Հնազանդութեան օրհնութիւնները

1Դուք ձեզի չաստուածներ ու կուռքեր պիտի չշինէք, և ձեզի արձաններ պիտի չկանգնէք, և ձեր երկրին մէջ պատկերավոր կոթող պիտի չդնէք՝ անոր երկրպագութիւն ընելու համար. վասն զի ես եմ Տէրը ձեր Աստուածը։ 2Իմ շաբաթներս պիտի պահէք, ու իմ սրբարանս յարգէք. ես եմ Տէրը։ 3Եթէ իմ կանոններովս քալէք, և իմ պատուիրանքներս պահէք ու զանոնք ի գործ դնէք, 4Ես ալ ձեզի անձրեւը ատենին պիտի տամ, և երկիրը իր արդիւնքը պիտի տայ, ու դաշտին ծառերը իրենց պտուղը պիտի տան. 5Եւ ձեր կալը մինչև այգեկութը պիտի հասնի, ու այգեկութը մինչև ցանելու ժամանակ հասնի. և ձեր հացը կուշտ պիտի ուտէք, ու ձեր երկրին մէջ ապահովութեամբ բնակիք։ 6Եւ խաղաղութիւն պիտի տամ երկրին, ու հանգիստ պիտի պառկիք, և վախցնող մը պիտի չըլլայ, ու երկրին չար գազանները պիտի հատցնեմ, և ձեր երկրէն սուր պիտի չանցնի։ 7Եւ ձեր թշնամիները պիտի հալածէք, ու անոնք սրով պիտի իյնան ձեր առջև։ 8Եւ ձեզմէ հինգ հոգին հարիւրաւորը պիտի հալածէ, և ձեզմէ հարիւր հոգին բիւրաւորը պիտի հալածէ, ու ձեր թշնամիները սրով պիտի իյնան ձեր առջև։ 9Եւ ձեզի պիտի նայիմ, ու ձեզ աճեցնեմ և շատցնեմ, ու ձեզի հետ իմ ուխտս հաստատեմ։ 10Եւ հին պաշարը պիտի ուտէք, ու նորին տեղ ընելու համար* հինը դուրս պիտի հանէք։ 11Եւ իմ խորանս ձեր մէջ պիտի դնեմ, ու իմ հոգիս ձեզմէ պիտի չզզուի. 12Եւ ձեր մէջ պիտի քալեմ, ու ձեզի Աստուած ըլլամ, և դուք ինծի ժողովուրդ պիտի ըլլաք։ 13Ես եմ Տէրը ձեր Աստուածը, որ ձեզ Եգիպտացւոց երկրէն հանեցի, որպէս զի անոնց ծառայ չըլլաք, ու ձեր լուծին կապերը խորտակեցի, և ձեզ բարձրագլուխ քալեցուցի։ (Բ Օր.28:15-68)

Անհնազանդութեան պատիժը

14Բայց եթէ ինծի մտիկ չընէք, ու այս բոլոր պատուիրանքներս չկատարէք, 15Եւ իմ կանոններս անարգէք, ու ձեր հոգին իմ դատաստաններէս զզուի, այնպէս որ իմ բոլոր պատուիրանքներս չընէք, ու իմ ուխտս աւրէք, 16Ես ալ ձեզի զայս պիտի ընեմ, այսինքն ձեր վրայ աչք փճացնող և սիրտ մարեցնող վախը, ծիւրական ախտը ու հրատագնապ տենդը պիտի ղրկեմ, և ձեր սերմը պարապ տեղ պիտի սերմանէք. վասն զի ձեր թշնամիները պիտի ուտեն զայն. 17Եւ իմ երեսս ձեր վրայ պիտի տնկեմ, ու ձեր թշնամիներուն առջև պիտի սպաննուիք. ձեզ ատողները պիտի իշխեն ձեր վրայ, ու ձեզ հալածող մը չեղած ատեն պիտի փախչիք: 18Եւ եթէ ասոնցմով ալ ինծի մտիկ չընէք, այն ատեն ձեր մեղքերուն համար ձեզ եօթընպատիկ ալ պիտի պատժեմ: 19Եւ ձեր զօրութեան հպարտութիւնը պիտի խորտակեմ, ու ձեր երկինքը երկաթի պէս և ձեր երկիրը պղնձի պէս պիտի ընեմ: 20Եւ ձեր ոյժը պարապ տեղ պիտի հատնի, ու ձեր երկիրը իր արդիւնքը պիտի չտայ, և երկրին ծառերը իրենց պտուղը չտան: 21Եւ եթէ դուք ինծի հետ հակառակ երթաք ու չուզէք ինծի մտիկ ընել, այն ատեն ձեր մեղքերուն համեմատ եօթնպատիկ հարուածք պիտի աւելցնեմ ձեր վրայ: 22Եւ ձեր վրայ դաշտի գազանները պիտի ղրկեմ, ու ձեզ անզաւակ պիտի ընեն, ու ձեր անասունները ջարդեն, և ձեզ պիտի քիչցնեն. ու ձեր ճամբաները անապատ պիտի դառնան: 23Եւ եթէ ասոնցմով ալ չխրատուիք ինծմէ, ու ինծի հետ հակառակ երթաք, 24Այն ատեն ես ալ ձեզի հետ հակառակ պիտի երթամ, և ես ալ ձեր մեղքերուն համար եօթնապատիկ պիտի պատժեմ ձեզ: 25Եւ ձեր վրայ ուխտիս վրէժը առնող սուրը պիտի ղրկեմ, ու ձեր քաղաքներուն մէջ պիտի ժողվուիք, և ձեր մէջ ժանտախտ պիտի ղրկեմ, ու թշնամիին ձեռքը պիտի մատնուիք: 26Ձեր հացին ցուպը կոտրած ատենս, տասը կին մէկ թոնիրի մէջ պիտի եփեն ձեր հացը, և ձեր հացը կշռով պիտի տրուի ձեզի. ու պիտի ուտէք և չկշտանաք: 27Եւ եթէ ասոնցմով ալ ինծի մտիկ չընէք, հապա հակառակ երթաք ինծի հետ, 28Այն ատեն ես ալ ձեզի հետ հակառակ պիտի երթամ բարկութեամբ, և ձեր մեղքերուն համար եօթնապատիկ պիտի պատժեմ ձեզ. 29Եւ ձեր տղաքներուն միսը պիտի ուտէք, ու ձեր աղջիկներուն միսը ուտէք: 30Եւ ձեր բարձր տեղերը պիտի աւրեմ, ու ձեր արեգական կուռքերը կոտրտեմ, և ձեր դիերը ձեր կուռքերուն դիերուն վրայ պիտի դնեմ, ու իմ հոգիս ձեզմէ պիտի զզուի: 31Եւ ձեր քաղաքները աւերակ՝ ու ձեր սուրբ տեղերը ամայի պիտի ընեմ, և ձեր անոյշ հոտը պիտի չհոտուըտամ: 32Եւ այն երկիրը ամայի պիտի ընեմ, որպէս զի հոն բնակող ձեր թշնամիները զարմանան անոր վրայ: 33Եւ ձեզ ազգերուն մէջ պիտի ցրուեմ, ու ձեր ետեւէն սուր պիտի քաշեմ, և ձեր երկիրը ամայի պիտի ըլլայ, ու ձեր քաղաքները աւերակ: 34Այն ատեն երկիրը իր ամայութեան բոլոր օրերը իր շաբաթները պիտի վայելէ, երբ դուք ձեր թշնամիներուն երկիրը ըլլաք. երկիրը այն ատեն հանգիստ ըլլալով՝ իր շաբաթները պիտի վայելէ. 35Իր ամայութեան բոլոր օրերը պիտի հանգստանայ. քանզի ձեր շաբաթներուն մէջ չէր հանգստանար, երբ անոր վրայ կը բնակէիք: 36Եւ ձեզմէ ողջ մնացածներուն սրտին դողում պիտի բերեմ իրենց թշնամիներուն երկիրներուն մէջ, ու հովէն քշուած տերեւին ձայնը պիտի հալածէ զանոնք, և սուրի բերնէ փախչելու պէս պիտի փախչին անոնք, ու հալածող մը չեղած ատեն պիտի իյնան: 37Եւ հալածող մը չեղած ատեն՝ սուրի երեսէ փախչելու պէս իրարու վրայ պիտի իյնան. և պիտի չկրնաք ձեր թշնամիներուն առջև կայնիլ: 38Եւ ազգերուն մէջ պիտի կորսուիք, ու ձեր թշնամիներուն երկիրը ձեզ պիտի ուտէ: 39Եւ ձեզմէ մնացածները իրենց անօրէնութիւնովը պիտի հալին ձեր թշնամիներուն երկիրներուն մէջ. նաև իրենց հայրերուն անօրէնութիւններովը մէկտեղ պիտի հալին: 40Եւ եթէ խոստովանին իրենց անօրէնութիւնը ու հայրերնուն անօրէնութիւնը՝ ինծի դէմ գործած իրենց յանցանքներովը, և թէ իրենց ինծի հետ հակառակ երթալը: 41Ու նաև իմ անոնց հետ հակառակ երթալս, ու զանոնք իրենց թշնամիներուն երկիրը բերելս. եթէ այն ատեն անոնց անթլփատ սիրտը խոնարհի, և իրենց անօրէնութեան պատիժը յօժարութեամբ ընդունին, 42Այն ատեն պիտի յիշեմ Յակոբի հետ ըրած ուխտս, նաև Իսահակի հետ ըրած ուխտս, և Աբրահամի հետ ըրած ուխտս ալ պիտի յիշեմ, ու այն երկիրն ալ պիտի յիշեմ: 43Եւ յիրաւի այն երկիրը պիտի ձգուի անոնցմէ, ու իր շաբաթները պիտի վայելէ, քանի որ անոնցմէ ամայի պիտի մնայ. և անոնք իրենց անօրէնութեան պատիժը յօժարութեամբ պիտի ընդունին. քանզի իմ դատաստաններս անարգեցին, ու անոնց հոգիները իմ կանոններէս զզուեցան: 44Այսու ամենայնիւ երբ իրենց թշնամիներուն երկիրը ըլլան, զանոնք պիտի չմերժեմ, և զանոնք բոլորովին կորսնցնելու՝ ու անոնց հետ ըրած ուխտս ջնջելու չափ պիտի չզզուիմ անոնցմէ. վասն զի ես եմ Տէրը անոնց Աստուածը: 45Բայց անոնց համար պիտի յիշեմ իրենց նախնիքներուն ուխտը, զորոնք Եգիպտոսի երկրէն հանեցի՝ ազգերուն առջև անոնց Աստուած ըլլալու համար. ես եմ Տէրը: 46Ասոնք են այն կանոնները և դատաստանները ու օրէնքները զորոնք Տէրը տուաւ իր ու Իսրայէլի որդիներուն մէջտեղ Սինա լեռը Մովսէսի ձեռքով: