Ահարոնին և իր որդիներուն օծումը

1Եւ Տէրը խօսեցաւ Մովսէսի՝ ըսելով. 2Առ Ահարոնը ու անոր որդիները իրեն հետ, և զգեստները ու օծման իւղը և մեղքի պատարագին զուարակը ու երկու խոյերը և անխմոր հացին սակառը. 3Եւ ժողվէ բոլոր ժողովքը մէկտեղ ժողովքի խորանին դուռը: 4Եւ Մովսէս Տէրոջը իրեն պատուիրածին պէս ըրաւ. ու ժողովքը մէկտեղ ժողվուեցաւ ժողովքի խորանին դուռը: 5Եւ Մովսէս ըսաւ ժողովքին, Այս է բանը զոր Տէրը պատուիրեց ընելու։ 6Եւ Մովսէս մօտեցուց Ահարոնը ու անոր որդիները, և զանոնք ջրով լուաց. 7Եւ անոր հագցուց շապիկը, ու անոր մէջքը կապեց գօտին, և պատմուճանը հագցուց անոր, ու եփուտը անոր վրայ դրաւ, ու եփուտին ժապաւէնովը փաթթեց ու անով գօտեւորեց զանիկա: 8Եւ լանջապանակը անոր վրայ դրաւ, ու լանջապանակին մէջ Ուրիմը ու Թումիմը դրաւ։ 9Եւ խոյրը անոր գլուխը դրաւ, ու խոյրին վրայ անոր առջեւի կողմէն ոսկի թիթեղը, այսինքն սուրբ պսակը, դրաւ, Տէրոջը Մովսէսի պատուիրածին պէս։ 10Եւ Մովսէս օծման իւղը առաւ, ու խորանը և բոլոր անոր մէջ եղածները օծեց ու սրբեց զանոնք. 11Եւ անկէ սեղանին վրայ սրսկեց եօթը անգամ. և սեղանը ու անոր բոլոր գործիքները, և աւազանը ու անոր խարիսխը օծեց, զանոնք սրբելու համար։ 12Եւ օծման իւղէն Ահարոնի գլխուն վրայ թափելով՝ զանիկա սրբելու համար օծեց։ 13Եւ Մովսէս մօտեցուց Ահարոնի որդիները, ու անոնց շապիկներ հագցուց, և մէջքերնին գօտի կապեց, ու անոնց գլուխը ապարօշներ փաթթեց, Տէրոջը Մովսէսի պատուիրածին պէս։ 14Եւ մեղքի պատարագին զուարակը մօտեցուց. և Ահարոն ու անոր որդիները իրենց ձեռքերը մեղքի պատարագ ըլլալու զուարակին գլխուն վրայ դրին։ 15Եւ մորթեց զանիկա . և Մովսէս արիւնը առաւ, ու իր մատովը սեղանին եղջիւրներուն վրայ դնելով շուրջանակի, մաքրեց սեղանը. ու արիւնը սեղանին յատակը թափեց. և անոր վրայ քաւութիւն ընելու համար սրբեց զայն։ 16Եւ փորոտիքին վրայ եղած բոլոր ճարպը և լեարդին թաղանթը ու երկու երիկամունքը, և անոնց ճարպը առաւ. ու Մովսէս սեղանին վրայ այրեց զանոնք ։ 17Բայց զուարակը, այսինքն անոր մորթը և միսը, ու անոր աղբը, բանակին դուրսիդին կրակով այրեց, Տէրոջը Մովսէսի պատուիրածին պէս։ 18Եւ ողջակէզին խոյը մօտեցուց. և Ահարոն ու անոր որդիները իրենց ձեռքերը խոյին գլխուն վրայ դրին։ 19Եւ մորթեց զանիկա , և Մովսէս շուրջանակի սեղանին վրայ սրսկեց արիւնը. 20Եւ խոյը կտոր կտոր ըրաւ. ու Մովսէս այրեց գլուխը և կտորները ու ճարպը. 21Եւ փորոտիքը ու ոտքերը ջրով լուաց. և Մովսէս բոլոր խոյը սեղանին վրայ այրեց. ասիկա ողջակէզ ու անուշահոտ պատարագ մըն էր Տէրոջը, ինչպէս Տէրը Մովսէսի պատուիրեց։ 22Եւ մօտեցուց միւս խոյը, այսինքն օրհնութեան խոյը. և Ահարոն ու անոր որդիները իրենց ձեռքերը խոյին գլխուն վրայ դրին. 23Եւ մորթեց զանիկա . ու Մովսէս անոր արիւնէն առաւ, և Ահարոնի աջ ականջին բլթակին վրայ, ու անոր աջ ձեռքին մեծ մատին վրայ, և անոր աջ ոտքին մեծ մատին վրայ դրաւ: 24Եւ Ահարոնի որդիները մօտեցուց, ու Մովսէս այն արիւնէն անոնց աջ ականջներուն բլթակներուն վրայ, և անոնց աջ ձեռքերուն մեծ մատերուն վրայ, ու անոնց աջ ոտքերուն մեծ մատերուն վրայ դրաւ. և Մովսէս սեղանին վրայ շուրջանակի սրըսկեց մնացած արիւնը։ 25Եւ ճարպը, դմակը ու փորոտիքին վրայ եղած բոլոր ճարպը և լեարդին թաղանթը ու երկու երիկամունքը և անոնց ճարպը ու աջ զիստը առաւ. 26Եւ Տէրոջը առջև եղած անխմոր հացի սակառէն անխմոր շօթ մը, իւղով հացի շօթ մը ու լաւաշ մը առաւ, և ճարպերուն վրայ ու աջ զստին վրայ դրաւ. 27Եւ ամէնը Ահարոնի ու անոր որդիներուն ձեռքը դնելով՝ զանոնք Տէրոջը առջև երերցնելու ընծայ մատուց: 28Եւ Մովսէս անոնց ձեռքէն առաւ զանոնք, ու սեղանը եղած ողջակէզին վրայ այրեց. ասոնք օրհնութեան համար անուշահոտ պատարագ էին Տէրոջը: 29Եւ Մովսէս երբուծը առաւ ու Տէրոջը առջև երերցընելու ընծայ մատուց. ասիկա օրհնութեան խոյէն Մովսէսի բաժինը եղաւ, Տէրոջը Մովսէսի պատուիրածին պէս։ 30Եւ Մովսէս օծման իւղեն ու սեղանին վրայ եղած արիւնէն առնելով՝ Ահարոնի վրայ ու անոր հանդերձներուն վրայ, և անոր հետ անոր որդիներուն վրայ ու անոր որդիներուն հանդերձներուն վրայ սրսկեց. և Ահարոնը ու անոր հանդերձները և անոր հետ անոր որդիները ու անոր որդիներուն հանդերձները սրբեց։ 31Եւ Մովսէս ըսաւ Ահարոնի ու անոր որդիներուն, Միսը ժողովքի խորանին դրանը քով եռացուցէք, և հոն օրհնութեան սակառին մէջի հացերովը կերէք զանիկա, ինչպէս ինծի պատուիրուեցաւ* ըսելով թէ Ահարոն ու անոր որդիները պիտի ուտեն զանոնք: 32Եւ միսէն ու հացէն աւելցածը կրակով այրեցէք։ 33Եւ եօթը օր ժողովքի խորանին դռնէն դուրս մի ելլէք, մինչև ձեր օրհնութեան օրերուն վերջին օրը. վասն զի ձեր օրհնութիւնը եօթը օր կ’ըլլայ։ 34Այս օրուան եղածին պէս, ձեզի համար քաւութիւն ընելու, Տէրը հրաման ըրաւ այսպես ընել։ 35Ուստի ցորեկը ու գիշերը եօթը օր ժողովքի խորանին դրանը քով պիտի նստիք, ու Տէրոջը պահպանութիւնը պիտի ընէք, որպէս զի չմեռնիք. քանզի այսպէս պատուիրուած է ինծի Տէրոջմէն ։ 36Եւ Ահարոն ու անոր որդիները Տէրոջը Մովսէսի ձեռքով պատուիրած ամէն բաները ըրին: