Յովհաննէս Մկրտչին քարոզչութիւնը

1Այն օրերը Յովհաննէս մկրտիչը եկաւ, ու Հրէաստանի անապատին մէջ կը քարոզէր, 2Ու կ’ըսէր, Ապաշխարեցէք, վասն զի երկինքի թագաւորութիւնը մօտեցած է։ 3Վասն զի ասիկա ան է՝ որու համար Եսայի մարգարէին ձեռքով ըսուեցաւ, որ կ’ըսէ, Անապատի մէջ կանչողին ձայնը, Տէրոջը ճամբան պատրաստեցէք, անոր շաւիղները շիտկեցէք։ 4Եւ այս Յովհաննէսը իր հանդերձը ուղտի մազէ, ու իր մէջքը կաշիէ գօտի ունէր. և իր կերակուրը մարախ ու վայրենի մեղր էր։ 5Այն ատեն Երուսաղէմ և բոլոր Հրէաստան ու Յորդանանու բոլոր կողմերը իրեն կ’ելլէին, 6Եւ կը մկրտուէին իրմէ Յորդանանու մէջ, ու իրենց մեղքերը կը խոստովանէին։ 7Ու երբ տեսաւ փարիսեցիներէն ու սադուկեցիներէն շատերը իր մկրտութեանը եկած, ըսաւ անոնց, Իժերու ծնունդներ, ո՞վ իմացուց ձեզի գալու բարկութենէն փախչիլ։ 8Ուրեմն ապաշխարութեան արժանաւոր պտուղ բերէք. 9Եւ մի խորհիք դուք ձեր ներսիդին ըսել, թէ Մենք մեզի հայր՝ Աբրահամը ունինք. քանզի կ’ըսեմ ձեզի որ Աստուած կարող է այս քարերէն Աբրահամի որդիներ հանել։ 10Ալ հիմա կացինը ծառերուն արմատին քով կը դրուի. ուստի ամէն ծառ որ բարի պտուղ չբերեր, կը կտրուի ու կրակը կը ձգուի։ 11Ես ձեզ ջրով կը մկրտեմ ապաշխարութեան համար, բայց իմ ետևէս եկողը ինձմէ զօրաւոր է, ու ես անոր կօշիկները կրելու արժանի չեմ. անիկա ձեզ պիտի մկրտէ Հոգւով Սրբով ու կրակով. 12Որուն հեծանոցը իր ձեռքն է, և իր կալը պիտի մաքրէ ու իր ցորենը համբարը պիտի ժողվէ, և յարդը պիտի այրէ չմարող կրակով։

Յիսուս մկրտութիւնը

13Այն ատեն Յիսուս Գալիլեայէ Յորդանան եկաւ Յովհաննէսի, որպէս զի անկէ մկրտուի։ 14Եւ Յովհաննէս կ’արգիլէր զանիկա ու կ’ըսէր, Ինծի՛ պէտք է որ քեզմէ մկրտուիմ, ու դուն ինծի՞ կուգաս։ 15Յիսուս պատասխան տուաւ ու ըսաւ անոր, Թող տուր հիմա, վասն զի այսպէս կը վայելէ մեզի որ բոլոր արդարութիւնը կատարենք. ետքը թող տուաւ անոր։ 16Ու երբ Յիսուս մկրտուեցաւ, շուտ մը ջուրէն դուրս ելաւ, և ահա երկինք անոր բացուեցաւ, ու տեսաւ Աստուծոյ Հոգին որ աղաւնիի պէս կ’իջնէր, ու կու գար իր վրայ։ 17Եւ ահա երկինքէն ձայն մը եկաւ որ կ’ըսէր, Ատիկա է իմ սիրելի Որդիս, որու հաւներ եմ։