Այգիին բանուորները

1Քանզի երկինքի թագաւորութիւնը տանուտէր մարդու մը նման է, որ առտուանց կանուխ ելաւ՝ իր այգիին համար բանուորներ բռնելու: 2Եւ բանուորներուն հետ օրը մէկ դահեկանի խօսք կապեց, ու զանոնք ղրկեց իր այգին: 3Եւ ժամը երեքին ատենները ելաւ՝ ուրիշները տեսաւ, որոնք շուկային մէջ պարապ կայներ էին. 4Ու ըսաւ անոնց, Դուք ալ գացէք իմ այգիս, և ինչ որ արժան է՝ կու տամ ձեզի: 5Անոնք ալ գացին. ու նորէն ժամը վեցին և ժամը իննին ատենները ելաւ՝ այնպէս ըրաւ: 6Եւ ժամը տասնըմէկին ատենները ելաւ, ուրիշները գտաւ՝ որոնք պարապ կայներ էին, ու անոնց ըսաւ, Ինչո՞ւ հոս բոլոր օրը պարապ կայներ էք: 7Ըսին իրեն, Անոր համար որ մէ՛կը մեզ վարձքով չբռնեց. ըսաւ անոնց, Դուք ալ այգին գացէք, ու ինչ որ արժան է՝ պիտի առնէք: 8Եւ երբ իրիկուն եղաւ, այգիին տէրը իր տնտեսին ըսաւ, Բանուորները կանչէ, և անոնց վարձքը տուր՝ վերջիններէն սկսելով մինչև առաջինները: 9Ու երբ եկան անոնք որ ժամը տասնըմէկին գացեր էին, մէյմէկ դահեկան առին. 10Եւ առաջինները գալով՝ կը կարծէին որ աւելի պիտի առնեն, ու անոնք ալ առին մէյմէկ դահեկան: 11Երբ առին՝ տանուտէրոջ դէմ տրտունջ կ’ընէին ու կ’ըսէին թէ 12Այդ վերջինները մէկ ժամ գործեցին, և զանոնք հաւասար ըրիր մեզի, որ օրուան ծանրութիւնը ու տաքութիւնը քաշեցինք: 13Անիկա պատասխան տուաւ անոնցմէ մէկուն ու ըսաւ, Ընկեր, ես քեզ չեմ զրկեր. չէ՞ որ դուն ինծի հետ մէկ դահեկանի խօսք կապեցիր. 14Առ քուկդ ու գնա. կ’ուզեմ որ այս վերջինին քեզի տուածիս պէս տամ: 15Միթէ ես իշխանութիւն չունի՞մ իմ բաներուս վրայ՝ ինչ որ ուզեմ ընելու. կամ թէ քու աչքդ չա՞ր է՝ որ ես բարերար եմ: 16Այսպէս յետինները առաջին պիտի ըլլան, և առաջինները յետին. վասն զի կանչուածները շատ են, բայց ընտÁրուածները քիչ:

Յիսուս իր մահուան մասին երրորդ անգամ մը խօսի

17Ու երբ Յիսուս Երուսաղէմ կ’ելլէր, ճամբան տասուերկու աշակերտները իրեն հետ առաւ առանձին, ու ըսաւ անոնց, 18Ահա Երուսաղէմ կ’ելլենք, և Որդին մարդոյ պիտի մատնուի քահանայապետներուն ու դպիրներուն, և զանիկա մահուան պիտի դատապարտեն: 19Եւ զանիկա հեթանոսներուն պիտի մատնեն՝ ծաղր ընելու ու ծեծելու և խաչը հանելու. ու երրորդ օրը յարութիւն պիտի առնէ:

Մօր մը խնդրանքը

20Այն ատեն Զեբեդէոսի որդիներուն մայրը իր որդիներուն հետ եկաւ անոր, երկրպագութիւն կ’ընէր ու բան մը կը խնդրէր անկէ: 21Ան ալ ըսաւ անոր, Ի՞նչ կ’ուզես: Ըսաւ անոր, Ըսէ որ այս իմ երկու որդիներս մէկը աջ կողմդ՝ և միւսը ձախ կողմդ նստին քու թագաւորութեանդ մէջ: 22Պատասխան տուաւ Յիսուս ու ըսաւ, Չէք գիտեր ի՛նչ կը խնդրէք. կրնա՞ք խմել այն գաւաթը զոր ես պիտի խմեմ կամ այն մկրտութիւնով մկրտուիլ, զոր ես պիտի մկրտուիմ. ըսին իրեն, Կրնանք: 23Եւ ըսաւ անոնց, Իմ գաւաթս պիտի խմէք, և այն մկրտութիւնով զոր ես մկրտուելու եմ, պիտի մկրտուիք. բայց իմ աջ կողմս ու ձախ կողմս նստիլը՝ իմս չէ տալը, հապա որոնց որ պատրաստուած է իմ Հօրմէս: 24Ու երբ միւս տասը աշակերտները լսեցին, այն երկու եղբայրներուն նեղացան: 25Իսկ Յիսուս իրեն կանչեց զանոնք ու ըսաւ, Գիտէք որ ազգերուն իշխանները կը տիրեն անոնց, և մեծամեծները կ’իշխեն անոնց. 26Բայց ձեր մէջ այնպէս պիտի չըլլայ, հապա ձեզմէ ով որ մեծ ըլլալ կ’ուզէ, թող անիկա ձեր սպասաւորը ըլլայ. 27Ու ձեզմէ ով որ առաջին ըլլալ կ’ուզէ, թող անիկա ձեր ծառան ըլայ. 28Ինչպէս Որդին մարդոյ չեկաւ սպասաւորութիւն ընդունելու, հապա սպասաւորութիւն ընելու և իր կեանքը շատերու համար փրկանք տալու:

Յիսուս երկու կոյրեր կը բժշկէ

29Ու երբ անոնք Երիքովէ ելան, մեծ բազմութիւն անոր ետևէն գնաց: 30Եւ ահա ճամբուն քով երկու կոյր նստած էին. երբ լսեցին թէ Յիսուս կ’անցնի, աղաղակեցին ու ըսին, Ողորմէ մեզի, Տէր, Որդի Դաւթի: 31Եւ բազմութիւնը կը յանդիմանէր զանոնք որ լռեն, բայց անոնք ա՛լ աւելի կ’աղաղակէին ու կ’ըսէին, Ողորմէ մեզի, Տէր, Որդի Դաւթի: 32Եւ Յիսուս կանգ առնելով կանչեց զանոնք ու ըսաւ, Ի՞նչ կ’ուզէք որ ձեզի ընեմ: 33Ըսին անոր, Տէր, որ աչքերնիս բացուին: 34Եւ Յիսուս խղճալով՝ անոնց աչքերուն դպաւ, և շուտ մը անոնց աչքերը բացուեցան, ու անոր ետևէն գացին: