Յարութիւնը

1Եւ շաբաթ գիշերը երբ մէկշաբթին կը լուսնար, եկաւ Մարիամ Մագդաղենացի ու միւս Մարիամը գերեզմանը տեսնելու: 2Եւ ահա մեծ երկրաշարժ մը եղաւ. վասն զի Տէրոջը հրեշտակը երկինքէն իջնելով, գնաց դռնէն մէկդի գլորեց քարը, ու անոր վրայ նստաւ: 3Եւ անոր տեսքը փայլակի պէս էր, ու անոր հանդերձները՝ ձիւնի պէս ճերմակ: 4Եւ անոր վախէն պահապանները խռովեցան, ու մեռածի պէս եղան: 5Պատասխան տուաւ հրեշտակը ու ըսաւ կիներուն, Դուք մի վախնաք, քանզի գիտեմ որ կը փնտռէք Յիսուսը, որ խաչուեցաւ. 6Անիկա հոս չէ, վասն զի յարութիւն առաւ, ինչպէս ըսաւ. եկէք տեսէք այն տեղը, ուր Տէրը պառկած էր: 7Եւ շուտ մը գացէք անոր աշակերտներուն ըսէք թէ Անիկա մեռելներէն յարութիւն առաւ, և ահա ձեզմէ առաջ Գալիլեա կ’երթայ, հոն պիտի տեսնէք զանիկա. ահա ձեզի զրուցեցի: 8Եւ անոնք շուտ մը գերեզմանէն ելան վախով ու մեծ ուրախութիւնով, և կը վազէին աշակերտներուն պատմել: 9Ու երբ կ’երթային անոր աշակերտներուն պատմել, ահա Յիսուս անոնց դէմ ելաւ ու ըսաւ, Ողջոյն ձեզ: Եւ անոնք մօտենալով անոր ոտքերը բռնեցին, ու երկրպագութիւն ըրին անոր: 10Այն ատեն Յիսուս ըսաւ անոնց, Մի վախնաք, գացէք իմ եղբայրներուս ըսէք որ Գալիլեա երթան, ու հոն զիս պիտի տեսնեն:

Պահակներուն տեղեկատութիւնը

11Երբ անոնք կ’երթային, ահա պահապան զինուորներէն մէկ քանին քաղաքը եկան, ու քահանայապետներուն պատմեցին բոլոր եղած բաները, 12Եւ անոնք ծերերուն հետ մեկտեղ ժողվուելով ու խորհուրդ ընելով, շատ ստակ տուին զինուորներուն: 13Ու ըսին, Ըսէք թէ Անոր աշակերտները գիշերով եկան զանիկա գողցան, երբ մենք կը քնանայինք: 14Եւ եթէ այդ բանը կուսակալին ականջը հասնի, մենք զանիկա կը հաճեցնենք, և ձեզ ապահով կ’ընենք: 15Անոնք ալ ստակը առին, ու սորվածնուն պէս ըրին. և այս ձայնը Հրէաներուն մէջ տարածուեցաւ մինչև այսօր:

Յիսուս աշակերտներուն կ’երեւի

16Իսկ տասնըմէկ աշակերտները գացին Գալիլեա, այն լեռը ուր Յիսուս իրենց որոշեր էր: 17Ու երբ զանիկա տեսան, երկրպագութիւն ըրին անոր, բայց ոմանք տարակուսեցան: 18Եւ Յիսուս մօտենալով՝ խօսեցաւ անոնց ու ըսաւ, Ամէն իշխանութիւն ինծի տրուեցաւ երկինքի ու երկրի մէջ: 19Ուրեմն գացէք բոլոր ազգերը աշակերտեցէք, մկրտեցէք զանոնք յանուն Հօր և Որդւոյ և Հոգւոյն Սրբոյ. 20Սորվեցուցէք անոնց որ այն ամէն բաները պահեն՝ ինչ որ ես ձեզի պատուիրեցի. և ահա ամէն օր ես ձեզի հետ եմ մինչև աշխարհիս վերջը: Ամէն: