Տասը կոյսերուն առակը

1Այն ատեն երկինքի թագաւորութիւնը պիտի նմանի տասը կոյսերու, որոնք իրենց լապտերները առնելով՝ փեսան դիմաւորելու ելան: 2Ասոնցմէ հինգը իմաստուն էին, և հինգը յիմար: 3Յիմարները առին իրենց լապտերները, ու իրենց հետ իւղ չառին. 4Բայց իմաստունները իրենց լապտերներուն հետ ամաններով իւղ ալ առին: 5Եւ երբ փեսան ուշացաւ, ամէնն ալ թմրեցան ու քնացան: 6Եւ կէսգիշերին ձայն մը եղաւ, Ահա փեսան կու գայ. զանիկա դիմաւորելու ելէք: 7Այն ատեն բոլոր կոյսերը ելան ու իրենց լապտերները շիտկեցին: 8Եւ յիմարները ըսին իմաստուններուն, Տուէք մեզի ձեր իւղէն, վասն զի մեր լապտերները մարելու վրայ են: 9Պատասխան տուին իմաստունները ու ըսին, Չըլլայ որ մեզի ու ձեզի չբաւականանայ, այլ յաւէտ ծախողներուն գացէք և գնեցէք ձեզի համար: 10Երբ անոնք գացին գնելու, փեսան եկաւ, ու պատրաստ եղողները անոր հետ հարսնիքը մտան, և դուռը գոցուեցաւ: 11Ետքը միւս կոյսերը եկան ու ըսին, Տէր, Տէր, բաց մեզի: 12Բայց անիկա պատասխան տուաւ ու ըսաւ, Ճշմարիտ կ’ըսեմ ձեզի թէ Ես ձեզ չեմ ճանչնար: 13Ուրեմն արթուն կեցէք, վասն զի ո՛չ օրը գիտէք և ո՛չ ժամը:

Երեք ծառաներուն առակը

14Քանզի ինչպէս օտար երկիր գացող մարդ մը կանչեց իր ծառաները, և իր ունեցածը անոնց յանձնեց: 15Մէկուն տուաւ հինգ տաղանդ, ու մէկուն՝ երկուք, և մէկուն՝ մէկ, ամէն մէկուն իր կարողութեանը չափ, ու անմիջապէս ճամբայ ելաւ: 16Եւ ան որ հինգ տաղանդը առած էր, գնաց անոնցմով գործ տեսաւ, և ուրիշ հինգ տաղանդ շահեցաւ: 17Նմանապէս ան որ երկուքը առած էր, ուրիշ երկուք ալ շահեցաւ: 18Իսկ ան որ մէկը առած էր, գնաց գետինը փորեց, ու իր տէրոջը ստակը պահեց: 19Շատ ժամանակէ ետև այն ծառաներուն տէրը եկաւ, և անոնցմէ հաշիւ ուզեց: 20Եւ հինգ տաղանդը առնողը եկաւ՝ ուրիշ հինգ տաղանդ ալ բերաւ, ու ըսաւ, Տէր, հինգ տաղանդ յանձնեցիր ինծի, ահա ուրիշ հինգ տաղանդ ալ անոնց վրայ շահեցայ: 21Ըսաւ անոր իր տէրը, Ապրիս, բարի ու հաւատարիմ ծառայ, դուն որ քիչ բանին մէջ հաւատարիմ եղար, քեզ շատ բաներու վրայ պիտի կեցնեմ, մտիր քու տէրոջդ ուրախութեանը մէջ: 22Երկու տաղանդը առնողն ալ եկաւ ու ըսաւ, Տէր, երկու տաղանդ յանձնեցիր ինծի, ահա ուրիշ երկու տաղանդ ալ անոնց վրայ շահեցայ: 23Ըսաւ անոր իր տէրը, Ապրիս, բարի ու հաւատարիմ ծառայ. դուն որ քիչ բանին մէջ հաւատարիմ եղար, քեզ շատ բաներու վրայ պիտի կեցնեմ. մտիր քու տէրոջդ ուրախութեանը մէջ: 24Մէկ տաղանդը առնողն ալ եկաւ ու ըսաւ, Տէր, գիտէի որ դուն խիստ մարդ մըն ես, չսերմանած տեղէդ կը հնձես ու չցանած տեղէդ կը ժողվես: 25Ուստի վախնալով՝ գացի քու տաղանդդ գետնին տակ պահեցի. ուստի ահա քուկդ քեզի: 26Պատասխան տուաւ անոր տէրը ու ըսաւ անոր, Չար և ծոյլ ծառայ, գիտէիր որ չսերմանած տեղէս կը հնձեմ ու չցանած տեղէս կը ժողվեմ. 27Ուրեմն պէտք էր քեզի որ իմ ստակս սեղանաւորներուն տայիր, որպէս զի եկած ատենս շահովը առնէի իմս: 28Արդ առէք ատկէ տաղանդը, ու տասը տաղանդ ունեցողին տուէք: 29Վասն զի ամէն ունեցողին պիտի տրուի, ու պիտի աւելնայ, և չունեցողին ունեցածն ալ անկէ պիտի առնուի: 30Եւ այդ անպիտան ծառան դուրսի խաւարը հանեցէք. հոն պիտի ըլլայ լալ ու ակռաներ կրճտել:

Վերջին դատաստանը

31Ու երբ Որդին մարդոյ իր փառքովը գայ, և բոլոր սուրբ հրեշտակները իրեն հետ, այն ատեն իր փառաց աթոռը պիտի նստի. 32Եւ անոր առջև պիտի ժողվուին բոլոր ազգերը, ու զանոնք իրարմէ պիտի զատէ, ինչպէս հովիւ մը ոչխարները այծերէն կը զատէ. 33Եւ ոչխարները իր աջ կողմը պիտի կայնեցնէ, ու այծերը ձախ կողմը: 34Այն ատեն Թագաւորը իր աջ կողմը եղողներուն պիտի ըսէ, Եկէք, իմ Հօրս օրհնածները, աշխարհի սկիզբէն ձեզի համար պատրաստուած թագաւորութիւնը ժառանգեցէք. 35Վասն զի անօթեցայ, և ինծի ուտելիք տուիք. ծարաւեցայ, ու ինծի խմցուցիք. օտարական էի, և զիս ներս առիք. 36Մերկ էի, և զիս հագուեցուցիք. հիւանդ էի, ու ինծի տես եկաք. բանտի մէջ էի, և ինծի եկաք: 37Այն ատեն արդարները անոր պատասխան պիտի տան ու ըսեն, Տէր, ե՞րբ քեզ անօթեցած տեսանք ու կերակրեցինք, կամ ծարւած՝ ու խմցուցինք. 38Ե՞րբ քեզ օտարական տեսանք և ներս առինք, կամ մերկ՝ ու հագուեցուցինք. 39Ե՞րբ քեզ հիւանդ կամ բանտի մէջ տեսանք, ու քեզի եկանք: 40Եւ Թագաւորը պատասխան տալով պիտի ըսէ անոնց, Ճշմարիտ կ’ըսեմ ձեզի, Որովհետև այս իմ եղբայրներուս ամէնէն պզտիկներէն մէկուն ըրիք, ինծի ըրիք: 41Այն ատեն ձախ կողմը եղողներուն ալ պիտի ըսէ, Մէկդի գացէք ինծմէ, անիծեալներ, յաւիտենական կրակին մէջ՝ որ պատրաստուած է սատանայի ու իր հրեշտակներուն: 42Վասն զի անօթեցայ, և ինծի ուտելիք չտուիք. ծարաւեցայ, ու ինծի չխմցուցիք. 43Օտարական էի, և զիս ներս չառիք. մերկ էի, և զիս չհագուեցուցիք. հիւանդ ու բանտի մէջ էի, և ինծի տես չեկաք: 44Այն ատեն անոնք ալ պատասխան պիտի տան ու ըսեն, Տէր ե՞րբ տեսանք քեզ անօթեցած, կամ ծարւած, կամ օտարական, կամ մերկ, կամ հիւանդ, կամ բանտի մէջ, ու քեզի սպասաւորութիւն չըրինք: 45Այն ատեն պատասխան պիտի տայ անոնց ու ըսէ, ճշմարիտ կ’ըսեմ ձեզի, Որովհետև ասոնց ամէնէն պզտիկներէն մէկուն չըրիք, ինծի ալ չըրիք: 46Եւ ասոնք պիտի երթան յաիտենական տանջանքը, իսկ արդարները՝ յաւիտենական կեանքը: