Հրաշքի մը խնդրանքը

1Եւ փարիսեցիները ու սադուկեցիները քովը եկան, փորձելով՝ իրմէ կ’ուզէին որ երկինքէն նշան մը ցուցնէ իրենց։ 2Անիկա պատասխան տուաւ ու ըսաւ անոնց, Երբ իրիկուն կ’ըլլայ, կ’ըսէք թէ Պարզ պիտի ըլլայ, վասն զի երկինք կարմրած է։ 3Եւ առտուանց՝ Այսօր մրրիկ պիտի ըլլայ, վասն զի երկինք միգապատ ու կարմրած է։ Կեղծաւորներ, երկինքի երեսը քննել գիտէք, բայց ժամանակներուն նշանները չէ՞ք կրնար գիտնալ։ 4Չար ու շնացող ազգը նշան կ’ուզէ, և ուրիշ նշան պիտի չտրուի անոր, բայց Յովնան մարգարէին նշանը. և թողուց զանոնք ու գնաց։

Փարիսեցիներուն և սադուկեցիներուն խմորը (Մարկ. 8:14-21)

5Ու երբ իր աշակերտները անդիի կողմը անցան, հաց առնելու մոռցեր էին։ 6Եւ Յիսուս անոնց ըսաւ, Նայեցէք ու զգուշացէք փարիսեցւոց ու սադուկեցւոց խմորէն։ 7Անոնք իրենց մէջ կը խորհէին ու կ’ըսէին թէ Հաց չբերինք մեզի հետ։ 8Իսկ Յիսուս անոնց խորհուրդը գիտնալով՝ ըսաւ անոնց, Ձեր մէջ ինչո՞ւ կը խորհիք, թերահաւատներ, թէ հաց չառիք։ 9Տակաւին չէ՞ք հասկնար և չէ՞ք յիշեր հինգ նկանակը՝ հինգ հազարին, ու քանի՛ կողով վերցուցիք. 10Ո՞չ ալ եօթը նկանակը՝ չորս հազարին, ու քանի՛ զամբիւղ վերցուցիք։ 11Ի՞նչպէս չէք հասկնար թէ ես հացի համար չըսի ձեզի՝ փարիսեցւոց և սադուկեցւոց խմորէն զգոյշ կենալ։ 12Այն ատեն հասկցան որ հացի խմորէն զգուշանալ չըսաւ, հապա փարիսեցւոց ու սադուկեցւոց վարդապետութենէն։

Պետրոսի հայտարարութիւնը Յիսուսի մասին

13Եւ Յիսուս Փիլիպպոսի Կեսարիայի կողմերը երթալով՝ իր աշակերտներուն հարցուց ու ըսաւ, Մարդիկ ո՞վ կ’ըսեն թէ եմ ես Որդի մարդոյ։ 14Ու անոնք ըսին, Ոմանք կ’ըսեն թէ Յովհաննէս մկրտիչն ես, ուրիշները՝ Եղիան, ուրիշներն ալ՝ Երեմիան կամ մարգարէներէն մէկը։ 15Ըսաւ անոնց, Հապա դուք ինծի համար ո՞վ կ’ըսէք թէ եմ։ 16Սիմոն Պետրոս պատասխան տուաւ ու ըսաւ, Դուն ես Քրիստոս, կենդանի Աստուծոյ Որդին։ 17Եւ Յիսուս պատասխան տուաւ ու ըսաւ անոր, Երանի՜ քեզ, Սիմոն, Յովնանի որդի. վասն զի մարմինը և արիւնը քեզի չյայտնեց ասիկա, հապա իմ Հայրս՝ որ երկինքն է։ 18Եւ ես քեզի կ’ըսեմ որ Դուն Պետրոս ես, ու այս վէմին վրայ պիտի շինեմ իմ եկեղեցիս, և դժոխքին դռները զանիկա պիտի չյաղթեն։ 19Ու երկինքի թագաւորութեան բանալիները քեզի պիտի տամ. և ինչ որ երկրի վրայ կապես, երկինքի մէջ կապուած պիտի ըլլայ. ու ինչ որ երկրի վրայ արձակես, երկինքի մէջ արձակուած պիտի ըլլայ։ 20Այն ատեն աշակերտներուն պատուիրեց, որ մարդո՛ւ չըսեն թէ ինք Քրիստոսն է։

Յիսուս իր չարչարանքներուն մասին կը խօսի

21Անկէ ետև սկսաւ Յիսուս իր աշակերտներուն ցուցնել թէ պէտք է որ ինք Երուսաղէմ երթայ, ու շատ չարչարանքներ կրէ ծերերէն և քահանայապետներէն ու դպիրներէն, ու սպաննուի, ու երրորդ օրը յարութիւն առնէ։ 22Եւ Պետրոս մէկդի առաւ զանիկա, և սկսաւ յանդիմանել զանիկա ու ըսել, Քա՛ւ լիցի քեզ, Տէր, այդ բանը քեզի չըլլայ։ 23Եւ ինք դառնալով՝ Պետրոսի ըսաւ, Ետիս գնա, սատանայ, ինծի գայթակղութիւն ես դուն. վասն զի Աստուծոյ բաները չես մտածեր, հապա մարդոց բաները։ 24Այն ատեն Յիսուս իր աշակերտներուն ըսաւ, Եթէ մէկը իմ ետևէս գալ կ’ուզէ, թող իր անձը ուրանայ և իր խաչը վերցնէ ու իմ ետեւէս գայ։ 25Վասն զի ով որ կ’ուզէ իր անձը ապրեցնել, պիտի կորսնցնէ զանիկա. և ով որ ինծի համար իր անձը կը կորսնցնէ, պիտի գտնէ զանիկա։ 26Քանզի ի՞նչ կը շահի մարդ մը՝ եթէ բոլոր աշխարհը վաստկի և իր անձը կորսնցնէ, կամ իր անձին համար ի՞նչ ազատչէք պիտի տայ մարդ։ 27Վասն զի Որդին մարդոյ իր Հօրը փառքովը պիտի գայ իր հրեշտակներուն հետ, և այն ատեն ամէն մէկուն իր գործերուն համեմատ հատուցում պիտի ընէ։ 28Ճշմարիտ կ’ըսեմ ձեզի որ Հոս ներկայ եղողներէն մէկ քանիները կան՝ որոնք մահուան համը պիտի չառնեն, մինչև տեսնեն Որդին մարդոյ իր թագաւորութիւնովը եկած։