Յիսուս դպիրներէն եւ փարիսեցիներէն կը զգուշացնէ

1Այն ատեն Յիսուս խօսեցաւ ժողովուրդներուն և իր աշակերտներուն ու ըսաւ, 2Մովսէսի աթոռը դպիրները և փարիսեցիները նստած են. 3Ուրեմն ինչ որ ձեզի կ’ըսեն որ պահէք, պահեցէք ու ըրէք, բայց անոնց գործերուն պէս մի ընէք, վասն զի կ’ըսեն ու չեն ըներ: 4Քանզի ծանր և տանելու դժուար բեռներ կը կապեն ու կը դնեն մարդոց ուսերուն վրայ, և իրենց մատովը չեն ուզեր զանոնք շարժել: 5Եւ իրեց ամէն գործերը մարդոց երևնալու համար կ’ընեն. կը լայնցնեն իրենց գրապանակները ու կ’երկնցնեն իրենց հանդերձներուն քղանցքները. 6Ընթրիքներու մէջ առաջին բազմոցները կը սիրեն, և ժողովարաններուն մէջ առաջին աթոռները, ու շուկաներուն մէջ բարևները: 7Եւ մարդոցմէ Ռաբբի Ռաբբի կոչուիլ: 8Բայց դուք Ռաբբի մի կոչուիք, վասն զի ձեր Ուսուցիչը մէկ է, այսինքն Քրիստոս. և դուք ամէնդ եղբայր էք: 9Ու երկրի վրայ մա՛րդ ձեզի Հայր մի կոչէք, վասն զի ձեր Հայրը մէկ է, որ երկինքն է: 10Եւ դուք ուսուցիչներ մի կոչուիք, վասն զի ձեր Ուսուցիչը մէկ է, այսինքն Քրիստոս: 11Եւ ձեր մէջէն մեծը ձեր սպասաւորը պիտի ըլլայ: 12Ով որ իր անձը կը բարձրացնէ, պիտի խոնարհի, և ով որ իր անձը կը խոնարհեցնէ, պիտի բարձրանայ:

Յիսուս անոնց կեղծաւորութիւնը կը դատապարտէ

13Բայց վա՜յ ձեզի, կեղծաւոր դպիրներ ու փարիսեցիներ, որ երկինքի թագաւորութիւնը մարդոց առջև կը գոցէք, քանզի դուք չէք մտներ, և մտնողներն ալ չէք թողուր որ մտնեն: 14Վա՜յ ձեզի, կեղծաւոր դպիրներ ու փարիսեցիներ, որ որբևարիներուն տուները կ’ուտէք, ու մարդոց երևնալու համար աղօթքը կ’երկնցնէք. անոր համար աւելի դատապարտութիւն պիտի ընդունիք: 15Վա՜յ ձեզի, կեղծաւոր դպիրներ ու փարիսեցիներ, որ ծով ու ցամաք կը պտըտիք մէկը նորահաւատ ընելու, ու երբ ըլլայ, զանիկայ ձեզմէ երկու անգամ աւելի գեհենի որդի կ’ընէք: 16Վա՜յ ձեզի, կոյր առաջնորդներ, որ կ’ըսէք թէ Ով որ տաճարին վրայ երդում ընէ, բան մը չէ, բայց ով որ տաճարին մէջի ոսկիին վրայ երդում ընէ, պարտաւոր կ’ըլլայ: 17Ով յիմարներ ու կոյրեր, ո՞րը մեծ է, ոսկի՞ն թէ տաճարը որ կը սրբացնէ ոսկին: 18Եւ թէ՝ Ով որ սեղանին վրայ երդում ընէ, բան մը չէ, բայց ով որ սեղանին վրայի պատարագին վրայ երդում ընէ, պարտաւոր կ’ըլլայ: 19Յիմարներ ու կոյրեր, ո՞րը մեծ է, պատարա՞գը թէ սեղանը որ կը սրբացնէ պատարագը: 20Ուստի ով որ սեղանին վրայ երդում ընէ, երդում կ’ընէ անոր վրայ և անոր վրայի ամէն բաներուն վրայ. 21Եւ ով որ տաճարին վրայ երդում ընէ, երդում կ’ընէ անոր վրայ և անոր մէջ բնակողին վրայ. 22Եւ ով որ երկինքի վրայ երդում ընէ, երդում կ’ընէ Աստուծոյ աթոռին վրայ և անոր վրա նստողին վրայ: 23Վա՜յ ձեզի, կեղծաւոր դպիրներ ու փարիսեցիներ, որ անանուխին ու սամիթին և չամանին տասանորդը կը վճարէք, ու կը ձգէք օրէնքին ծանր ծանր բաները, դատաստանը և ողորմութիւնը ու հաւատքը. ասոնք պէտք էր ընել, և զանոնք չձգել: 24Կոյր առաջնորդներ, որ մժղուկը կը քամէք և ուղտը կը կլլէք: 25Վա՜յ ձեզի, կեղծաւոր դպիրներ ու փարիսեցիներ, որ գաւաթին ու պնակին դուրսի կողմը կը մաքրէք, ու ներսէն յափշտակութեամբ և անիրաւութեամբ լեցուն են: 26Կոյր փարիսեցի, առաջ գաւաթին ու պնակին ներսի կողմը մաքրէ, որպէս զի անոնց դուրսի կողմն ալ մաքուր ըլլայ: 27Վա՜յ ձեզի, կեղծաւոր դպիրներ ու փարիսեցիներ, որ կը նմանիք ծեփած գերեզմաններու, որոնք դուրսէն գեղեցիկ կ’երևնան, և ներսէն մեռելներու ոսկորներով և ամէն կերպ պղծութիւնով լեցուն են: 28Նոյնպէս դուք դուրսէն մարդոց արդար կ’երևնաք, ու ներսէն կեղծաւորութեամբ և անօրէնութեամբ լեցուն էք:

Յիսուս անոնց պատիժը կը գուշակէ

29Վա՜յ ձեզի, կեղծաւոր դպիրներ ու փարիսեցիներ, որ մարգարէներուն տապանները կը շինէք, և արդարներուն գերեզմանները կը զարդարէք: 30Ու կ’ըսէք, Եթէ մեր հայրերուն օրերը ըլլայինք, անոնց հետ մարգարէներուն արեանը մասնակից չէինք ըլլար: 31Ուրեմն դուք ձեր վրայ կը վկայէք թէ անոնց զաւակներն էք՝ որ մարգարէները կը սպաննէին: 32Ուստի դուք ալ ձեր հայրերուն չափը լեցուցէք: 33Օձեր, իժերու ծնունդներ, ի՞նչպէս պիտի փախչիք գեհենին դատապարտութենէն: 34Ատոր համար ահա ես կը ղրկեմ ձեզի մարգարէներ և իմաստուններ ու դպիրներ, և անոնցմէ մէկ քանիները պիտի սպաննէք ու խաչը հանէք, և մէկ քանիները ձեր ժողովարաններուն մէջ պիտի ծեծէք, ու քաղաքէ քաղաք հալածէք: 35Որպէս զի երկրի վրայ թափուած բոլոր արդար արիւնը ձեր վրայ գայ, արդար Աբէլի արիւնէն մինչև Բարաքիայի որդւոյն Զաքարիայի արիւնը, զոր տաճարին ու սեղանին մէջտեղ սպաննեցիք։ 36Ճշմարիտ կ’ըսեմ ձեզի, Այս ամէն բաները պիտի գան այս ազգին վրայ։

Յիսուսի սէրը Երուսաղէմի հանդեպ

37Ով Երուսաղէմ, Երուսաղէմ, որ մարգարէները կը սպաննէիր, ու քեզի ղÁրկուածները կը քարկոծէիր, քանի անգամ քու տղաքներդ ժողվել ուզեցի, ինչպէս հաւը իր ձագերը թևերուն տակ կը ժողվէ, և դուք չուզեցիք։ 38Ահա ձեր տունը ձեզի աւերակ պիտի մնայ։ 39Վասն զի ձեզի կ’ըսեմ որ ա՛լ ասկէ ետև պիտի չտեսնէք զիս, մինչև ըսէք, Օրհնեալ է ան որ Տէրոջը անունովը կու գայ։