Արևելքէն այցելուներ

1Ու երբ Յիսուս ծնաւ Հրէաստանի Բեթլէհէմին մէջ Հերովդէս թագաւորին օրերը, ահա արևելքէն մոգեր եկան Երուսաղէմ, 2Ու ըսին, Ո՞ւր տեղ է ան՝ որ Հրեաներուն թագաւոր ծնաւ. վասն զի մենք արևելքի մէջ անոր աստղը տեսանք, ու եկանք անոր երկրպագութիւն ընելու։ 3Ու երբ Հերովդէս թագաւորը լսեց, խռովեցաւ, և բոլոր Երուսաղէմ իրեն հետ։ 4Եւ ժողվելով բոլոր քահանայապետները ու ժողովուրդին դպիրները, հարցուց անոնց թէ Քրիստոսը ո՞ւր պիտի ծնանի։ 5Անոնք ալ իրեն ըսին, Հրէաստանի Բեթլէհէմին մէջ. վասն զի այսպէս գրուած է մարգարէին ձեռքով. 6Եւ դուն, Բեթլէհէմ, Յուդայի երկիրը, Յուդայի իշխաններուն մէջ բնաւ պզտիկ մը չես. վասն զի քեզմէ իշխան մը պիտի ելլէ որ իմ Իսրայէլ ժողովուրդս պիտի հովուէ։ 7Այն ատեն Հերովդէս ծածկաբար մոգերը կանչեց, ու ստուգեց անոնցմէ աստղին երևցած ատենը։ 8Եւ զանոնք Բեթլէհէմ ղրկելով՝ ըսավ, Գացէք ստոյգը իմացէք այն մանուկին վրայով, ու երբ գտնէք, ինծի իմացուցէք, որպէս զի ես ալ գամ, անոր երկրպագութիւն ընեմ։ 9Ու երբ անոնք թագաւորէն այս բանը լսեցին, գացին. և ահա այն աստղը զոր արևելքի մէջ տեսեր էին, անոնց առջևէն գնաց, մինչև եկաւ կեցաւ մանուկին եղած տեղին վրայ։ 10Երբ տեսան աստղը, շատ մեծ ուրախութիւնով ուրախացան։ 11Եւ տունը մտնելով՝ տեսան մանուկը իր մօրը Մարիամի հետ, ու ինկան երկրպագութիւն ըրին անոր, և իրենց գանձերը բանալով ընծաներ տուին անոր, ոսկի ու կնդրուկ և զմուռս։ 12Ու հրաման առնելով երազի մէջ, որ նորէն Հերովդէսի չդառնան, ուրիշ ճամբով գացին իրենց երկիրը։

Փախուստ դէպ ի Եգիպտոս

13Ու երբ անկէ գացին անոնք, ահա Տէրոջը հրեշտակը երազի մէջ երևցաւ Յովսէփի ու ըսաւ, Ելիր, առ մանուկը ու անոր մայրը, ու Եգիպտոս փախիր, և հոն կեցիր մինչև ես քեզի ըսեմ, քանզի Հերովդէս պիտի փնտռէ այդ մանուկը կորսնցնելու համար։ 14Ան ալ ելաւ, մանուկը ու անոր մայրը գիշերով առաւ և գնաց Եգիպտոս, ու մինչև Հերովդէսի մահը հոն էր։ 15Որպէս զի կատարուի Տէրոջմէն ըսուածը մարգարէին ձեռքով, որ կ’ըսէ, Եգիպտոսէ կանչեցի իմ որդիս։

Մանուկներու ջարդը

16Այն ատեն երբ տեսաւ Հերովդէս թէ խաբուեցաւ մոգերէն, սաստիկ սրդողեցաւ, ու ղրկեց ջարդեց Բեթլէհէմի և անոր ամէն սահմաններուն մէջ գտնուած բոլոր տղաքը՝ երկու տարեկան և անկէ վար, այն ժամանակին համեմատ զոր մոգերէն ստուգեց։ 17Այն ատեն կատարուեցաւ Երեմիա մարգարէին ձեռքով ըսուածը, որ կ’ըսէ, Ռամայի մէջ ձայն մը լսուեցաւ, ողբ, լաց ու մեծ կոծ. 18Ռաքէլ կուլար իր տղոցը համար, ու չէր ուզեր մխիթարուիլ, վասն զի չկային։

Եգիպտոսէն վերադարձ

19Ու երբ Հերովդէս մեռաւ, ահա Տէրոջը հրեշտակը Եգիպտոս երազի մէջ Յովսէփի երևցաւ, 20Ու ըսաւ, Ելիր, առ մանուկը ու անոր մայրը, և գնա Իսրայէլի երկիրը, քանզի մեռան անոնք որ մանուկին կեանքը կը փնտռէին։ 21Ան ալ ելաւ, մանուկը ու անոր մայրը առաւ և եկաւ Իսրայէլի երկիրը։ 22Իսկ երբ լսեց թէ Արքեղայոս թագաւորեց Հրէաստանի վրայ իր հօրը Հերովդէսի տեղ, վախցաւ հոն երթալու, ու երազի մէջ պատգամ առնելով՝ Գալիլեայի կողմերը գնաց. 23Եւ եկաւ Նազարէթ ըսուած քաղաքը բնակեցաւ, որպէս զի մարգարէներուն խօսքը կատարուի՝ թէ Նազովրեցի պիտի կոչուի։