Հարսանեկան կոչունքին առակը

1Դարձեալ պատասխան տուաւ Յիսուս և առակներով ըսաւ անոնց, 2Երկինքի թագաւորութիւնը թագաւոր մարդու մը կը նմանի, որ իր որդւոյն համար հարսնիք ըրաւ: 3Եւ իր ծառաները ղրկեց, որպէս զի կանչեն հարսնիքի հրաւիրուածները, և անոնք չուզեցին գալ: 4Նորէն ուրիշ ծառաներ ղրկեց ու ըսաւ, Ըսէք հրաւիրուածներուն, Ահա իմ ճաշս պատրաստեցի, զուարակներս ու գէր կենդանիներս մորթուած են, և ամէն բան պատրաստ է. հարսնիք եկէք: 5Բայց անոնք անհոգութիւն ընելով գացին, մէկը իր արտը ու միւսը իր առուտուրին. 6Եւ ուրիշները անոր ծառաները բռնեցին, նախատեցին ու սպաննեցին: 7Թագաւորն ալ երբ լսեց՝ բարկացաւ, և իր զօրքերը ղրկեց ու այն սպաննողները սատկեցուց, ու անոնց քաղաքը այրեց: 8Այն ատեն իր ծառաներուն ըսաւ, Հարսնիքը պատրաստ է, բայց հրաւիրուածները արժանի չէին: 9Ուստի գացէք ճամբու գլուխները, և ո՛վ որ գտնելու ըլլաք, հարսնիքի հրաւիրեցէք: 10Եւ այն ծառաները ելան ճամբաներու վրայ, ու ո՛վ որ գտան, թէ՛ չար և թէ՛ բարի, ամէնն ալ ժողվեցին, ու հարսնիքը հարսնևորներով լեցուեցաւ: 11Եւ թագաւորը երբ մտաւ հարսնևորները տեսնելու, հոն մարդ մը տեսաւ որ հարսնիքի հանդերձ հագած չէր. 12Եւ ըսաւ անոր, Ընկեր, ինչո՞ւ համար հոս մտար առանց հարսնիքի հանդերձ ունենալու. և անիկա պապանձեցաւ: 13Այն ատեն թագաւորը սպասաւորներուն ըսաւ, Կապեցէք ասոր ոտքերը ու ձեռքերը, և առէք ու հանեցէք զանիկա դուրսի խաւարը. հոն պիտի ըլլայ լալ ու ակռաներ կրճտել: 14Վասն զի կանչուածները շատ են ու ընտրուածները քիչ:

Տուրք վճարելու հարցը

15Այն ատեն փարիսեցիները գացին խորհուրդ ըրին, թէ ի՛նչպէս անոր որոգայթ մը դնեն խօսքով. 16Եւ իրենց աշակերտները Հերովդեսեաններուն հետ մէկտեղ ղրկեցին անոր ու ըսին, Վարդապետ, գիտենք որ ճշմարիտ ես, և ճÁշմարտութեամբ Աստուծոյ ճամբան կը սորվեցնես, ու մարդո՛ւ համար հոգդ չէ, քանզի մարդոց երեսպաշտութիւն չես ըներ: 17Ուստի մեզի ըսէ, քեզի ի՞նչպէս կ’երևնայ, Կայսրին տուրք տալ արժա՞ն է՝ թէ ոչ: 18Յիսուս գիտնալով անոնց խորամանկութիւնը՝ ըսաւ, Ինչո՞ւ զիս կը փորձէք, կեղծաւորներ, 19Ցուցուցէք ինծի տուրքին դրամը. և անոնք դահեկան մը բերին իրեն: 20Ու ըսաւ անոնց. Որո՞ւնն է այս պատկերը ու գիրը: 21Ըսին անոր, Կայսրին. այն ատեն ըսաւ անոնց, Ուրեմն զայն որ Կայսրինն է՝ Կայսրին տուէք, և զայն որ Աստուծոյն է՝ Աստուծոյ տուէք: 22Երբ լսեցին՝ զարմացան, և թողուցին զանիկա ու գացին:

