Այլակերպութիւն

1Եւ վեց օրէն ետև Յիսուս իրեն հետ առաւ Պետրոսը ու Յակոբոսը և անոր եղբայրը Յովհաննէսը, ու զանոնք բարձր լեռ մը հանեց առանձին. 2Եւ անոնց առջև այլակերպեցաւ, ու իր երեսը փայլեցաւ արեգակի պէս, ու իր հանդերձները ճերմըկցան լոյսի պէս։ 3Եւ ահա երևցան անոնց Մովսէս ու Եղիա ու իրեն հետ կը խօսէին։ 4Պատասխան տուաւ Պետրոս ու ըսաւ Յիսուսի, Տէր, աղէկ է որ հոս կենանք. եթէ կ’ուզես, երեք խրճիթ շինենք հոս. մէկը քեզի, և մէկը Մովսէսի, ու մէկը Եղիայի: 5Եւ քանի որ անիկա կը խօսէր, ահա լուսաւոր ամպ մը անոնց վրայ հովանի եղաւ. և ահա ամպէն ձայն մը եկաւ՝ ըսելով, Ատիկա է իմ սիրելի Որդիս, որու հաւներ եմ, ատոր մտիկ ըրէք: 6Աշակերտները երբ լսեցին, երեսնուն վրայ ինկան ու խիստ վախցան: 7Եւ Յիսուս մօտենալով դպաւ անոնց ու ըսաւ, Ելէք ու մի վախնաք: 8Աչքերնին վերցուցին ու մէ՛կը չտեսան, բայց միայն Յիսուսը: 9Ու երբ այն լեռնէն վար կ’իջնէին, Յիսուս պատուիրեց անոնց ու ըսաւ, Այդ տեսիլքը մարդո՛ւ մի զրուցէք, մինչև Որդին մարդոյ մեռելներէն յարութիւն առնէ: 10Եւ իր աշակերտները իրեն հարցուցին ու ըսին, Ուրեմն ինչո՞ւ համար դպիրները կ’ըսեն թէ Պէտք է որ առաջ Եղիա գայ: 11Պատասխան տուաւ Յիսուս ու ըսաւ անոնց, Յիրաւի առաջ Եղիա կու գայ և ամէն բան կարգի կը դնէ: 12Բայց ձեզի կ’ըսեմ որ Եղիա արդէն եկած է, և զանիկա չճանչցան, հապա ինչ որ ուզեցին՝ ըրին անոր. նոյնպէս ալ Որդին մարդոյ անոնցմէ պիտի չարչարուի: 13Այն ատեն հասկցան աշակերտները որ Յովհաննէս մկրտչին համար ըսաւ անոնց:

Յիսուս դիւահար տղայ մը կը բժշկէ

14Ու երբ ժողովուրդին քով եկան, մարդ մը մօտեցաւ անոր, և ծունկի վրայ գալով՝ կ’ըսէր, Տէր, իմ որդւոյս ողորմէ, որ կը լուսնոտի և չարաչար կը տանջուի, քանզի շատ անգամ կրակի մէջ կ’իյնայ, ու շատ անգամ ջուրի մէջ: 15Եւ զանիկա քու աշակերտներուդ բերի, ու չկրցան զանիկա բժշկել: 16Յիսուս պատասխան տուաւ ու ըսաւ, Ով անհաւատ և խոտորեալ ազգ, մինչև ե՞րբ ձեզի հետ պիտի ըլլամ, մինչև ե՞րբ ձեզի պիտի համբերեմ. զանիկա հոս ինծի բերէք: 17Եւ Յիսուս սաստեց անոր, ու դևը անկէ ելաւ, և բժըշկուեցաւ տղան նոյն ժամէն: 18Այն ատեն աշակերտները առանձին Յիսուսի քով երթալով՝ ըսին, Մենք ինչո՞ւ չկրցանք զանիկա հանել: 19Եւ Յիսուս ըսաւ անոնց, Ձեր թերահաւատութեանը համար. քանզի ճշմարիտ կ’ըսեմ ձեզի, Եթէ մանանեխի հատի չափ հաւատք ունենաք, այս լեռանը պիտի ըսէք, Ասկէ անդին փոխադըրուէ, և պիտի փոխադրուի. ու բան մը անհնարին պիտի չըլլայ ձեզի: 20Սակայն այս տեսակը ուրիշ բանով չելլեր, բայց միայն աղօթքով և ծոմապահութեամբ:

Յիսուս դարձեալ իր մահուան մասին կը խօսի

21Ու երբ անոնք Գալիլիայի մէջ կը պտըտէին, Յիսուս ըսաւ անոնց. Որդին մարդոյ պիտի մատնուի մարդոց ձեռքը, 22Եւ զանիկա պիտի մեռցնեն, ու երրորդ օրը յարութիւն պիտի առնէ. ու խիստ տրտմեցան:

Տաճարին տուրքին վճարումը

23Երբ անոնք Կափառնայում եկան, երկդրամեան տուրքը առնողները Պետրոսի եկան ու ըսին, Ձեր վարդապետը երկդրամեանը չը՞ հատուցաներ. և անիկա ըսաւ, Այո, կը հատուցանէ: 24Ու երբ տունը մտաւ, առաջ Յիսուս խօսեցաւ անոր ու ըսաւ, Քեզի ի՞նչպէս կ’երևնայ, Սիմոն. երկրի թագաւորները որմէ՞ կ’առնեն հարկը կամ տուրքը. իրենց որդիներէ՞ն թէ օտարներէն: 25Պետրոս անոր ըսաւ թէ Օտարներէն. Յիսուս անոր ըսաւ, Ուրեմն որդիները ազատ են: 26Բայց չըլլայ որ զանոնք գայթակղեցնենք, գնա ծովը և կարթ ձգէ, ու առաջին ձուկը որ կ’ելլէ՝ առ, և անոր բերանը բանալով սատեր մը պիտի գտնես. զանիկա առ, անոնց տուր ինծի և քեզի համար: