օր միշտ Տէրոջը առջև զանիկա պիտի կարգադրէ: 9Եւ անիկա Ահարոնի ու անոր որդիներուն պիտի ըլլայ, ու սուրբ տեղը ուտեն զանիկա. վասն զի այն՝ Տէրոջը պատարագներէն յաւիտենական կանոնով ամենասուրբ է անոր: 10Եւ Իսրայէլի որդիներուն մէջ Իսրայելացի կնոջ մը որդին ելաւ, որուն հայրը Եգիպտացի էր. ու այն Իսրայելացի կնոջ որդին Իսրայելացի մարդու մը հետ բանակին մէջ կռուեցաւ. 11Եւ այն Իսրայելացի կնոջ որդին հայհոյեց Տէրոջը անունը ու անիծեց. և Մովսէսի բերին զանիկա. ու անոր մօրը անունը Սողոմիթ էր, Դանի ցեղէն՝ Դաբրիի աղջիկը: 12Եւ բանտարկեցին զանիկա, մինչև որ Տէրոջը հրամանը յայտնուի իրենց: 13Եւ Տէրը խօսեցաւ Մովսէսի՝ ըսելով, 14Այն հայհոյող մարդը բանակէն դուրս հանէ, և բոլոր լսողները ձեռքերնին անոր գլխուն վրայ դնեն, ու բոլոր ժողովքը քարկոծեն զանիկա: 15Եւ պիտի խօսիս Իսրայէլի որդիներուն՝ ըսելով, ով որ իր Աստուածը կ’անիծէ, իր մեղքը պիտի կրէ: 16Եւ Տէրոջը անունը հայհոյողը անշուշտ պիտի մեռցուի. բոլոր ժողովքը անշուշտ պիտի քարկոծեն զանիկա. թէ՛ օտարական ըլլայ և թէ՛ երկրացի, Տէրոջը անունը հայհոյողը պիտի մեռցուի: 17Եւ ով որ մարդ մը կը սպաննէ, անշուշտ պիտի մեռցուի: 18Եւ ան որ անասուն մը կը մեռցնէ, անասունի տեղ անասուն պիտի հատուցանէ: 19Եւ եթէ մարդ մը իր դրացիին խեղութեանը պատճառ ըլլայ, իր ըրածին պէս պիտի ընեն իրեն. 20Բեկման տեղ բեկում, աչքի տեղ աչք, ակռայի տեղ ակռայ. ինչպէս անիկա մարդու մը խեղութիւն պատճառեր է, նոյնպես պիտի ըլլայ իրեն: 21Եւ անասուն մեռցնողը պիտի հատուցանէ զայն. բայց մարդ մեռցնողը պիտի մեռցուի: 22Թէ՛ օտարականին համար և թէ՛ երկրացիին համար՝ ձեր օրէնքը մէկ պիտի ըլլայ. վասն զի ես եմ Տէրը ձեր Աստուածը: 23Եւ Մովսէս խօսեցաւ Իսրայէլի որդիներուն որ այն անիծող մարդը բանակէն դուրս հանեն, և քարերով քարկոծեն զանիկա. ու Իսրայէլի որդիները Տէրոջը Մովսէսի պատուիրածին պէս ըրին: (Բ Օր.15:1-11)