Յովհաննէս մկրտչին քարոզութիւնը

1Տիբերիոս կայսրին թագաւորութեան տասնըհինգերորդ տարին, Պոնտացի Պիղատոսի Հրէաստանի վրայ կուսակալութիւն ըրած ատենը, ու Հէրովդէսի Գալիլեացւոց վրայ չորրորդապետութեան ատենը, և անոր եղբօրը Փիլիպպոսի Իտուրացւոց և Տրաքոնացւոց երկրին վրայ չորորդապետութեան ատենը, և Լիւսանիայի Աբիլինացւոց վրայ չորրորդապետութեան ատենը, 2Եւ Աննայի ու Կայիափայի քահանայապետութեան ատենը Աստուծոյ խօսքը եղաւ Զաքարիայի որդւոյն Յովհաննէսի վրայ անապատին մէջ: 3Ու անիկա եկաւ Յորդանանու բոլոր կողմերը, և ապաշխարութեան մկրտութիւն կը քարոզէր մեղքերու թողութեան համար. 4Ինչպէս Եսայի մարգարէին խօսքերուն գիրքին մէջ գրուած է` ըսելով, Անապատի մէջ կանչողին ձայնը, Տէրոջը ճամբան պատրաստեցէք, անոր շաւիղները շիտկեցէք. 5Ամէն ձոր պիտի լեցուի, և ամէն լեռ ու բլուր պիտի ցածնայ, և ծուռը պիտի շիտկուի, ու խորտուբորտ տեղերը հարթ ճամբաներ պիտի ըլլան: 6Եւ ամէն մարմին Աստուծոյ փրկութիւնը պիտի տեսնէ: 7Ու իրմէ մկրտուելու ելլող ժողովուրդներուն ըսաւ, Իժերու ծնունդներ, ո՞վ իմացուց ձեզի գալու բարկութենէն փախչիլ: 8Ուրեմն ապաշխարութեան արժանաւոր պտուղներ բերէք, և մի սկսիք ձեր ներսիդին ըսել թէ Մենք մեզի հայր` Աբրահամը ունինք, քանզի կ’ըսեմ ձեզի որ Աստուած կարող է այս քարերէն Աբրահամի որդիներ հանել: 9Ալ հիմա կացինը ծառերուն արմատին քով կը դրուի. ուստի ամէն ծառ որ բարի պտուղ չբերեր, կը կտրուի ու կրակը կը ձգուի: 10Եւ ժողովուրդները կը հարցնէին իրեն ու կ’ըսէին, Ուրեմն ի՞նչ ընենք: 11Պատասխան տուաւ ու ըսաւ անոնց, Ով որ երկու հանդերձ ունի, թող մէկը չունեցողին տայ. և ով որ կերակուր ունի, նոյնպէս ընէ: 12Մաքսաւորներ ալ եկան մկրտուելու, ու ըսին անոր, Վարդապետ, մենք ի՞նչ ընենք: 13Ան ալ ըսաւ անոնց, Ձեզի հրամայուածէն աւելի բան չպահանջէք: 14Զինուորներն ալ կը հարցնէին անոր ու կ’ըսէին, Եւ մենք ի՞նչ ընենք. ըսաւ անոնց, Մէ°կը մի հարստահարէք. և մարդո՛ւ վրայ զրպարտութիւն մի ընէք, ու ձեր թոշակով բաւականացէք: 15Երբ ժողովուրդը կը սպասէր, և ամէնը իրենց սիրտերուն մէջ կը մտածէին Յովհաննէսի համար` թէ ա՞ս է արդեօք Քրիստոսը, 16Յովհաննէս պատասխան տուաւ ամէնուն ու ըսաւ, Ես ձեզ ջրով կը մկրտեմ, բայց ինծմէ աւելի զօրաւորը կու գայ, որուն կօշիկներուն կապերը քակելու արժանի չեմ, անիկա ձեզ պիտի մկրտէ Հոգւով Սրբով և կրակով. 17Որուն հեծանոցը իր ձեռքն է, և իր կալը պիտի մաքրէ, ու ցորենը իր ամբարը պիտի ժողվէ, և յարդը չմարող կրակով պիտի այրէ: 18Ուրիշ շատ բաներ ալ կը քարոզէր` ժողովուրդը յորդորելով: 19Բայց Հերովդէս չորրորդապետը անկէ յանդիմանուելով իր եղբօր կնոջ, Հերովդիայի, համար, և բոլոր չարութիւններուն համար, զորոնք Հերովդէս գործեց, 20Այն ամէնուն վրայ զայս ալ աւելցուց, որ Յովհաննէսը բանտի մէջ գոցեց:

Յիսուսին մկրտութիւնը

21Ու երբ մկրտուեցաւ բոլոր ժողովուրդը, և Յիսուս ալ մկրտուելով` աղօթք կ’ընէր, երկինք բացուեցաւ, 22Եւ Սուրբ Հոգին մարմնաւոր երեւութով աղաւնիի պէս անոր վրայ իջաւ, ու երկինքէն ձայն մը եկաւ, որ կ’ըսէր, Դուն ես իմ սիրելի որդիս, քեզի հաւնեցայ:

Յիսուսին ազգատոհմը

23Եւ ինքն Յիսուս սկսեր էր գրեթէ երեսուն տարեկան ըլլալ, որ (ինչպէս կը կարծուէր) որդին էր Յովսէփի, որ Հեղիի, որ Մատաթի, 24Որ Ղեւիի, որ Մեղքիի, որ Յաննէի, որ Յովսէփի, 25Որ Մատաթիայի, որ Ամովսի, որ Նաւումի, որ Եսղիի, որ Նանգէի, 26Որ Մատթի, որ Մատաթիայի, որ Սէմէիի, որ Յովսէփի, որ Յուդայի, 27Որ Յովհաննայի, որ Րեսայի, որ Զօրաբաբէլի, որ Սաղաթիէլի, որ Ներիի, 28Որ Մեղքիի, որ Ագդիի, որ Կովսամի, որ Եղմովդադի, որ Էրի, 29Որ Յովսէսի, որ Եղիազարի, որ Յովրիմի, որ Մատաթի, որ Ղևիի, 30Որ Սիմէօնի, որ Յուդայի, որ Յովսէփի, որ Յովնանի, որ Եղիակիմի, 31Որ Մելեայի, որ Մայնանի, որ ՄատաթÇայի, որ Նաթանի, որ Դաւիթի, 32Որ Յեսսէի, որ Ովբէթի, որ Բոոսի, որ Սաղմոնի, որ Նաասոնի, 33Որ Ամինադաբի, որ Արամի, որ Եսրոնի, որ Փարէսի, որ Յուդայի, 34Որ Յակոբի, որ Իսահակի, որ Աբրահամի, որ Թարայի, որ Նաքովրի, 35Որ Սերուգի, որ Ռագաւի, որ Փաղէկի, որ Եբերի, որ Սաղայի, 36Որ Կայնանի, որ Արփաքսադի, որ Սէմի, որ Նոյի, որ Ղամէքի, 37Որ Մաթուսաղայի, որ Ենովքի, որ Յարեդի, որ Մաղաղիէլի, որ Կայնանի, 38Որ Ենովսի, որ Սէթի, որ Ադամի, որ Աստուծոյ: