Յիսուս Պիղատոսին կը տարուի

1Երբ առտու եղաւ, բոլոր քահանայապետները ու ժողովուրդին ծերերը Յիսուսի դէմ խորհուրդ ըրին որ զանիկա մեռցնեն։ 2Եւ կապելով զանիկա տարին, ու Պոնտացի Պիղատոս կուսակալին ձեռքը տուին։

Յուդայի մահը

3Այն ատեն Յուդա, որ զանիկա մատնեց, տեսնելով թէ դատապարտուեցաւ, զեղջի եկաւ, ու երեսուն արծաթը ետ դարձուց քահանայապետներուն և ծերերուն, 4Ու ըսաւ, Մեղայ, որ անմեղ արիւն մատնեցի. և անոնք ըսին, Մեզի ի՞նչ, դուն նայէ։ 5Եւ արծաթը տաճարին մէջ ձգեց ու դուրս ելաւ, և գնաց ինքզինք խեղդեց։ 6Քահանայապետներն ալ արծաթը առնելով՝ ըսին, Արժան չէ ատիկա կորբանին մէջ դնել, վասն զի արեան գին է։ 7Ուստի խորհուրդ ըրին, և անով բրուտին արտը ծախու առին՝ օտարներու գերեզմանատուն ըլլալու համար։ 8Այս պատճառաւ այն արտը Արեան արտ ըսուեցաւ մինչև այսօր։ 9Այն ատեն կատարուեցաւ Երեմիա մարգարէին ձեռքով ըսուած խոսքը, Եւ առին երեսուն արծաթը, գին կտրուածին գինը, զոր Իսրայէլի որդիներէն ոմանք գին կտրեցին, 10Ու տուին զանիկա բրուտին արտին, ինչպէս ինծի հրաման ըրաւ Տէրը։

Պիղատոս Յիսուսը կը հարցաքննէ

11Եւ Յիսուս կուսակալին առջև կայնեցաւ. և կուսակալը հարցուց անոր ու ըսաւ, Հրէից թագաւորը դո՞ւն ես։ Եւ Յիսուս ըսաւ անոր, Դուն կ’ըսես։ 12Ու քահանայապետներէն և ծերերէն ամբաստանուած ատենը բնաւ պատասխան մը չտուաւ։ 13Այն ատեն Պիղատոս ըսաւ անոր, Չե՞ս լսեր թէ ո՛րչափ քեզի դէմ կը վկայեն ատոնք։ 14Եւ անոր բան մը պատասխան չտուաւ, մինչև շատ զարմացաւ կուսակալը։

Յիսուս մահուան կը դատապարտուի

15Բայց կուսակալը սովորութիւն ունէր որ տօնին ատենը կապուած մը արձակէր ժողովուրդին, ով որ ուզէին։ 16Այն ատեն Բարաբբա անունով երևելի բանտարկեալ մը ունէին։ 17Երբ ժողվուեցան, ըսաւ անոնց Պիղատոս, Ո՞րը կ’ուզէք որ ձեզի արձակեմ, Բարաբբա՞ն, թէ Յիսուսը՝ որ Քրիստոս կ’ըսուի: 18Քանզի գիտէր թէ նախանձի համար մատնեցին զանիկա։ 19Ու երբ անիկա ատեանը նստեր էր, անոր կինը մէկը ղրկեց անոր ու ըսաւ, Դուն այն արդարին հետ բան մը չունենաս, վասն զի այսօր երազիս մէջ շատ դիպուածներ անցան գլխէս անոր համար։ 20Բայց քահանայապետները և ծերերը ժողովուրդը համոզեցին որ Բարաբբան խնդրեն ու Յիսուսը կորսնցնեն։ 21Պատասխան տուաւ կուսակալը ու ըսաւ անոնց, Այս երկուքէն ո՞րը կ’ուզէք որ ձեզի արձակեմ. և անոնք ըսին, Բարաբբան: 22Ըսաւ անոնց Պիղատոս, Հապա ի՞նչ ընեմ Յիսուսը, որ Քրիստոս կըսուի: 23Ամէնն ալ ըսին անոր, Թող խաչուի. և կուսակալը ըսաւ, Բայց ի՞նչ չար գործ ըրաւ. և անոնք և՛ս առաւել կաղաղակէին ու կ’ըսէին, Թող խաչուի: 24Եւ Պիղատոս տեսնելով որ օգուտ մը չըլլար, հապա ա՛լ աւելի խռովութիւն կ’ըլլայ, ջուր առաւ, ձեռքերը լուաց ժողովուրդին առջև ու ըսաւ, Ես այդ արդարին արիւնէն անպարտ եմ. դուք մտածեցէք: 25Եւ բոլոր ժողովուրդը պատասխան տալով՝ ըսաւ, Ատոր արիւնը մեր վրայ ու մեր որդիներուն վրայ ըլլայ: 26Այն ատեն Բարաբբան արձակեց անոնց, և Յիսուսը ծեծելով անոնց ձեռքը տուաւ որպէս զի խաչուի:

Զինուորները Յիսուսը կը ծաղրեն

27Այն ատեն կուսակալին զինուորները պալատին ներսը առին Յիսուսը, ու բոլոր զինուորներուն գունդը անոր վրայ ժողվեցին. 28Եւ զանիկա մերկացնելով կարմիր վերարկու մը հագցուցին անոր: 29Ու փուշերէ պսակ մը հիւսելով՝ անոր գլուխը դրին, ու եղէգ մը անոր աջ ձեռքը. և անոր առջև ծունկի վրայ գալով ծաղր կ’ընէին զանիկա, ու կ’ըսէին, Ողջոյն քեզ, Հրէից թագաւոր: 30Եւ թքնելով անոր վրայ՝ եղէգը կ’առնէին ու անոր գլուխը կը ծեծէին: 31Ու երբ ծաղր ըրին զանիկա, վերարկուն վրայէն հանեցին ու իր հանդերձները հագցուցին անոր և տարին զանիկա խաչը հանելու:

Յիսուս խաչին վրայ գամուեցաւ

32Եւ դուրս ելլելով Կիւրենացի մարդ մը գտան Սիմոն անունով, զանիկա պահակ բռնեցին որպէս զի անոր խաչը վերցնէ: 33Ու եկան Գողգոթա ըսուած տեղը, որ է գանկի տեղ. 34Եւ լեղիով խառնուած քացախ տուին անոր որպէս զի խմէ. ու երբ համը առաւ, խմել չէր ուզեր: 35Եւ զանիկա խաչը հանելով, անոր հանդերձները վիճակով բաժնեցին. որպէս զի մարգարէէն ըսուածը կատարուի, Իմ հանդերձներս իրենց մէջ բաժնեցին, և իմ պատմուճանիս վրայ վիճակ ձգեցին: 36Ու նստեր զանիկա կը պահէին: 37Եւ անոր գլխուն վրայ իր յանցանքը գրուած դրին, թէ Ասիկա է Յիսուս, Հրէից թագաւորը: 38Այն ատեն անոր հետ երկու աւազակ խաչուեցան, մէկը անոր աջ կողմէն, ու մէկը ձախ կողմէն: 39Եւ անոնք որ կ’անցնէին՝ կը հայհոյէին անոր, գլուխնին կը շարժէին, 40Ու կըսէին, Դուն որ տաճարը կը քակէիր և երեք օրուան մէջ կը շինէիր, ինքզինքդ ազատէ. եթէ Աստուծոյ Որդին ես, իջիր այդ խաչէն: 41Նոյնպէս ալ քահանայապետները դպիրներուն ու ծերերուն հետ ծաղր ընելով կ’ըսէին, 42Ուրիշները ազատեց, ինքզինք չկրնար ազատել. եթէ Իսրայէլի թագաւոր է, թող հիմա իջնէ խաչէն, և իրեն հաւատանք: 43Աստուծոյ յուսացեր է, հիմա թող փրկէ ատիկա՝ եթէ կ’ուզէ ատիկա. վասն զի ըսաւ, թէ Ես Որդի Աստուծոյ եմ: 44Իրեն հետ խաչուած աւազակներն ալ նոյնպէս կը նախատէին զանիկա:

Յիսուսի մահը

45Եւ վեցերորդ ժամէն մինչև իններորդ ժամը բոլոր երկրին վրայ խաւար եղաւ: 46Եւ ժամը իննին ատենները Յիսուս մեծ ձայնով աղաղակեց ու ըսաւ, Էլի, Էլի, լա՞մա սաբաքթանի. որ ըսել է՝ Աստուած իմ, Աստուած իմ, ինչո՞ւ զիս թողուցիր. 47Անոնցմէ ոմանք, որ հոն կայներ էին, երբ լսեցին՝ կ’ըսէին, Ատիկա Եղիան կը կանչէ: 48Եւ շուտ մը անոնցմէ մէկը վազեց սպունգ մը առաւ՝ քացախով լեցուց, ու եղէգի մը անցընելով տուաւ անոր որպէս զի խմէ: 49Ու միւսները կ’ըէսին, Թող տուր, տեսնենք թէ Եղիա կու գա՞յ ատիկա ազատելու: 50Եւ Յիսուս դարձեալ մեծ ձայնով աղաղակեց, ու հոգին աւանդեց: 51Եւ ահա տաճարին վարագոյրը վերէն վար երկուքի ճեղքուեցաւ, ու երկիր շարժեցաւ, և քարերը պատռեցան: 52Եւ գերեզմանները բացուեցան, ու շատ սուրբ ննջեցեալներու մարմիններ յարութիւն առին, 53Եւ գերեզմաններէն ելան անոր յարութենէն ետև, մտան սուրբ քաղաքը ու շատերու երևցան: 54Բայց հարիւրապետը և անոր հետ Յիսուսը պահողները, երբ տեսան երկրաշարժը ու եղած բաները, շատ վախցան՝ ու ըսին, Արդարև ասիկա Որդի Աստուծոյ էր: 55Եւ հոն շատ կիներ կային որոնք հեռուէն կը նայէին, որոնք Գալիլեայէ Յիսուսի ետևէն եկան իրեն ծառայութիւն ընելու. 56Որոնց մէջ էր Մարիամ Մագդաղենացի և Յակոբոսի ու Յովսէսի մայրը Մարիամ և Զեբեդէոսի որդիներուն մայրը:

Յիսուսի թաղումը

57Ու երբ իրիկուն եղաւ, Արիմաթիայէ հարուստ մարդ մը եկաւ, որուն անունը Յովսէփ էր, որ ինքն ալ Յիսուսի աշակերտ էր: 58Ասիկա Պիղատոսի քով երթալով՝ Յիսուսի մարմինը խնդրեց. այն ատեն Պիղատոս հրաման ըրաւ որ մարմինը տրուի: 59Եւ Յովսէփ մարմինը առաւ, մաքուր կտաւով պատնեց: 60Ու դրաւ իր նոր գերեզմանին մէջ՝ զոր քարէ փորած էր. և գերեզմանին դուռը մեծ քար մը գլորելով գնաց: 61Եւ հոն էր Մարիամ Մագդաղենացի և միւս Մարիամը՝ գերեզմանին դիմաց նստած:

Գերեզմանին քով պահակներ

62Եւ հետևեալ օրը, որ ուրբաթէն ետև էր, քահանայապետները ու փարիսեցիները ժողվուեցան Պիղատոսի քով, 63Ու ըսին, Տէր, կը յիշենք որ այն մոլորեցուցիչը իր կենդանութեան ատեն կ’ըսէր թէ Երեք օրէն ետև յարութիւն կ’առնեմ: 64Ուստի հրաման ըրէ որ մինչև երրորդ օրը գերեզմանին զգուշութիւն ընեն. չըլլայ թէ իր աշակերտները գիշերով գան զանիկա գողնան, և ժողովուրդին ըսեն թէ Մեռելներէն յարութիւն առաւ. ու ետքի մոլորութիւնը առաջինէն գէշ ըլլայ: 65Պիղատոս անոնց ըսաւ, Դուք ունիք պահապան զինուորներ. գացէք, զգուշութիւն ըրէք ինչպէս որ գիտէք: 66Անոնք ալ գացին գերեզմանին զգուշութիւն ըրին, քարը կնքելով ու պահապան զինուորներ դնելով: