Յովհաննէս մկրտչին պատգամաւորները

1Եւ եղաւ որ երբ Յիսուս լմնցուց իր տասուերկու աշակերտներուն պատուէր տալը, գնաց անկէ անոնց քաղաքներուն մէջ քարոզելու և սորվեցնելու։ 2Իսկ Յովհաննէս բանտին մէջ երբ լսեց Քրիստոսի գործերը, իր աշակերտներէն երկուքը ղրկելով՝ 3Ըսաւ անոր, Դուն ա՞ն ես որ գալու էիր, թէ ուրիշի մը սպասենք։ 4Եւ Յիսուս պատասխան տալով՝ անոնց ըսաւ, Գացէք պատմեցէք Յովհաննէսի ինչ որ կը լսէք ու կը տեսնէք. 5Կոյրերը կը տեսնեն, կաղերը կը քալեն, բորոտները կը մաքրուին, խուլերը կը լսեն, մեռելները յարութիւն կ’առնեն ու աղքատներուն աւետարան կը քարոզուի։ 6Եւ երանի՜ անոր որ իմ վրայովս չգայթակղիր։ 7Ու երբ անոնք գացին, Յիսուս սկսաւ ժողովուրդներուն ըսել Յովհաննէսի համար, Ի՞նչ տեսնելու ելաք անապատին մէջ. եղէ՞գ մը հովէն շարժուած։ 8Հապա ի՞նչ տեսնելու ելաք. փափուկ հանդերձներ հագած մա՞րդ մը. ահա փափուկ հանդերձներ հագնողները թագաւորներուն տուներն են: 9Հապա ի՞նչ տեսնելու ելաք. մարգարէ՞. այո, կ’ըսեմ ձեզի, մարգարէէ մը ալ աւելի: 10Վասն զի ասիկա է՝ որու համար գրուած է, Ահա ես իմ դեսպանս կը ղրկեմ քու երեսիդ առջևէն, որ քու ճամբադ պիտի պատրաստէ քու առջևէդ: 11Ճշմարիտ կ’ըսեմ ձեզի, Կիներէն ծնածներուն մէջ Յովհաննէս մկրտիչէն մեծը ելած չէ. սակայն երկինքի թագաւորութեանը մէջ ամէնէն պզտիկը անկէ մեծ է: 12Ու Յովհաննէս մկրտիչին օրերէն մինչև հիմա երկինքի թագաւորութիւնը ուժով կ’առնուի, և ուժեղները կը յափշտակեն զանիկա: 13Վասն զի բոլոր մարգարէները ու օրէնքը մինչև Յովհաննէս մարգարէութիւն ըրին: 14Եւ եթէ կ’ուզէք ընդունիլ, անիկա է Եղիան՝ որ պիտի գար: 15Ան որ լսելու ականջ ունի, թող լսէ։ 16Բայց որո՞ւ նմանցնեմ այս ազգը. կը նմանի տղոց, որոնք շուկաները նստելով՝ իրենց ընկերներուն կը կանչեն, 17Ու կ’ըսեն, Փող հնչեցուցինք ձեզի՝ ու չխաղացիք, ողբ կարդացինք ձեզի՝ ու կոծ չըրիք։ 18Վասն զի Յովհաննէս եկաւ, ոչ կ’ուտէր և ոչ կը խմէր, ու կ’ըսեն, Դև կայ անոր ներսիդին։ 19Որդին մարդոյ եկաւ, կ’ուտէ ու կը խմէ, և կ’ըսեն, Ահա ուտող և արբեցող մարդ մը, մաքսաւորներու ու մեղաւորներու բարեկամ և իմաստութիւնը արդարացաւ իր որդիներէն։

Անհաւատ քաղաքները

20Այն ատեն սկսաւ նախատել այն քաղաքները, որոնց մէջ գործուեր էին իր հրաշքներէն շատերը, քանզի չապաշխարեցին: 21Վա՜յ քեզ, Քորազին, վա՜յ քեզ, Բեթսայիդա, վասն զի եթէ Տիւրոսի ու Սիդոնի մէջ եղած ըլլային այն հրաշքները որոնք ձեր մէջ եղան, շատոնցմէ քուրձով ու մոխիրով ապաշխարած պիտի ըլային։ 22Բայց ձեզի կ’ըսեմ, Տիւրոսի և Սիդոնի աւելի դիւրին պիտի ըլլայ դատաստանին օրը՝ քան թէ ձեզի։ 23Եւ դուն, Կափառնայում, որ մինչև երկինք բարձրացած ես, մինչև դժոխք պիտի իջնես, վասն զի եթէ Սոդոմի մէջ եղած ըլլային այն հրաշքները որոնք քու մէջդ եղան, իրաւ որ մինչև այսօր դեռ պիտի մնար։ 24Բայց ձեզի կ’ըսեմ որ Սոդոմացւոց երկրին աւելի դիւրին պիտի ըլլայ դատաստանին օրը՝ քան թէ քեզի։

Եկէք ինծի և հանգչեցէք

25Նոյն ժամանակ պատասխան տուաւ Յիսուս ու ըսաւ, Շնորհակալ եմ քեզմէ, ով Հայր, Տէր երկնի և երկրի, որ այս բաները ծածուկ պահեցիր իմաստուններէն ու գիտուններէն, ու տղոց յայտնեցիր. 26Այո, ով Հայր, վասն զի քու առջևդ այսպէս հաճելի եղաւ։ 27Ամէն բան ինծի տրուեցաւ իմ Հօրմէս, ու մէ՛կը չճանչնար Որդին, բայց Հայրը, և մէ՛կը չճանչնար Հայրը, բայց Որդին, և ան՝ որու Որդին կ՛ուզէ յայտնել։ 28Եկէք ինծի, բոլոր յոգնած ու բեռնաւորուածներ, և ես ձեզ պիտի հանգչեցնեմ։ 29Իմ լուծս ձեր վրայ առէք, և ինծմէ սորվեցէք՝ որ հեզ եմ ու սրտով խոնարհ, և ձեր անձերուն հանգստութիւն պիտի գտնէք. 30Վասն զի իմ լուծս քաղցր է, և իմ բեռս թեթև։