Յարութեան հարցը

23Նոյն օրը անոր քով եկան սադուկեցիները, որոնք կ’ըսեն թէ յարութիւն չկայ, և անոր հարցուցին՝ 24Ըսելով, Վարդապետ, Մովսէս ըսաւ, Եթէ մէկը առանց զաւակի մեռնելու ըլլայ, անոր եղբայրը առնէ անոր կինը, և իր եղբօրը զաւակ հանէ: 25Արդ եօթը եղբայրներ կային մեր մէջ. և առաջինը կին առաւ՝ ու մեռաւ, և զաւակ չունենալուն համար իր կինը ձգեց իր եղբօրը: 26Նոյնպէս ալ երկրորդը՝ ու երրորդը՝ մինչև եօթներորդը: 27Ամէնէն ետքը կինն ալ մեռաւ: 28Ուրեմն յարութեան ատեն այն եօթնէն որո՞ւն կինը պիտի ըլլայ. վասն զի ամէնն ալ զանիկա կին ունեցան: 29Եւ Յիսուս պատասխան տալով՝ անոնց ըսաւ, Դուք մոլորած էք, որ ո՛չ գիրքերը գիտէք և ո՛չ Աստուծոյ զօրութիւնը. 30Քանզի յարութեան ատեն ոչ կին կ’առնեն և ոչ էրկան կը տրուին, հապա երկինքի մէջ Աստուծոյ հրեշտակներուն պէս են: 31Բայց մեռելներուն յարութիւն առնելուն համար՝ չէ՞ք կարդացեր Աստուծմէ ձեզի ըսուած խօսքը. 32Ես եմ Աբրահամի Աստուածը, և Իսահակի Աստուածը, ու Յակոբի Աստուածը. Աստուած մեռելներուն Աստուածը չէ, հապա կենդանիներուն: 33Ու ժողովուրդները լսելով՝ կը զարմանային անոր վարդապետութեանը վրայ:

Մեծ պատուիրանը

34Բայց փարիսեցիները երբ լսեցին թէ անիկա պապանձեցուց սադուկեցիները, մէկտեղ ժողվուեցան. 35Եւ անոնցմէ մէկը, օրինական մը, հարցուց, զանիկա փորձելով, ու ըսաւ, 36Վարդապետ, ո՞ր պատուիրանքը մեծ է օրէնքին մէջ: 37Եւ Յիսուս ըսաւ անոր, Քու Տէր Աստուածդ սիրես քու բոլոր սրտովդ և քու բոլոր անձովդ ու քու բոլոր միտքովդ. 38Այս է առաջին ու մեծ պատուիրանքը: 39Ու երկրորդը ասոր նման, Քու ընկերդ սիրես քու անձիդ պէս: 40Այս երկու պատուիրանքէն կախուած են բոլոր օրէնքը և մարգարէները:

Մեսիային հարցը

41Ու երբ փարիսեցիները ժողվուեցան, Յիսուս հարցուց անոնց ու ըսաւ, 42Քրիստոսի վրայով ի՞նչ կարծիք ունիք. անիկա որո՞ւն որդին է: 43Ըսին իրեն, Դաւիթի: Ըսաւ անոնց Յիսուս, Հապա ի՞նչպէս Դաւիթ Հոգիով զանիկա Տէր կը կոչէ ու կ’ըսէ, 44Տէրը իմ Տէրոջս ըսաւ, Նստէ իմ աջ կողմս, մինչև քու թշնամինէրդ ոտքերուդ պատուանդան ընեմ: 45Ուրեմն եթէ Դաւիթ զանիկա Տէր կը կոչէ, ի՞նչպէս անիկա անոր որդին կ’ըլլայ: 46Եւ մէ՛կը չէր կրնար անոր խօսք մը պատասխանել. ու այն օրէն ետև մէ՛կը չէր համարձակեր անոր բան մը հարցնել: